ក្រោយពី រដ្ឋមន្ត្រីក្រសួងប្រៃសណីយ៍ និងទូរគមនាគមន៏ បានរៀបចំសន្និសីទកាសែតមួយ ទាក់ទងទៅនឹងបញ្ញត្តិកម្ម លើសេវាទូរស័ព្ទនោះមក កាលពីរសៀលថ្ងៃច័ន្ទ ទី៩ ខែធ្នូ ឆ្នាំ២០១៣ មានមតិពីរបានលើកឡើងផ្ទុយគ្នា ពីការ​កំណត់​របស់រដ្ឋមន្ត្រីក្រសួងប្រៃសណីយ៍ និងទូរគមនាគមន៏។

ហាងលក់ទូរស័ព្ទដៃ នៅប្រទេសកម្ពុជា។ (រូបថត wordpress.com)

ទូរគមនាគមន៍កម្ពុជា - ក្រសួងប្រៃសណីយ៍ និងទូរគមនាគមន៍ និងក្រសួងសេដ្ឋកិច្ច និងហិរញ្ញវត្ថុ បានចេញ​សេចក្ដី​ប្រកាសមួយ ដោយបានកំណត់ឲ្យក្រុមហ៊ុនបំរើសេវាទូរស័ព្ទចល័តទាំងអស់ នៅក្នុងប្រទេសកម្ពុជា កំណត់​ការហៅ​ចេញក្នុងប្រព័ន្ធ យ៉ាងតិចអប្បបរមា ៤.៥សេន ក្នុងមួយនាទី និងក្រៅប្រព័ន្ធ ៥.៩៥សេន ក្នុងមួយនាទី។ ការ​ចេញ​សេចក្ដីប្រកាសនេះ ត្រូវបានរដ្ឋមន្ត្រីក្រសួងប្រៃសណីយ៍ និងទូរគមនាគមន៏ លើកឡើងក្នុងសន្និសិទ​ការសែត​មួយថា ដោយសារតែមានការព្រួយបារម្ភណ៏ អំពីហានិភ័យឆ្ពោះទៅរកការរកស៊ីផ្ដាច់មុខ របស់​ក្រុមហ៊ុនទូរស័ព្ទ​នៅ​ប្រទេស​កម្ពុជា។

លោក យ៉ង់ គឹមអេង នាយកមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព បានសម្តែងនូវការយល់ឃើញថា «រដ្ឋាភិបាលមិនគួរកំណត់តម្លៃនោះទេ ព្រោះការប្រកួតប្រជែងវាមានសារៈសំខាន់ សំរាប់វិស័យឯកជន និង មិន​បារម្ភណ៏ពីការខាតបង់របស់ក្រុមហ៊ុននោះទេ។ ម្យ៉ាងវិញ ទៀតខ្ញុំមានការបារម្ភណ៏ថា មានអ្នកធំ មានការចូលហ៊ុន​ទៅក្រុមណាមួយ ទើបធ្វើអោយមានការកំណត់ថ្លៃ។»

ឆ្លើយតបនិងការរិះគន់នេះ លោក យឹម ពុទ្ធា សាស្រ្តាចារ្យ ផ្នែកវិទ្យាសាស្រ្តសេដ្ឋកិច្ច នៃសាកលវិទ្យាល័យ ភូមិន្ទ​និតិសាស្រ្ត និង វិទ្យាសាស្រ្តសេដ្ឋកិច្ច បានលើកឡើងថា៖ «ការកណត់នេះ គឺដើម្បីរក្សាលំនឹងផលប្រយោជន៏​របស់​ប្រជាពលរដ្ឋ ព្រោះក្នុងប្រព័ន្ធរបបសេដ្ឋកិច្ចទីផ្សារសេរី គឺឯកជនជាអ្នកធ្វើការដោះដូរ ប៉ុន្តែបើទីផ្សារស្ថិតក្នុង​ភាព​បរាជ័យ រដ្ឋមានតួនាទីអន្តគមន៏ ដើម្បីធ្វើយ៉ាងណាអោយមានលំនឹងនៅក្នុងទីផ្សារ»។

លោកបន្តទៀតថា «ប្រសិនបើយើងអនុញ្ញាត អោយគាត់ប្រកួតប្រជែងថ្លៃនោះ នោះក្រុមហ៊ុនដែលមានទុន​ច្រើន​នឹងឈ្នះ។ម្យ៉ាងនៅក្នុងសេដ្ឋកិច្ចទីផ្សារសេរី គឺយើងធ្វើយ៉ាងណាអោយទីផ្សារមានតុល្យភាព មានន័យថា យើងគួរ​ជំរុញអោយមានការប្រកួតប្រជែងកាន់តែច្រើន។ ប្រសិនបើប្ដូររូបភាពមកប្រកួតប្រជែងថ្លៃវិញនោះ នោះក្រុមហ៊ុន នឹងខិតខំប្រឹងប្រែងបង្កើតកម្មវិធី និងបច្ចេកវិទ្យាថ្មីៗដើម្បីបង្កើន utility របស់អតិថិជន។»

ខណៈពេលដែលទូរស័ព្ទចល័ត កំពុងតែមានការប្រកួតប្រជែងគ្នាខាងតម្លៃ ការបន្ថែមនាទី ឬទឹកប្រាក់ រហូតមាន​ក្រុមហ៊ុនខ្លះ បានដួលរលំ ដូចជាក្រុមហ៊ុន អ៊ឹមហ្វូន និងស្តាស៊ែល ដោយសារក្រុមហ៊ុនទាំងនោះ គ្មានលទ្ធភាព​ក្នុង​ការប្រកួតប្រជែង។ លោក ណៃ ឧត្តម និស្សិត សេដ្ឋកិច្ច នៃសាកលវិទ្យាល័យ បញ្ញាសាស្រ្តកម្ពុជា បានបញ្ចេញ​ការ​យល់ឃើញរបស់លោកថា «ធម្មតាការប្រកួតប្រជែងតែងតែចង់ឈ្នះ ហើយអ្នកណាក៏ចង់បានតម្លៃថោកដែរ បើ​ក្រុមហ៊ុនណា មានតម្លៃថោក សេវានោះនឹងមានអតិថិជនគាំទ្រកាន់តែច្រើន»។

ទស្សនាវដ្ដីមនោរម្យព័ងអាំងហ្វូ នឹងត្រឡប់មកវិញនៅក្នុងអត្ថបទលើកក្រោយរបស់ខ្លួន ដើម្បីវិភាគឲ្យឃើញថា តើ​ការកំណត់ថ្លៃទូរស័ព្ទដៃរបស់ក្រសួងប្រៃសណីយ៍ និងទូរគមនាគមន៍នេះ មានលក្ខណៈសមស្រប ហើយក្រសួង​បាន​គិតគូរទៅដល់អ្នកប្រើប្រាស់ ដែលជាពលរដ្ឋរបស់ខ្លួនឬអត់៕

---------------------------------
ដោយ៖ ក. ចាន់នីតា - ថ្ងៃទី១០ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ