ប្រតិកម្ម​យុវជន ចំពោះ​ការ​កំណត់​ថ្លៃ​ទូរស័ព្ទ​របស់​រដ្ឋាភិបាល​(កែទម្រង់)​ថ្មី

ការលូកដៃអន្តរាគមន៍ មកកំណត់តម្លៃហៅចេញនៃប្រព័ន្ធទូរស័ព្ទដៃ របស់រដ្ធាភិបាល ជារឿងមិនត្រឹមត្រូវ ព្រោះ​ការ​កំណត់តម្លៃបែបនេះ នឹងធ្វើឲ្យប្រជាជនពិបាកក្នុងជីវភាពប្រចាំថ្ងៃ ហើយបានខុសទៅនឹងគោលការណ៍ នៃសេដ្ឋកិច្ច​ទីផ្សារដែលមានចែងក្នុងរដ្ឋធម្មនុញ្ញ។ នេះជាការលើកឡើង របស់ក្រុមយុវជនប្រមាណជា១០០នាក់ ដែលបានមក​ជួបជុំគ្នា នៅក្នុងបរិវេណវត្តភ្នំ កាលពីថ្ងៃសៅរ៍ទី១៤ខែធ្នូនេះ។
Loading...
  • ដោយ: ក. សេងហុង
  • កែប្រែចុងក្រោយ: December 14, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ការលូកដៃអន្តរាគមន៍ មកកំណត់តម្លៃហៅចេញនៃប្រព័ន្ធទូរស័ព្ទដៃ របស់រដ្ធាភិបាល ជារឿងមិនត្រឹមត្រូវ ព្រោះ​ការ​កំណត់តម្លៃបែបនេះ នឹងធ្វើឲ្យប្រជាជនពិបាកក្នុងជីវភាពប្រចាំថ្ងៃ ហើយបានខុសទៅនឹងគោលការណ៍ នៃសេដ្ឋកិច្ច​ទីផ្សារដែលមានចែងក្នុងរដ្ឋធម្មនុញ្ញ។ នេះជាការលើកឡើង របស់ក្រុមយុវជនប្រមាណជា១០០នាក់ ដែលបានមក​ជួបជុំគ្នា នៅក្នុងបរិវេណវត្តភ្នំ កាលពីថ្ងៃសៅរ៍ទី១៤ខែធ្នូនេះ។


ក្រុមយុវជនដែលជួបជុំគ្នា ក្នុងបរិវេណវត្តភ្នំ កាលពីថ្ងៃទី១៤ខែធ្នូ ឆ្នាំ២០១៣។ (រូបថត MONOROOM.info/ SengHong)

ទូរគមនាគមន៍កម្ពុជា - «យុវជនសម័យនេះមិនដូចសម័យពីដើម ដែលមិនដឹងរឿងសង្គមទេ។ យុវជនពេលនេះ មានភាពក្លាហានស្របតាមច្បាប់សង្គម។» នេះជាសង្ឃដីការរបស់ព្រះតេជគុណ លួន សាវាត ដែលបានធ្វើការ​វាយ​តម្លៃទៅលើ ការជួបជុំគ្នានាទីធ្លានៃរមណីយដ្ឋានវត្តភ្នំ របស់ក្រុមយុវជនប្រមាណជា១០០នាក់ ក្នុងថ្ងៃសៅរ៍ទី១៤ ខែធ្នូ​នេះ។

ក្រុមយុវជនទាំងនោះ បានរៀបរាប់ពីការជួបជុំរបស់ពួកគេថា គឺដើម្បីប្រមូលស្នាមមេដៃ ដើរក្បួន និងយកញត្តិ​ទៅ​ជូនលោក ប្រាក់ សុខុន រដ្ឋមន្ត្រីថ្មីនៃក្រសួងប្រៃសណីយ៍ និងទូរគមនាគមន៍។ ញត្តិដែលក្រុមយុវជនបានធ្វើនោះ មានគោលបំណងស្នើសុំឲ្យទុកជានិរាករណ៍ នៃសេចក្ដីប្រកាសអន្តរក្រសួងលេខ ២៣២ ដែលបានកំណត់​តម្លៃ​អប្បបរិមា សម្រាប់ការហៅចេញនៃប្រព័ន្ធទូរស័ព្ទដៃ។

ពីក្នុងចំណោមនោះ យុវជនម្នាក់ឈ្មោះ រិន ចាន់រិទ្ធិ ជានិស្សិតមួយរូប មកពីសាកលវិទ្យាល័យបញ្ញាសាស្រ្តកម្ពុជា បានត្អូញត្អែរប្រាប់ទស្សនាវដ្ដីមនោរម្យព័ងអាំងហ្វូថា ការតម្លើងថ្លៃទូរស័ព្ទនេះ ធ្វើឲ្យពិបាកក្នុងការប្រើប្រាស់​ប្រព័ន្ធ​អ៊ិនធឺណេត មិនបង្កភាពងាយ​ស្រួល ក្នុងការស្រាវជ្រាវរៀនសូត្រ។ ដោយខ្លួនជាអ្នកប្រើប្រាស់ប្រព័ន្ធទូរស័ព្ទ ស្មាត ផងនោះ យុវជនចាន់រិទ្ធិ បាន​និយាយទៀតថា ទោះជាប្រព័ន្ធនេះមិនសូវល្អយ៉ាងណាក៏ដោយ តែវាបានជួយយុវជន​បានយ៉ាងច្រើន ដូចជាកម្មវិធី​«ដូរលុយបាន» នោះជាដើម។

ដោយមានកាន់ផ្ទាំងក្រដាសធំមួយ សរសេរពីមាត្រា៥៦នៃរដ្ឋធម្មនុញ្ញកម្ពុជាដែលបានចែងថា «ព្រះរាជាណាចក្រ​កម្ពុជា អនុវត្តប្រព័ន្ធសេដ្ធកិច្ចទីផ្សារ» និស្សិតមួយរូបទៀតរៀនឆ្នាំទីបី ខាងទស្សនវិជ្ជា នៃសាកលវិទ្យាល័យភូមិន្ទ​ភ្នំពេញ​ យុវជន រឹម ភារី បានប្រាប់ទស្សនាវដ្តីថា៖ «ខ្ញុំសូមអំពាវនាដល់ក្រសួង ប្រៃសណីយ៏ និងទូគមនាគមន៏ និង​ក្រសួងហិរញ្ញវត្ថុឲ្យចាត់វិធានការនេះ។ ព្រោះការកំណត់តម្លៃ នេះមានន័យថា រដ្ឋបានលូកដៃ ចូលទៅក្នុងប្រព័ន្ធ​សេដ្ធកិច្ចទីផ្សារហើយ។ (...) បើមានការប្រកួតប្រជែង និងមានតម្លៃថោក ប្រជាពលរដ្ធនឹងមានជីវភាពធូធារ។ ការ​ខ្លាចរបស់ក្រសួងក្នុងការដួលរលំប្រព័ន្ធទូរស័ព្ទ គ្រាន់តែជាការដោះសារមួយប៉ុណ្ណោះ ព្រោះការប្រកួតប្រជែង​គឺគេ​ស្វែងរកតម្លៃទាប ទើបគេហៅថាទីផ្សារសេរី។ (...)  ប្រជាពលរដ្ធមានសិទ្ធិគាំទ្រសេវាកម្មមួយណា ជាសិទ្ធិរបស់​គាត់។»

«ការភ័យខ្លាចរបស់ក្រសួង» ទំនងជាក្រុមយុវជនបានយោងទៅលើ សេចក្ដីថ្លែងរបស់រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ប្រាក់ សុខុន ក្នុងសន្និសិទការសែត កាលពីថ្ងៃ០៩ ខែធ្នូកន្លងមកនេះថា ការកំណត់ថ្លៃ​ទូរស័ព្ទរបស់ក្រសួងនេះ មានបំណង​ដើម្បីចូលរួមទប់ស្កាត់ ចំពោះការប្រកួតប្រជែងមិនស្មោះត្រង់ ដែលជាហេតុ​បណ្តាលឲ្យក្រុមហ៊ុនទូរស័ព្ទផ្សេងៗទៀត មានការដួលរលំ និងដើម្បីស្វែងរកពន្ធបន្ថែមក្នុងការតម្លើង​ប្រាក់ដល់​មន្ត្រី​រាជការ។

តំណាងមួយរូបរបស់ក្រុមយុវជន លោកហេង គឹមណា  បានឆ្លើយតបពីករណី «ការប្រកួតប្រជែងមិនស្មោះត្រង់»ថា ជាការលូកដៃអន្តរាគមន៍របស់រដ្ធាភិបាល ដែលមិនត្រឹមត្រូវ ព្រោះការកំណត់តម្លៃបែបនេះ នឹងធ្វើឲ្យប្រជាជនពិបាក​ក្នុងជីវភាពប្រចាំថ្ងៃ។ យុវជនរូបនេះយល់ឃើញថា សកម្មភាពនេះរបស់រដ្ធាភិបាល ហាក់បង្ហាញពីការការពារ​ផល​ប្រយោជន៏ ដល់ក្រុមឬបក្សពួកណាមួយ។

យុវជន ហេង គឹមណា បានឆ្លើយតបទាក់ទងនឹងការលើកឡើង ពីការកំណត់ថ្លៃទូរស័ព្ទ ដើម្បីយកពន្ធទៅ​តម្លើង​ប្រាក់ខែឲ្យដល់មន្ត្រីរាជការនោះ ថាមិនអាចមានអ្វីមកអះអាងឲ្យច្បាស់បានឡើយ ដោយសារតែភាពជាក់ស្តែង វាមិនគ្រប់គ្រាន់ ដើម្បីយកទៅតម្លើងប្រាក់ខែមន្ត្រីរាជការនោះទេ។ ចំនុចនេះ យុវជនបានលើកជាយោបល់ថា រដ្ឋាភិបាលគួរតែធ្វើការអភិវឌ្ឍន៏សេដ្ធកិច្ច តាមការវិនិយោគទុននៅក្នុងស្រុក លុបបំបាត់អំពើពុករលួយ កែទម្រង់​ច្បាប់ដើម្បីទាក់ទាញវិនិយោគទុនបរទេសនោះជាដើម៕

សូមទស្សនារូបបន្ថែម៖

---------------------------------------------
ដោយ៖ ក. សេងហុង ថ្ងៃ១៤ ខែធ្នូ ឆ្នាំ ២០១៣
រក្សាសិទ្ឋដោយ៖ ទស្សនាវដ្តីមនោរម្យព័រអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...