អស់រយៈពេលជាង ២សប្តាហ៍មកហើយដែលគណបក្សសង្គ្រោះជាតិ បានធ្វើមហាបាតុកម្មទ្រង់ទ្រាយធំ ដើម្បី​ទាម​ទារឲ្យមានការបោះឆ្នោតឡើងវិញ និងទាមទារទម្លាក់លោកនាយករដ្ឋមន្រ្តី ហ៊ុន សែន ចុះចេញចេញពី​តំណែង។ ជាថ្មីម្តងទៀតលោក កឹម សុខា អនុប្រធានគណបក្សសង្គ្រោះជាតិ បានប្តេជាចំពោះមុខបាតុករថា លោកនឹង​ប្រមូល​មហាជន ដើម្បីទំលាក់គណបក្សប្រជាជនកម្ពុជាចេញឲ្យបាន ប្រសិនរកយុត្តិធម៌មិនបាននៅត្រឹមឆ្នាំថ្មីឆ្នាំ ២០១៤ ខាងមុខនេះ។

ទំហំកើនឡើងនៃក្រុមបាតុករប្រឆាំងរដ្ឋាភិបាល បង្កការកកស្ទះរាប់ម៉ោងនៅភ្នំពេញ នាថ្ងៃទី២២ខែធ្នូឆ្នាំ២០១៣។ (រូបថត គណបក្ស)

នយោបាយកម្ពុជា - «យើងនឹងប្រមូលកម្លាំងមហាជនគ្រប់មជ្ឈដ្ឋានទាំងអស់ ដើម្បីទំលាក់គណបក្សប្រជាជនឲ្យ​បានជាដាច់ខាត» នេះគឺជាសម្តីប្តេជ្ញាចិត្តរបស់អនុប្រធានគណបក្សសង្គ្រោះជាតិ លោក កឹម សុខា កាលពីល្ញាច​ថ្ងៃ​សៅរិ៍ទី ២៨ ខែធ្នូម្សិលមិញ នៅចំពោះមុខក្រុមបាតុកររាប់ម៉ឺននាក់នាទីលានប្រជាធិបតេយ្យ ក្នុងគោលបំណងផ្តាំផ្ញើ​ទៅ​គណបក្សប្រជាជនកម្ពុជា ត្រូវប្រញាប់រួតរះរៀបចំឲ្យមានការបោះឆ្នោតឡើងវិញជាកំហិត ។

លោក កឹម សុខា ដែលកំពុងមានប្រជាប្រិយភាពក្នុងវិស័យនយោបាយ ក្នុងជួរគណបក្សប្រឆាំងនៅកម្ពុជាបច្ចុប្បន្ន បានថ្លែងព្រមានខ្លាំងៗដោយដាក់ឳសានវាទឲ្យគណបក្សប្រជាជនកម្ពុជា នៅត្រឹមឆ្នាំថ្មីឆ្នាំ២០១៤ ខាងមុខនេះ ប្រិសិនបើគណបក្សប្រជាជនកម្ពុជានៅតែចចេសមិនយល់ព្រមរកយុត្តិធម៌ជុំវិញការបោះឆ្នោតជូនម្ចាស់ឆ្នោតទេ គណបក្សសង្គ្រោះជាតិនឹងប្រកាសប្រមូលកម្លាំងមហាជនគ្រប់មជ្ឈដ្ឋានទាំងអស់ ដើម្បីទម្លាក់គណបក្ស​ប្រជាជន​កម្ពុជា ចេញពីអំណាចឲ្យបាន។

ការព្រមានរបស់លោ កឹម សុខា បែបនេះ បានធ្វើឡើងក្រោយពីគណបក្សសង្គ្រោះជាតិ បានដឹកនាំមហាជន ដែល​ជាអ្នកគាំទ្រ​ខ្លួន ធ្វើបាតុកម្មអស់រយៈពេលជិតកន្លះខែមកហើយ ដើម្បីទាមទាររកយុត្តិធម៌ជូនម្ចាស់ឆ្នោត តាមរយៈ​ការរៀបចំឲ្យមានការបោះឆ្នោតឡើងវិញ។ ក៏ប៉ុន្តែការធ្វើបាតុកម្មរបស់គណបក្សសង្គ្រោះជាតិមកទល់ពេលនេះ ហាក់នៅមិនទាន់ធ្វើឲ្យគណបក្សប្រជាជនកម្ពុជា កោតញញើតបន្ទន់ជំហរនោះទេ ដោយគណបក្សនេះ នៅតែ​ចចេស​មិនរៀបចំការបោះឆ្នោតឡើងវិញ ជាដាច់ខាត។

ឆ្លើយតបនឹងការលើកឡើងរបស់លោក កឹម សុខា អនុប្រធានគណបក្សសង្គ្រោះជាតិបែបនេះ មន្រ្តីគណបក្ស​ប្រជាជនជនកម្ពុជា លោក ជាម យៀប បានចាត់ទុកសកម្មភាពរបស់គណបក្សសង្គ្រោះជាតិថា មានគោល​បំណង​ចង់ធ្វើរដ្ឋប្រហារទម្លាក់នាយករដ្ឋមន្រ្តីបច្ចុប្បន្ន ។ លោកថា នេះគឺជាទង្វើដែលរំលោភទៅលើច្បាប់​រដ្ឋធម្មនុញ្ញ​ទាំង​ស្រុង ពីព្រោះរដ្ឋាភិបាលរបស់គណបក្សប្រជាជន គឺជារដ្ឋាភិបាលដែលកើតឡើងដោយស្របច្បាប់ ពោលគឺកើត​ចេញពីឆន្ទៈពលរដ្ឋសុទ្ធសាធដែលជាម្ចាស់ឆ្នោតប្រមាណជាជាង ៣ លាននាក់ គំាទ្រគណបក្សប្រជាជនកម្ពុជា។

«មិនអាចរៀបចំឲ្យមានការបោះឆ្នោតឡើងវិញនៅកម្ពុជា ជាដាច់ខាត»

ជាមួយគ្នានេះដែរ កាលពីថ្ងៃទី ២០ ខែធ្នូកន្លងទៅថ្មីៗនេះ លោក ហ៊ុន សែន ក៏បានប្រកាសដោយផ្តាំទៅ​គណបក្ស​សង្រ្គោះជាតិដែលថា រដ្ឋាភិបាលរបស់លោក មិនអាចរៀបចំឲ្យមានការបោះឆ្នោតឡើងវិញនៅកម្ពុជាជាដាច់ខាត ហើយលោកក៏មិនចុះចេញពីតំណែងដែរ ព្រោះរដ្ឋាភិបាលរបស់លោកជារដ្ឋាភិបាលស្របច្បាប់។ លើសពីនេះ​ទៅ​ទៀត​លោក ហ៊ុន សែន បានព្រមានចាត់វិធានការផងដែរ ប្រសិនបើមានការតវ៉ាណាមួយ ប៉ះពាល់ដល់ស្ថេរភាព​ប្រទេសជាតិ។

បើទោះបីបែបនេះក្តី កាលពីព្រឹកថ្ងៃទី២៨ ខែធ្នូ ឆ្នាំ២០១៣ គណបក្សសង្គ្រោះជាតិ នៅក្នុងសន្និសិទការសែត​នៅ​ទីស្នាក់ការគណបក្សរបស់ខ្លួនបានបង្ហាញជំហរហាក់ទន់ភ្លន់បន្តិចរបស់ខ្លួន ដោយអំពាវនាវឲ្យអ្នកនយោបាយខ្មែរ​គ្រប់គណបបក្ស និងក្រុមអង្គការសង្គមស៊ីវិលជាតិ និងអន្តរជាតិ នៅក្នុងឆ្នាំថ្មីនេះ ស្វែងរកគំនិតថ្មីៗដោះស្រាយ​បញ្ហាប្រទេសជាតិដោយឈរលើប្រយោជន៍ជាតិជាធំ និងគោរពឆន្ទៈប្រជាពលរដ្ឋ។

ដោយឡែក នៅថ្ងៃទី២៩ ខែធ្នូ ឆ្នាំ២០១៣នេះផងដែរ ខណៈដែលមេដឹកនាំគណបក្សសង្រ្គោះជាតិ ប្រកាសឲ្យអ្នក​គាំទ្រ​ខ្លួន​ចូលរួមធ្វើបាតុកម្មឲ្យបានជាង ១ លាននាក់ ហើយពេលនេះ មានបាតុករមួយចំនួនកំពុងប្រមូលផ្តុំ​គ្នានៅ​តាម​ស្ថាប័នសាធារណៈរបស់រដ្ឋមួយចំនួនផងនេះ រដ្ឋាភិបាលកម្ពុជា បានចេញសេចក្តីថ្លែងការណ៍ជាបន្ទាន់មួយ ដោយចោទប្រកាន់គណបក្សសង្គ្រោះជាតិថា កំពុងរៀបចំធ្វើបាតុកម្មល្មើសនឹងច្បាប់ទាំងស្រុង៕

--------------------------------------------------
ដោយ៖ ជា ធីរិទ្ធ - ភ្នំពេញថ្ងៃទី ២៦ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំង