បក្សសង្រ្គោះជាតិប្រមូលកម្មករធ្វើបាតុកម្ម ជាជំហានទីមួយ
ការអំពាវនាវហៅកម្មករ-កម្មការិនី ឲ្យចូលរួមធ្វើបាតុកម្ម ក្នុងបុព្វហេតុទាមទារការតម្លើងប្រាក់ខែ ជាមួយគណបក្សសង្គ្រោះជាតិនៅក្នុងថ្ងៃទី២៥ខែធ្នូនេះ ជាជំហានទីមួយ មុននឹងការអំពាវនាវក្រោយៗទៀត ទៅកាន់គ្រូបង្រៀន ឬមន្ត្រីរាជការនានាផ្សេងទៀត។ នេះជាការប្រកាសពីយុទ្ធសាស្ត្ររបស់លោក រ៉ុង ឈុន មេដឹកនាំសហជីពមួយរូប នៅចំពោះមេដឹកនាំគណបក្សសង្គ្រោះជាតិ។ យុទ្ធសាស្ត្រនេះ ទំនងជាស្របគ្នាជាមួយនឹងយុទ្ធនាការនយោបាយ របស់គណបក្សប្រឆាំងមួយនេះ ដើម្បីដាក់សម្ពាធលើរដ្ឋាភិបាលលោក ហ៊ុន សែន ទាមទារឲ្យមានការបោះឆ្នោតជាថ្មី។
លោក សម រង្ស៊ី (រូបខាងស្ដាំ) នៅចំពោះមុខបាតុករ នៅតំបន់សេដ្ឋកិច្ចពិសេស ខេត្តស្វាយរៀង នៅថ្ងៃទី២៥ ខែធ្នូ ឆ្នាំ២០១៣។ (រូបថត គណបក្ស)
នយោបាយកម្ពុជា - ក្នុងពេលចុងក្រោយនេះ គណបក្សសង្រ្គោះជាតិដែលជាគណបក្សជំទាស់ ត្រូវបានមជ្ឈដ្ឋានទូទៅមើលឃើញថា កំពុងទាក់ទាញ និងបញ្ចុះបញ្ចូលកម្មករ-កម្មការិនី ដែលមិនពេញចិត្តចំពោះប្រាក់ខែគោល និងលក្ខខ័ណ្ឌការងារផងនោះ ឲ្យចូលរួមសកម្មភាព ជាមួយគណបក្សសង្រ្គោះជាតិដើម្បីដាក់សម្ពាធលើរដ្ឋាភិបាល។ បើការទាមទាររបស់ក្រុមកម្មករ ចង់ឲ្យពួកខ្លួនមានលក្ខខណ្ឌការងារល្អ និងទទួលបានប្រាក់ខែគោល ១៦០ដុល្លារអាមេរិក ចាប់ពីដើមឆ្នាំ២០១៤នេះទៅ ប៉ុន្តែក្រុមបាតុកររបស់គណបក្សសង្គ្រោះជាតិឯណោះវិញ បានទាមទារ និងកំណត់ឲ្យលោកនាយករដ្ឋមន្រ្តី ហ៊ុន សែន ចុះចេញពីដំណែង និងការរៀបចំការបោះឆ្នោតឡើងវិញ។
លោក សម រង្ស៊ី ប្រធានគណបក្សសង្រ្គោះជាតិ នៅចំពោះមុខកម្មករ-កម្មការិនី ក្នុងក្រុងបាវិត ខេត្តស្វាយរៀង នៅថ្ងៃទី២៥ ខែធ្នូ ឆ្នាំ២០១៣ បានលើកឡើងថា ដល់ពេលវេលាហើយដែលកម្មករ-កម្មការិនីទូទាំងប្រទេសកម្ពុជាត្រូវយល់ និងដឹងពីស្ថានភាពការណ៍បច្ចុប្បន្ន និងត្រូវចូលរួមតស៊ូជាមួយគណបក្សសង្រ្គោះជាតិ ដើម្បីយុត្តិធម៌សម្រាប់សង្គមកម្ពុជាទាំងមូល។
លោក សម រង្ស៊ី បញ្ជាក់ថា៖ «កម្មករ-កម្មការនីនៅខេត្តស្វាយរៀង និងខេត្តដ៏ទៃត្រូវចូលរួមជាមួយគ្នាដើម្បីជោគជ័យយើងទាំងអស់គ្នា(...)។ យើងសង្រ្គោះព្រៃឈើ ទ្រព្យសម្បត្តិជាតិដែលជនពុករលួយដឹកនាំប្រទេសសព្វថ្ងៃ កំពុងបំផ្លិចបំផ្លាញ កំពុងតែយកទៅលក់ឲ្យបរទេសឈ្លានពាន(...)។ យើងត្រូវសង្រ្គោះជាតិយើងផង មិនមែនតែសង្រ្គោះជីវភាពរបស់យើងក្នុងការតម្លើងប្រាក់ខែ។ យើងត្រូវជួយសង្រ្គោះអនាគតកូនចៅយើងទៅថ្ងៃមុខ។»
ជាមួយគ្នានេះលោក កឹម សុខា អនុប្រធានគណបក្សសង្រ្គោះជាតិ ក្នុងទឹកដីខេត្តកំពង់ចាម នៅថ្ងៃទី២៥ ខែធ្នូ ឆ្នាំ២០១៣នេះ បានកំពុងចូលរួមជាមួយចលនាបាតុករច្រើនពាន់នាក់ ដែលចុះតវ៉ាតាមដងផ្លូវ និងមានការបិទស្ពានមិត្តភាពកម្ពុជា-ជប៉ុន (ស្ពានគីសូណា) ដើម្បីទាមទារឲ្យមានការតម្លើងប្រាក់ខែគោល ឲ្យបាន១៦០ដុល្លារក្នុងមួយខែ និងលក្ខខណ្ឌផ្សេងទៀត។ ក្នុងការចូលរួមនោះ អនុប្រធានគណបក្សជំទាស់រូបនេះ ក៏បានឆ្លៀតលើកឡើងពីភាពមិនប្រក្រតីក្នុងពេលការបោះឆ្នោតកន្លងមក ការទាមទារស៊ើបអង្កេតដោយឯករាជ្យ និងការទាមទារឲ្យបោះឆ្នោតឡើងវិញផងដែរ។
រីឯនៅរាជធានីភ្នំពេញ នៅថ្ងៃទី២៥ ខែធ្នូ ឆ្នាំ២០១៣ នេះក៏មិនខុសពីខេត្តកំពង់ចាម និងខេត្តស្វាយរៀងដែរ។ ព្រោះមានកម្មករ-កម្មការិនី ច្រើនម៉ឺននាក់មកពី៣០រោងចក្រ បានមកចូលជាមួយគណបក្សសង្រ្គោះជាតិ នៅទីលានប្រជាធិបតេយ្យ។ ការមកចូលរួមនេះ ត្រូវបានគេមើលឃើញថា ទំនងជាឆ្លើយតបតាមការអំពាវនាវ កាលពីពេលល្ងាចមួយថ្ងៃមុនរបស់លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា ដែលបានប្រកាសឲ្យកម្មកររោងចក្រទាំងអស់ ធ្វើ«កូដកម្ម»ឈប់ធ្វើការ ដើម្បីមកចូលរួមធ្វើបាតុកម្ម ជាមួយគណបក្សប្រឆាំង។
ទំនងជាយុទ្ធសាស្ត្ររបស់គណបក្សសង្គ្រោះជាតិ ដែលចង់ធ្វើបាតុកម្មប្រឆាំងរដ្ឋាភិបាលលោក ហ៊ុន សែន ឲ្យមានទ្រង់ទ្រាយធំនោះផង ប្រធានសមាគម និងសហជីពរូបនេះ បានអះអាងថា ការអំពាវនាវរបស់លោក ទៅកាន់កម្មករលើកនេះ ជាជំហានទីមួយ។ លោក រ៉ុង ឈុន បានថ្លែងនៅទីលានប្រជាធិបតេយ្យថា «ខ្ញុំនឹងទុកឲ្យកម្មករទៅមួយជំហានមុន។ បន្ទាប់មក ខ្ញុំនឹងអំពាវនាវឲ្យគ្រូ (បង្រៀន) នៅទូទាំងប្រទេស និងមន្ត្រីរាជការទូទាំងប្រទេស ត្រូវតែធ្វើកូដកម្មមិនធ្វើការ ដើម្បីទាមទារបៀវត្ស។»
សូមរម្លឹកថា ការតវ៉ាជាទ្រង់ទ្រាយធំរបស់កម្មករ-កម្មការនីជាមួយគណបក្សសង្រ្គោះជាតិនៅពេលនេះ គឺធ្វើឡើងក្រោយពេលមេដឹកនាំសហជីពមួយចំនួនសម្ដែងការខកចិត្ត ចំពោះសេចក្តីសម្រេចរបស់ ក្រសួងការងារដែលបានសម្រេចតម្លើងប្រាក់ឈ្នួលដល់កម្មកររោងចក្រកាត់ដេរក្នុងរយៈ១ឆ្នាំៗ ចាប់ពី១៥ដុល្លារ ដល់១៧ដុល្លារ ក្នុងរយៈពេល៥ឆ្នាំ ចាប់ពីឆ្នាំ២០១៤ដល់ឆ្នាំ២០១៨។ សេចក្ដីសម្រេចនេះ បានបូកជាមួយប្រាក់ខែគោលដែលមានស្រាប់ចំនួន៨០ដុល្លារ នៅឆ្នាំ២០១៤នេះ ដែលធ្វើឲ្យកម្មករអាចទទួលបានប្រាក់ខែគោលចំនួន៩៥ដុល្លារ ហើយរហូតដល់ឆ្នាំ២០១៨ ទើបកម្មករទទួលបានប្រាក់ខែគោល១៦០ដុល្លារ៕
---------------------------------------
ដោយ៖ អ៊ុំ បូរី - ភ្នំពេញ ថ្ងៃទី២៥ ខែធ្នូ ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ