អ្នកភូមិបឹងកក់ និងព្រះសង្ឃនឹងបន្តបាតុកម្ម បើគ្មានដំណោះស្រាយ
បន្ទាប់ពីត្រូវបានកងកម្លាំងរបស់អាជ្ញាធរវាយបំបែក ពីមុខសាលារាជធានី កាលពីថ្ងៃទី២៤ខែធ្នូឆ្នាំ២០១៣នោះមក ក្រុមអ្នកទាមទារតវ៉ាមកពីភូមិបឹងកក់ ទំនងជាមិនបានដកទ័ពថយនោះទេ។ ពួកគេទាំងនោះ រួមទាំងព្រះសង្ឃផង បានប្ដេជ្ញាថានឹងបន្តការទាមទាររបស់គេតទៅទៀត។
រនាំងដែក និងកងកម្លាំងការពារសន្តិសុខ នៅមុខសាលារាជធានីភ្នំពេញ ថ្ងៃទី២៤ ខែធ្នូ ឆ្នាំ២០១៣។ (រូបថត MONOROOM.infO/ Senghong)
វិវាតដីធ្លី - ការប៉ះទង្គិចកាលពីព្រឹកថ្ងៃទី២៤ ខែធ្នូ រវាងកងកម្លាំងអាជ្ញាធរ និងពលរដ្ឋអ្នកតវ៉ា ដែលបណ្តាលឲ្យមានជនរងរបួសចំនួនប្រាំពីរនាក់ ក្នុងនោះរួមមានលោកសង្ឃពីរអង្គ ស្រ្តីពីរនាក់ និងបុរសបីនាក់។ បន្ទាប់មក នៅមុខរនាំងដែកដាក់ឃាំងដោយអាជ្ញាធរ ព័ទ្ឋជុំវិញបរិវេណសាលារាជធានីនោះ ក្រុមអ្នកតវ៉ាបានបន្តការទាមទារ និងបានធ្វើការផ្តោលទោស ចំពោះទង្វើរហិង្សានៃក្រុមសន្តិសុខខណ្ឌដូនពេញទាំងនោះ មកលើពួកខ្លួន។ ទោះបីមានការតបតពាក្យសម្តីគ្នាបន្តិចបន្តួច រវាងអាជ្ញាធរជាមួយក្រុមអ្នកតវ៉ាក្តី តែមិនមែនបញ្ហាហិង្សាណាមួយ កើតឡើងបន្ថែមទៀតទេ។
ប៉ុន្តែដោយសារមានព្រះសង្ឃពីរអង្គបានរងរបួស ក្នុងការវាយបំបែករបស់កងកម្លាំងអាជ្ញាធរនោះ ម៉ោងប្រមាណជាមួយរសៀល មានព្រះសង្ឃកម្ពុជាក្រោមប្រមាណជា៧០អង្គ បាននិមន្ដមកធ្វើការតវ៉ាដែរ តែក្រុមព្រះសង្ឃទាំងនេះ មានបំណងទាមទារឲ្យខាងកងកម្លាំងខណ្ឌដូនពេញ ដែលបានវាយព្រះសង្ឃពីរអង្គឲ្យមានរបួសនោះ ធ្វើការសុំទោស។ ស្ថានភាពនេះ បានឈានទៅដល់ផ្ទុះអំពើហិង្សាឡើងទៀត ដោយមានការរុញច្រានរនាំងដែក និងវាយកំទេចកញ្ចក់បញ្ជររូបថតរបស់សាលារាជធានី។ ក្រុមព្រះសង្ឃតវ៉ា បានដកថយត្រឡប់ទៅវិញ ដោយមិនទទួលបានការសុំទោសពីជនដៃដល់ ដែលបានវាយព្រះសង្ឃនោះទេ តែបានសន្យាថា នឹងត្រឡប់មកម្តងទៀត ដើម្បីឲ្យខាងអាជ្ញាធរធ្វើការសុំទោស ឲ្យខាងតែបាន។
អ៊ំស្រី ង៉ែត ឈុន មានវ័យចំណាស់ជាងគេ ក្នុងចំណោមក្រុមអ្នកតវ៉ាទាំងអស់ បានបង្ហាញពីទឹកចិត្តរបស់គាត់ ប្រាប់ទស្សនាវដ្តីមនោរម្យព័ងអាំងហ្វូឲ្យដឹងថា គាត់មានការឈឺចាប់ណាស់ ចំពោះទង្វើររបស់អាជ្ញាធរ ក្នុងការបង្ក្រាបមកលើក្រុមអ្នកតវ៉ាអតីតភូមិបឹងកក់ ដោយខែល និងដំបងឆក់បែបនេះ ខណៈពួកគាត់គ្មានអាវុធអ្វីសោះនៅក្នុងដៃ។ អ៊ំស្រីបាននិយាយបន្ទោស ដល់កងកម្លាំងសន្តិសុខទាំងនោះ ដែលយកលេសសម្រួលចរាចរណ៏ តែគឺដើម្បីប្រើហិង្សាមកលើពួកគាត់ទាំងអស់គ្នាតែប៉ុណ្ណោះ។
អ៊ំស្រីបានអះអាងថា អ៊ំស្រីនៅតែព្យាយាមមកតវ៉ានៅមុខសាលារាជធានី លុះត្រាណាតែមានដំណោះស្រាយកើតមានឡើង នូវអ្វីដែលខាងអាជ្ញាធរបានសន្យា ចំពោះអ្នកភូមិបឹងកក់គឺផ្តល់ប្លង់កម្មសិទ្ឋ វាស់ត្រឹមដី១២,៤៩ហិចតា នៃអនុក្រឹត្យលេខ១៨៣ និងផ្តល់ប្លង់កម្មសិទ្ឋិដល់ពួកគាត់ បានពួកគាត់សុខចិត្ត។
មកដល់ល្ងាចថ្ងៃដដែលនេះ ទស្សនាវដ្ដីមនោរម្យព័ងអាំងហ្វូ នៅមិនទាន់បានទទួលប្រតិកម្មពីសាលារាជធានីថា យ៉ាងណានៅឡើយ។ តែលោកឡុង ឌីម៉ង់ អ្នកនាំពាក្យសាលារាជធានីភ្នំពេញ ត្រូវបានស្រង់សម្ដីដោយគេហទំព័រ CEN បានឲ្យដឹងថា សាលារាជធានីភ្នំពេញមានការសោកស្តាយខ្លាំងណាស់ មិនគួរណាក្រុមអ្នកតវ៉ានេះ រួមទាំងប្រជាពលរដ្ឋនិងព្រះសង្ឃ ហាក់ដូចជាកំពុងតែប្រព្រឹត្តអំពើអនាធិបតេយ្យ ធ្វើឲ្យបាត់បង់សណ្តាប់ធ្នាប់កាន់តែខ្លាំងទៅៗ រហូតឈានទៅដល់ការប្រើប្រាស់អំពើហិង្សាគប់ដុំថ្ម ចូលទៅក្នុងសាលារាជធានីភ្នំពេញ។
ដោយឡែក លោក អំ សំអាត មន្ត្រីឃ្លាំមើលសិទ្ធិមនុស្ស មកពីអង្គការលីកាដូ ក៏បានសម្ដែងការសោកស្ដាយដូចគ្នា ដែលមានការវាយប្រហារពីសំណាក់កងកម្លាំងអាជ្ញាធរ បណ្តាលឲ្យមានមនុស្សរបូសបែបនេះ។ មន្ត្រីសិទ្ធិមនុស្សរូបនេះ បានប្រាប់ទស្សនាវដ្តីថា ការធ្វើបែបនេះមិនមានចំណេញអ្វីដល់រដ្ឋាភិបាលទេ ប៉ុន្តែវានឹងបណ្តាលឲ្យមានការថ្កោលទោស ពីអន្តរជាតិថែមមួយកំរិតទៀត ចំណែកខាងសង្គមស៊ីវិលក៏មិនចង់ឃើញដែរ នូវការដោះស្រាយ ដោយមានការរំលោភសិទ្ឋិរបស់ប្រជាពលរដ្ឋបែបនេះ។
លោក អំ សំអាត បានអំពានាវដល់អាជ្ញាធររាជធានីភ្នំពេញ ឲ្យដោះស្រាយឡើងវិញ ដើម្បីរកផលប្រយោជន៏ជូនដល់ប្រជាពលរដ្ឋ ព្រោះការប្រើហិង្សាបែបនេះ មិនអាចធ្វើឲ្យស្ថានការណ៏ មានការធូរស្បើយបានឡើយ មិនខុសពីការចាក់សាំងលើភ្លើងឡើយ។ លោកស្នើសុំអាជ្ញាធរគិតពិចារណា ដោះស្រាយបញ្ហានេះដោយសន្តិវិធី និងមិនលាបពណ៌គ្នា៕
----------------------------------------------
ដោយ៖ ក. សេងហុង ថ្ងៃ២៤ ខែធ្នូ ឆ្នាំ ២០១៣
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ