យ៉ាងហោចណាស់ មនុស្សម្នាក់ស្លាប់ និងប្រាំនាក់ផ្សេងទៀតរងរបួស បន្ទាប់ពីអំពើហិង្សាមួយបានផ្ទុះឡើង នៅ​ថ្ងៃ​សៅរ៍ទី៣០ខែវិច្ឆិកានេះ រវាងក្រុមប្រឆាំង និងក្រុមអ្នកគាំទ្ររដ្ឋាភិបាលលោកស្រី យីងឡាក់ ស៊ីណាវ៉ាត្រា។ នគរបាល​បានស្នើសុំទៅកងទ័ពថៃ នៅថ្ងៃសៅរ៍ដដែលនេះ ឲ្យបញ្ជូនកម្លាំងបន្ថែមដើម្បីពង្រឹកការដើរល្បាត និង​ការពារ​សុវត្តិភាព ខណៈពេលដែលក្រុមបាតុករប្រឆាំងឯកសណ្ឋានពណ៌លឿង គម្រាមចូលទៅកាន់កាប់​វិមាន​រដ្ឋាភិបាល​នៅថ្ងៃអាទិត្យនេះ។

ការប្រឈមមុខ រវាងនគរបាលនិងក្រុមបាតុករប្រឆាំងថៃ។ (រូបថត © Damir Sagolj / Reuters)

នយោបាយថៃ - អ្នកនាំពាក្យនគរបាលជាតិ លោក ពីយ៉ា អ៊ូតាយូ បានឆ្លើយនៅក្នុងសន្និសិទកាសែតមួយ ដែល​ផ្សាយតាមទូរទស្សន៍ថា «កងទ័ពនឹងបញ្ជូនកងកម្លាំងជាច្រើនកង ដើម្បីធ្វើការយាមល្បាតរួម ជាមួយនឹងកង​កម្លាំង​នគរបាល»។ បើតាមអ្នកនាំពាក្យរូបនេះ កងទាហានចំនួនជិត៣ ០០០នាក់ នឹងមក​ធ្វើការរួមជាមួយ​នឹងកងកម្លាំង​នគរបាល ដើម្បីធានាឲ្យបាន នូវ«សន្តិភាព និងស្ថិរភាព»។

តុល្យភាពចុងក្រោយ ដែលបណ្ដាញសារព័ត៌មានទទួលបាននៅម៉ោងនេះ បានឲ្យដឹងថា មនុស្សម្នាក់បានស្លាប់​ដោយសារគ្រាប់កាំភ្លើង ហើយមានមនុស្ស៥នាក់ទៀត បានរងរបួស។ អ្នកទទួលខុសត្រូវផ្នែកសង្គ្រោះបន្ទាន់ នៅ​មន្ទីរពេទ្យ ប៉ង់យ៉ា ជេនេរ័ល (Panya General) បាននិយាយថា «បុរសម្នាក់ទទួលមួយគ្រាប់កាំភ្លើងចំភ្លៅ និងម្នាក់​ទៀតចំពីក្រោយខ្នង»។

ការផ្ទុះអាវុធបានកើតឡើង ខណៈពេលការប្រឈមមុខគ្នា ប្រែក្លាយជាហិង្សាមួយ បង្កឡើងដោយក្រុមប្រឆាំង​លោកស្រីនាយករដ្ឋមន្ត្រី ទៅលើក្រុមមនុស្សដែលពួកគេយល់ថា បានធ្វើដំណើរទៅចូលរួមក្នុង បាតុកម្មគាំទ្រ​រដ្ឋាភិបាល​នៅនឹងពហុកីឡាដ្ឋានមួយ កណ្ដាលរាជធានីបាងកក។ ក្រុមអាវក្រហម ប្រមាណជា ៧ម៉ឺននាក់ ដែល​ត្រូវបានគេស្គាល់ថា សុទ្ធសឹងជាអ្នកគាំទ្ររដ្ឋាភិបាលនោះ បានប្រមូលគ្នានៅថ្ងៃសៅរ៍ទី៣០ ខែវិច្ឆិកានេះ នៅក្នុង​កីឡាដ្ឋាន ដើម្បីបង្ហាញការគាំទ្ររបស់ពួកគ ទៅលោកស្រី យីងឡាក់ ស៊ីណាវ៉ាត្រា។

នៅពេលជាមួយគ្នានោះ ក្រុមប្រឆាំងរាប់រយនាក់ផ្សេងទៀត នៅខាងក្រៅកីឡាដ្ឋាន បានប្រឈមមុខនឹង​ក្រុម​នគរបាល ហើយបានធ្វើការវាយប្រហារ ដោយដុំថ្ម និងកៅអីជ័រ ទៅលើរថយន្ដក្រុង ដែលដឹកក្រុមអាវក្រហម មក​ចូលរួមបាតុកម្មនៅក្នុងកីឡាដ្ឋាន។

រលកចលនាប្រឆាំងទាំងនេះ បានកើតឡើងតាំងពីជាងមួយខែហើយ ប្រឆាំងនឹង​លោកស្រីនាយករដ្ឋមន្ត្រី យីងឡាក់ ដោយសារតែគម្រោងច្បាប់លើកលែងទោសមួយ ដែលស្នើសុំដោយរដ្ឋាភិបាល ត្រូវបានក្រុមអាវលឿងយល់ថា ជា​គម្រោងច្បាប់ដើម្បីធ្វើការលើកលែងទោស អតីតនាយករដ្ឋមន្ត្រី លោក ថាក់ស៊ីន ស៊ីណាវ៉ាត្រា ដែលត្រូវជា​បងប្រុស​បង្កើតនឹងនាយករដ្ឋមន្ត្រីបច្ចុប្បន្ន។ លោក ថាក់ស៊ីន ត្រូវបានបណ្ដេញចេញ​ពីអំណាចដោយសាររដ្ឋប្រហារមួយ នៅ​ឆ្នាំ២០០៦ ហើយបន្ទាប់មកបានរត់គេចចេញពីការផ្ដន្ទាទោស របស់ប្រព័ន្ធយុត្តិធម៌ថៃ ទាក់ទងនឹងរឿងអាស្រូវពុក​រលួយដ៏ចម្រូងចម្រាស់មួយ ដែលរូបលោកផ្ទាល់បានចាត់ទុកថា ជាឆាកល្ខោនរៀបចំឡើង ដោយគូរសត្រូវ​នយោបាយ​​របស់លោក។

ក្រុមប្រឆាំងបានទាមទារឲ្យលោកស្រី យីងឡាក់ នាយករដ្ឋមន្ត្រីបច្ចុប្បន្ន លាលែងចេញពីដំណែង ហើយសុំឲ្យ​បញ្ចប់​នូវ«ប្រព័ន្ធដឹកនាំរបស់ថាក់ស៊ីន» ដែលពួកគេយល់ថា បានកាន់ខ្សែញាក់ឲ្យរដ្ឋាភិបាលទាំងឡាយ ដែលស្និត​នឹង​អតីតនាយករដ្ឋមន្ត្រីរូបនេះ ជាច្រើនអាណត្តិកន្លងមក។ រដ្ឋាភិបាលលោកស្រី យីងឡាក់ បានធ្វើគ្រប់យ៉ាងដើម្បី​ជៀសវាង ការ​ប្រឈមមុខ​រវាង​អាជ្ញាធរ និងបាតុករអាវលឿងទាំងនេះ។ តែផ្ទុយទៅវិញ ក្រុមបាតុករប្រឆាំង បាន​បន្ថែម​ការបង្ករឿង ហើយបានចូល​ទៅកាន់កាប់អាគារមន្ទីរក្រសួងរដ្ឋបាល ជាច្រើនក្នុងសប្ដាហ៍កន្លងមកនេះ៕

------------------------------------------------
ដោយ ៖ កេសរកូល - ភ្នំពេញ ថ្ងៃទី៣០ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ