សម រង្ស៊ី ប្រកាស​ដាក់​ជីវិត ជា​ថ្នូរ​នឹង​អាយុ​ជីវិត​ជាតិ

ប្រធានគណបក្សសង្គ្រោះជាតិ លោក សម រង្ស៊ី កាលពីយប់ថ្ងៃអង្គារទី១៧ ខែធ្នូ ឆ្នាំ២០១៣នេះ បានប្រកាស​លះ​បង់​ជីវិតរបស់ខ្លួននៅចំពោះមុខក្រុមបាតុករជាច្រើនពាន់នាក់ ដើម្បីជាថ្នូរនឹងអាយុជីវិតរបស់ប្រទេសជាតិ។ ការ​ប្រកាសរបស់លោក សម រង្ស៊ី បែបនេះ បានធ្វើឲ្យក្រុមបាតុករទះដៃកងរំពងឡើង ដោយក្តីរំភើបនិងមានសង្ឃឹម នៅពេលបានឮការប្តេជ្ញារបស់ប្រមុខមេដឹកនាំខ្លួនបែបនេះ ។
Loading...
  • ដោយ: ជា ធីរិទ្ធ
  • កែប្រែចុងក្រោយ: December 18, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ប្រធានគណបក្សសង្គ្រោះជាតិ លោក សម រង្ស៊ី កាលពីយប់ថ្ងៃអង្គារទី១៧ ខែធ្នូ ឆ្នាំ២០១៣នេះ បានប្រកាស​លះ​បង់​ជីវិតរបស់ខ្លួននៅចំពោះមុខក្រុមបាតុករជាច្រើនពាន់នាក់ ដើម្បីជាថ្នូរនឹងអាយុជីវិតរបស់ប្រទេសជាតិ។ ការ​ប្រកាស​របស់លោក សម រង្ស៊ី បែបនេះ បានធ្វើឲ្យក្រុមបាតុករទះដៃកងរំពងឡើង ដោយក្តីរំភើបនិងមានសង្ឃឹម នៅពេល​បានឮការប្តេជ្ញារបស់ប្រមុខមេដឹកនាំខ្លួនបែបនេះ ។


នៅលើរថយន្ដកណ្ដាល៖ លោក កឹម សុខា (ឆ្វេង) និងលោក សម រង្ស៊ី លើកទង់ជាតិ និងដៃទៅរកអ្នកគាំទ្រ ក្នុង​ពេលដង្ហែក្បួនបាតុកម្មកាត់រាជធានីភ្នំពេញ របស់គណបក្សសង្គ្រោះជាតិថ្ងៃទី១៧ ខែធ្នូ ឆ្នាំ២០១៣។ (រូបថត គណបក្ស)

នយោបាយកម្ពុជា - «ខ្ញុំបានប្តេជ្ញាចិត្តហើយ! ខ្ញុំចាស់ហើយ ខ្ញុំអត់ខ្លាចស្លាប់ទេ! ដល់ពេលហើយ ដែលខ្ញុំត្រូវហ៊ាន​បូជាជីវិតដើម្បីឲ្យជាតិរស់» នេះគឺជាពាក្យពេចន៍នៃវីរៈបុរស ក្នុងដួងចិត្តរបស់ក្រុមបាតុករគណបក្សសង្គ្រោះជាតិ លោក សម រង្ស៊ី ដែលបានថ្លែងទៅកាន់អ្នកគាំទ្ររបស់ខ្លួននៅទីលានប្រជាធិបតេយ្យ នៅយប់ថ្ងៃទី ១៧ ខែធ្នូ ពោល​គឺនៅពេលដែលលោកបានត្រឡប់មកពីដឹកនាំក្រុមបាតុកដង្ហែក្បួន នៅតាមដងផ្លូវមួយចំនួន កាត់រាជធានីភ្នំពេញ​រួចមក។

លោក សម រង្ស៊ី បានរៀបរាប់រម្លឹកឡើងវិញ ពីពេលដែលរូបលោកត្រូវបានតុលាការនៃប្រទេសកម្ពុជា សម្រេច​ដាក់​ទោសលោកឲ្យជាប់ពន្ធនាគាររយៈពេល ១២ ឆ្នាំ ក្នុងរឿងដកតម្រុយបង្គោលព្រំដែន កាលពីឆ្នាំ ២០០៩ ដែលធ្វើ​ឲ្យរូបលោកត្រូវនិរទេសខ្លួនទៅរស់នៅប្រទេសបារំាងអស់រយៈពេលជាង ៤ ឆ្នាំ។ មេបក្សប្រឆាំងរូបនេះ បានថ្លែង​បន្តទៅកាន់អ្នកគាំទ្រទៀតថា មុនពេលដែលលោកសម្រេចចិត្តចូលមកប្រទេសកម្ពុជាវិញនេះ គឺដោយសារ​តែ​កម្ពុជា​កាន់តែ«ដុនដាប»ទៅៗ។ ម្លោះហើយ បានជាជម្រុញឲ្យលោកធ្វើការសម្រេចចិត្តចូលស្រុកវិញ ជាមួយនឹង​ពាក្យ​ថា «ទៅហើយ! សុខចិត្តស្លាប់ដើម្បីជាតិ»។

គ្រាន់តែលោក សម រង្ស៊ី និយាយពាក្យនេះចប់ សំឡេងទះដៃអបអរសាទរ បានបន្លឺឡើងយ៉ាងទ្រហឹងអ៊ឹងអាប់​ ពី​សំណាក់ក្រុមបាតុករនៅពាសពេញសួនសេរីភាព ដោយម្នាក់ៗមើលទៅហាក់ពេញពេញថ្លើម និងពាក្យពេចន៍​ប្តេជ្ញារបស់មេបក្សរបស់ខ្លួនក្រៃលែង បើទោះបីជាអាកាសធាតុនៅថ្ងៃនេះ ចុះត្រជាក់ និងមានភ្លៀងផ្គរយ៉ាង​ណា​ក៏ដោយ។

លោក មាស ញាញ់ ជាបាតុករម្នាក់មកពីខេត្តព្រៃវែង ឈរនៅកណ្តាលទីលានប្រជាធិបតេយ្យ កំពុងស្តាប់លោក សម រង្ស៊ី ថ្លែងនៅលើវេទិកា និងមានទឹកមុខញញឹមផងនោះ លោកបាននិយាយថា «ខ្ញុំរំភើបខ្លាំងណាស់​នៅ​ពេល​ដែលខ្ញុំបានឮសម្តីលោក សម រង្ស៊ី ដែលហ៊ានដាក់ជីវិតរបស់ខ្លួន ដើម្បីការពារជាតិមាតុភូមិ ដោយមិនសោក​ស្តាយ​ពីជីវិតរបស់ខ្លួន។ ខ្ញុំឮសម្តីគាត់ ធ្វើឲ្យខ្ញុំកាន់តែមានចិត្តតស៊ូជាមួយគាត់ទៅមុខទៀត ដោយមិនរាថយឡើយ បើ​ទោះបីជាថ្ងៃនេះរងាយ៉ាងណាក៏ដោយ។»

ខោសើម អាវសើម ដៃញ័រទទ្រើត លោកតា ឆយ ដែលនៅហាលភ្លៀងតាំងពីព្រឹកមកនោះ បានព្យាយាមស្តាប់​លោក សម រង្ស៊ី ដោយយកចិត្តទឹកដាក់បំផុតនិងបានឆ្លៀតប្រាប់គេហទំព័រមនោរម្យព័ងអាំងហ្វូឲ្យដឹងថា «ខ្ញុំមិន​រងាទេ បើទោះបីជាដៃខ្ញុំញ័រដោយសារត្រជាក់ក៏ដោយ តែចិត្តរបស់ខ្ញុំកក់ក្តៅខ្លាំងណាស់នៅថ្ងៃនេះ។ កក់ក្តៅ​ដោយ​សារខ្ញុំបានឮអ្នកស្នេហាជាតិក្នុងចិត្តខ្ញុំគឺលោក សម រង្ស៊ី ប្រកាសដាក់ជីវិតរបស់ខ្លួន បូជាដើម្បីជាតិមាតុភូមិ។»

បាតុករមានវ័យចំណាស់រូបនេះ បានបន្តថា អ្វីដែលលោកតាស្រណោះ នឹងមិនអាចបំភ្លេចបាន សម្រាប់ការប្តេជ្ញា​របស់មេដឹកនាំបក្សប្រឆាំងនៅថ្ងៃនេះទេ គឺលោក សម រង្ស៊ី បាននិយាយថា «ខ្ញុំចាស់ហើយ! ខ្ញុំអត់ខ្លាចស្លាប់ទេ!» ពាក្យ​នេះធ្វើ​ឲ្យ​លោកតាព្រឺរោមតែម្តង។ លោកតា ឆយ បានអះអាងបន្តទៀតថា «ខ្ញុំនឹងលះបង់ជីវិត ដើម្បីជាតិដូច​លោកប្រធាន​ដែរ»។

គេមិនអាចដឹងថា តើនៅពីក្រោយការថ្លែងរបស់មេដឹកនាំគណបក្សប្រឆាំង ទំនងជាមានជាប់ពាក់ព័ន្ធនឹងការ​គម្រាម​កំហែង​ដល់អាយុជីវិតលោក ឬយ៉ាងណានោះទេ។ ហើយជុំវិញពាក្យប្ដេជ្ញាចិត្តរបស់លោក សម រង្ស៊ីនេះ ទស្សនាវដ្ដី​មនោរម្យព័ងអាំងហ្វូ ក៏នៅមិនទាន់ទទួលបានប្រតិកម្ម ពី​គណបក្ស​ប្រជាជនកម្ពុជា ឬពីរដ្ឋាភិបាលលោក ហ៊ុន សែន ថាយ៉ាងដូចម្ដេចនៅឡើយដែរ នៅយប់ថ្ងៃអង្គារដដែល​នេះ៕

---------------------------------------------------------
ដោយ៖ ជា ធីរិទ្ធ - ភ្នំពេញ ថ្ងៃទី១៧ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...