នៅថ្ងៃចន្ទទី៣០ ខែធ្នូខាងមុខនេះ នឹងមានការជួបគ្នាសារជាថ្មីទៀត រវាងតំណាងរបស់ក្រសួងការងារ និងតំណាង​មកពីសហជីពដែលមិនយល់ស្រប ការប្រកាសតម្លើងប្រាក់ឈ្នូលដ៏តិចតួច របស់រដ្ឋមន្រ្តីក្រសួងការងារ កាលពី​ថ្ងៃ​ទី២៤ ខែធ្នូរកន្លងទៅនេះ។ ទំនងជាកំពុងរងចាំថ្ងៃចចារនោះហើយ ទើបចំនួនកម្មករដែលចួលរួមធ្វើបាតុកម្ម​នៅ​ថ្ងៃ​នេះ បានថយចុះជាងថ្ងៃមុនៗ។

ក្រុមកម្មករ ដែលបានធ្វើកូដកម្មនៅមុខតំបន់​សេដ្ឋកិច្ច​ពិសេស​ភ្នំពេញ នាផ្លូវជាតិលេខ៤ នៅថ្ងៃទី២៧ ខែធ្នូ ឆ្នាំ២០១៣។ (រូបថត MONOROOM.info/ O.Vary)

រលកបាតុកម្ម - បន្ទាប់ពីកិច្ចពិភាក្សាររបស់តំណាងសហជីពទាំងប្រាំមួយ ដែលបានចូលរួមប្រជុំជាមួយតំណាង​ក្រសួង​ការងារនៅថ្ងៃទី២៧ ខែធ្នូនេះរួចមក ក្រុមសហជីពទាំងនោះបានប្រកាសថា ពួកខ្លួនមិនទទួលបានជា​លទ្ធផល​អ្វីនោះទេ ក្រៅតែរដ្ឋមន្រ្តីបានទទួលសំណើរ របស់កម្មករ​ក្នុង​ការទាមទារប្រាក់ខែគោល១៦០ដុល្លារនោះ​តែប៉ុណ្ណោះ។ ក្រុមសហជីពបានឲ្យដឹងទៀតថា ទាល់តែ ថ្ងៃច័ន្ទ ទី៣០ ខែធ្នូខាងមុខនេះ ទើបមានការពិភាក្សាគ្នា​ម្តងទៀត អំពីរឿងប្រាក់ខែនេះ។ តែក្រសួងសំណូមពរ អោយខាងសហជីបបញ្ឈប់ការធ្វើបាតុកូដកម្ម និងស្នើ​ឲ្យ​កម្មករ​ចូលធ្វើការវិញ។ សម្រាប់សហជីពវិញ ពួកគេនៅតែប្រកាន់បង្ហាញជំហរថា នឹងបន្តធ្វើបាតុកម្ម រហូតរដល់​ថ្ងៃទី៣០ ដែលជាថ្ងៃចចារ។

តែទោះជាយ៉ាងណាក៏ដោយ ក៏ថ្ងៃនេះដែរនៅសួនកាដាឌីយ៉ា កម្មករដែលមានចំនួនថយចុះជាងថ្ងៃម្សិលមិញនោះ បានកំពុងធ្វើបាតុកម្ម ដោយមានចាក់ធុងបាសកម្សាន្ដនៅលើដងផ្លូវនៅឡើយ។ លោក លីវ ថារីន ប្រធានសហព័ន្ធ​សហជីព​យុវជនឯករាជ្យ ដែលកំពុងចូលរួមធ្វើបាតុកម្ម ជាមួយកម្មករនៅមុខ​រោងចក្របានថ្លែងថា​ «ថ្ងៃនេះកម្មករ​មានចំនួនតែពីរម៉ឺននាក់នោះទេ ដែលចំនួននេះថយចុះជាងថ្ងៃម្សិលមិញ ដោយសារតែថ្ងៃនេះ យើងមិនមានការ​ហែរនោះទេ គ្រាន់តែធ្វើនៅមុខសួន»។ លោកបានបញ្ជាក់បន្ថែមថា «បើថ្ងៃច័ន្ទចចារមិនបានសម្រេចទេនោះ ថ្ងៃទី២ មករា ២០១៤ហ្នឹង យើងនឹងដឹកនាំកម្មករធ្វើមហាកូដកម្មទូទាំងប្រទេសតែម្តង»។

លោកបានប្រាប់ទស្សនាវដ្ដីមនោរម្យព័ងអាំងហ្វូអោយដឹងទៀតថា «បើខាងនិយោជក់ អាចតម្លើងលើស​ពី៩៥ដុល្លា ដែលអាចបានប្រហែល១០០ដុល្លាលើសតិចតួច កម្មករនឹងចូលធ្វើការវិញ»។

អ្នកស្រី យ៉ាង សុភ័ណ្ឌ នាយិកាសម្ព័ន្ធសហជីបកម្ពុជា ដែលកំពុងដឹកនាំកម្មករធ្វើបាតុកម្ម នៅមុខរោងចក្រ​ម៉េតហតធេន ខេត្តកំពង់ចាម ក៏បានទទួលស្គាល់ដែរថា «ថ្ងៃនេះកម្មករមានចំនួនថយចុះជាងថ្ងៃម្សិលមិញ ដោយ​សារតែការដើរក្បួនម្សិលមិញ ក៏ដូចជាប៉ុន្មានថ្ងៃមុនធ្វើអោយកម្មករអស់កំលាំង ហេតុដូច្នេះថ្ងៃនេះគាត់​ឈប់​សំរាក»។

«ទោះបីមានការថយចុះក៏ពិតមែន តែកម្មករនៅមានទឹកចិត្តមិនរាថយ គាត់នៅបន្តធ្វើកូដកម្ម មិនចូលធ្វើការ​នោះ​ដដែល។ ដូចថ្ងៃនេះអញ្ចឹង នៅផ្លូវជាតិលេខ៤ កម្មករនៅតែបន្តបិទផ្លូវ។» នេះបើតាមដឹងរបស់នាយិការូបនេះ។

ផ្ទុយពីការលើកឡើងរបស់ លោក លីវ ថារីន ខាងលើ អ្នកស្រី យ៉ាង សុភ័ណ្ឌ បានបដិសេធយ៉ាងដាច់ខាត់ថា «បើ​រដ្ឋាភិបាលមិនអាចផ្តល់ជូននូវលក្ខខណ្ឌ៦ចំនុច ដែលខាងកម្មករចង់បានទេនោះ ពួកយើងនឹងមិនព្រម​ឈប់​ឡើយ។ លក្ខខណ្ឌទាំងប្រាំមួយចំនុចនោះគឺ ទីមួយ ទាមទារប្រាក់ឈ្នួលគោល១៦០ដុល្លាក្នុងមួយ ទីពីរ បញ្ឈប់​ការ​ប្រើប្រាស់កិច្ចសន្យាការងារខ្លី ទីបី ទាមទារអោយ​ថ្លៃ​អាហារសំរាប់កម្មករចំនួនបីពេល ទីបួន ស្នើអោយក្រុមហ៊ុន​តំកល់លុយនៅរតនាគារជាតិ នៃធគានាជាតិកម្ពុជា ដើម្បីអោយនៅពេលក្រុមរត់ចោល យកលុយ (នេះ) មកបើក​ជូនកម្មករ ទីប្រាំ បញ្ឍប់កុំអោយមានអ្នកធំ​ធ្វើជាខ្នង​បង្អែក និងចំនុចទីប្រាំមួយចុងក្រោយគឺ ស្នើអោយមានការ​ដោះស្រាយវិវាទនៅរោងចក្រ អេសអិល»៕

-------------------------------------------------------------
ដោយ៖ ក. ចាន់នីតា - ភ្នំពេញ ថ្ងៃទី២៨ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ