អ៊ឺរ៉ុប ដាក់កម្ពុជាក្នុង«បញ្ជីខ្មៅ» ហាមការនាំចូលត្រី
គណកម្មាការអ៊ឺរ៉ុប បានស្នើសុំទៅបណ្ដារដ្ឋជាសមាជិក ឲ្យចាត់វិធានការផ្នែកពាណិជ្ជកម្មមួយ ប្រឆាំងប្រទេសកម្ពុជា ដោយលែងឲ្យមានការនាំចូលត្រី ពីប្រទេសក្រីក្រមួយនេះ ដោយសារតែគណកម្មការអ៊ឺរ៉ុប បានរកឃើញថា ប្រទេសកម្ពុជាបានទទួលបរាជ័យ ក្នុងការទប់ស្កាត់ពីការនេសាទខុសច្បាប់។ ជាការហាមឃាត់មួយ ដែលបានប៉ះពាល់ទៅដល់ពាណិជ្ជកម្មនាំចេញ របស់ប្រទេសកម្ពុជា។ តែមន្ត្រីជំនាញជលផលកម្ពុជា បានចាត់ទុកថាការហាមឃាត់នេះ មិនបានប៉ះពាល់អ្វីធ្ងន់ធ្ងរទេ។
រូបភាពជំនួស ស្ដីពីការនេសាទត្រី ដែលមានលក្ខណៈហួសប្រមាណ។ (រូបថត Wikipedia)
បទល្មើសនេសាទ - ទីភ្នាក់ងារសារព័ត៌មានបារាំង (AFP) បានផ្សាយឲ្យដឹងថា គណកម្មការសហគមន៍អឺរុប បានដាក់បញ្ចូលប្រទេសកម្ពុជា ជាមួយនឹងប្រទេសពីរទៀត (ហ្គីណេ និងប៊ែលីស្ស) ទៅក្នុងបញ្ជីខ្មៅនៃក្រុមប្រទេសដែលទទួលបរាជ័យ ក្នុងការទប់ស្កាត់ការនេសាទខុសច្បាប់ ហើយបានស្នើសុំអោយប្រទេសទាំង២៨ ក្នុងសហគមន៍អឺរ៉ុបទាំងមូល អោយបញ្ឈប់ការនាំចូលត្រី ពីប្រទេសទាំងបីខាងលើ។ សេចក្ដីប្រកាសព័ត៌មានមួយរបស់គណកម្មាការអ៊ឺរ៉ុប បានបញ្ជាក់ទៀតថា មិនត្រឹមតែមានការហាមឃាត់ នូវការនាំចូលត្រីប៉ុណ្ណោះទេ តែកិច្ចសហប្រតិបត្តិការដទៃទៀត ដែលទាក់ទងនឹងវិស័យ«ជលផល» ជាមួយនឹងប្រទេសទាំងនេះ ក៏នឹងអាចធ្វើការហាមប្រាមដូចគ្នាដែរ។
គណកម្មាការអ៊ឺរ៉ុបដដែលបានឲ្យដឹងថា ជារៀងរាល់ឆ្នាំការចាប់ត្រីដោយខុសច្បាប់ មានកម្រិតពី១១ ទៅ១៦លានតោន ក្នុងមួយឆ្នាំ ដែលស្មើនឹង១៥% នៃការនេសាទត្រីសរុបនៅលើពិភពលោក ហើយបានគម្រាមយ៉ាងធ្ងន់ធ្ងរ ទៅដល់ការអភិរក្សប្រភេទត្រី និងសេដ្ឋកិច្ចនៃវិស័យជលផលនេះផង។ ប្រទេសចំនួនបីទៀត មានកូរ៉េខាងត្បូង ហ្គាណា និងប្រទេសគៀរ៉ាកាវ ក៏ត្រូវបានគណកម្មការនេះ ដាក់បញ្ចូលទៅក្នុងបញ្ជីត្រៀមបម្រុងមួយ ដែលនឹងឈានទៅធ្វើការហាមឃាត់ក្នុងពេលខាងមុខដែរ។
ស្នងការគណកម្មការ លោកស្រី ម៉ារីយ៉ា ដាម៉ាណាគី (Maria Damanaki) បាននថ្លែងឲ្យដឹងថា «ការសម្រេចចិត្តនេះ បង្ហាញពីការប្ដេជ្ញាចិត្តដ៏មុតមាំរបស់យើង ក្នុងការប្រយុទ្ធប្រឆាំង នឹងការនេសាទខុសច្បាប់»។ តែវាក៏ជាការសម្រេចចិត្ត ដែលត្រូវបានក្រុមអ្នកការពារបរិស្ថានពិភពលោក ហៅកាត់ថា ហ្គ្រិនភីស (Greenpeace) ទទួលស្វាគមន៍អបអរយ៉ាងខ្លាំង ដោយបានប្រកាសថា ជាជំហានដ៏ល្អ ដើម្បីឲ្យមានវិសាលភាពដ៏យូរអង្វែង នៃវិស័យនេសាទ។
សម្រាប់មន្ត្រីរដ្ឋបាលជលផលកម្ពុជា លោក ណៅ ធួក ថ្លែងតាមវិទ្យុសម្លេងក្នុងស្រុកមួយ ឈ្មោះវាយោ បានទទួលស្គាល់ ពីបញ្ហាអសកម្មទាំងឡាយ ថាបានកើតឡើងមែន ដោយសារតែមាននាវាបរទេស មកចុះបញ្ចីនៅស្រុកខ្មែរ ដោយបង់លុយថោកៗ ហើយដោតទង់ជាតិប្រទេសខ្មែរ រួចបង្កបទល្មើសនេសាទលើដែនសមុទ្រ។ បើទោះជាការហាមប្រាមនេះ នឹងមិនប៉ះពាល់ ដល់ការនាំចេញត្រីរបស់ប្រទេសកម្ពុជានោះក៏ដោយ តែលោកណៅ ធួក បានទទួលស្គាល់ថា វាជាការហាមប្រាមមួយ ដែលនឹងប៉ះពាល់ដល់កេរ្តិ៍ឈ្មោះប្រទេសកម្ពុជា។
រហូតមកដល់ថ្ងៃនេះ នៅមិនទាន់មានប្រតិកម្ម ពីមន្ត្រីរដ្ឋាភិបាលកម្ពុជាណាម្នាក់នៅឡើយ តបនឹងទណ្ឌកម្មដាក់ប្រទេសកម្ពុជា ចូលក្នុងបញ្ជីខ្មៅរបស់សហគមអ៊ឺរ៉ុបនេះ៕
-------------------------------------------------
ដោយ ៖ កេសរកូល - ភ្នំពេញ ថ្ងៃទី២៧ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ