យូរខែមកហើយដែល កែវ ច័ន្ទសម្ជស្ស មិនមានដំណឹងល្អ ជុំវិញរឿងមានកូនចៅជាចំណងដៃ ដូចគូស្នេហ៍​ដ៍ទៃទៀត។ ទើប​តែពេលនេះ សាច់ញាតិរបស់នាងបានសង្ស័យថា ប្រហែលជានាងមានកូនទេដឹង ទើបជាប៉ុន្មានថ្ងៃនេះ នាងចេះ​តែ​ខ្យល់ មុខមាត់ស្លេកស្លាំង និងចុះស្គមខណៈដែលនាងបាត់រដូវបីបួនថ្ងៃ ខុសធម្មតានោះ?

តារាចម្រៀង កែវ ច័ន្ទសម្ផស្ស។ (រូបថត MONOROOM.info/ SamNeang)

តារាចម្រៀង - តាមពិតទៅ ការសង្ស័យថា តារាចម្រៀងបែបមនោសញ្ចេតនា ដោយសំឡេងស្រទន់ នាង កែវ ច័ន្ទសម្ជស្ស មានផ្ទៃ​ពោះនេះ បានត្រូវទម្លាយចេញឲ្យដឹង ពីអ្នកម្តាយរបស់តារាស្រគត់ស្រគំម្នាក់នេះផ្ទាល់តែម្ដង។ ម្តាយនាងដែល​មាន​វ័យកាន់តែច្រើន ហើយមានទាំងកូនប្រសាទៀតនេះ ពិតជាចង់បានចៅ ដើម្បីបានប្រលែង​លេង​ជាមួយ។

ក្នុងជំនួបកាលពីពេលថ្មីៗនេះ ម្តាយរបស់តារាចម្រៀង កែវ ច័ន្ទសម្ជស្ស ដែលតែងជូនកូនទៅច្រៀង​រហូតនោះបាន​ថ្លែង ប្រាប់អ្នកសារព័តមាន ទាំងទឹកមុខញញឹមបិទមាត់មិនជិតថា គាត់កំពុងតែមានមន្ទិលថា សម្ជស្សកូនស្រីរបស់​គាត់​«ចាញ់​កូន»។ មូលហេតុដោយសារតែនាង ចេះតែមានទឹកមុខស្លេកស្លាំង និងឧស្សាហ៍ខ្យល់វិលមុខញឹកញាប់ ចុះស្គមប្លែកពីមុន មើលទៅដូចជាមនុស្សចាញ់កូន។

ផ្ទុយទៅវិញ លទ្ធផលវិភាគដែលបានឲ្យដឹង បន្ទាប់ពីយកនាងទៅពេទ្យ​ ដើម្បីឲ្យពេទ្យយកទឹកនោមពិនិត្យ បានឲ្យ​ដឹង​ថា រឿងកូនគេថា«អត់»មានទេ ហើយពេទ្យថា នាងមានជំងឺគ្រុនពោះវៀន។ កាលពីប៉ុន្មានថ្ងៃមុន រាងធូរបន្តិច តារា​អាច​ឡើង​មកច្រៀងបាន ទាំងនៅមានអការៈស្គមស្គាំងប្លែកបន្តិចនោះមែន។

ទោះជាយ៉ាងណាក្តី ក៏អ្នកម្តាយតារាចម្រៀងនៅតែមិនអស់ចិត្តឡើយ ដោយអ្នកស្រីបាន​បន្ថែមថា «ខ្ញុំសង្ស័យតែកូនខ្ញុំ​មាន​កូនទេ ព្រោះនាងបាត់រដូវបីបួនថ្ងៃ ហើយបើតាមតែអ្នកស្រី តាមដានទៅតែ បញ្ហានេះមានទើបតែមាន​ពេលថ្មីៗ​ពេក ទើប​អ្វីៗនៅតែស្រពិចស្រពិលឬមកពីនាងគ្រុនពោះវៀនមែននោះ មានតែរង់ចាំមើលទៅមុខទៀតទើបដឹង តែបើ​ខ្ញុំដឹងច្បាស់​នាងបាត់រដូវមែន»។

អ្វីដែលម្តាយនាងកែវ ច័ន្ទសម្ភស្ស ចង់បាន ...

ម្តាយអ្នកចម្រៀងរូបនេះ បានសម្តែងនូវក្តីសាទរប្រសិនបើកូនអ្នកស្រី​មានកូនមែននោះ ដោយហេតុថានាង កែវ ច័ន្ទសម្ជស្ស​​​ ឈានដល់វ័យ ដែលអាចមានបុត្រភ្ញា សម្រាប់គាត់មើលថែរនោះដែរ។ វាជាដំណឹងល្អ សម្រាប់ក្រុម​គ្រួសារទាំងសងខាង​កាន់តែមានភាពរីករាយបន្ថែមទៀត។ ណាមួយទៀត អ្នកស្រីមិនគិតថា​ត្រូវលាក់រឿងមាន​កូននេះ ដោយសារខ្លួនជា​តារា​នោះ​ទេ ដោយសារតែសមត្ថភាពរបស់នាង កែវ ច័ន្ទសម្ផស្ស ស្ថិតនៅលើទឹកដម​សំឡេង និងការស្រឡាញ់ចូលចិត្ត​ពី​មហាជន​រួចជាស្រេចហើយនោះ។

ចំណែកតារាចម្រៀង កែវ ច័ន្ទសម្ជស្ស ខ្លួននាងវិញ មិនដឹងថានោះជាអាការៈមានកូន ឬយ៉ាងណាទេ ដោយនាង​មិនបាន​ចាប់​អារម្មណ៍។ នាងនិយាយថា «គ្រូពេទ្យ ប្រាប់ថាខ្ញុំមានជម្ងឺគ្រុនពោះវៀនបីបួនថ្ងៃហើយ ទើបតែស្រាល​បន្តិច ក៍ឡើងមក​ច្រៀងតែម្តង ព្រោះតែមានការងារសិល្បៈច្រើនត្រូវតែបំពេញ»។

តាំងពីសម្ជស្សមានប្តីហើយ នាងមិនសូវបង្ហាញមុខមាត់ពិតឲ្យអ្នកគាំទ្រនាងដឹងប៉ុន្មានឡើយ ព្រោះជាទូទៅស្វាមី​ដែលនាង​បានរៀបការជាមួយនោះ ជាបុរសពោះម៉ាយម្នាក់ មានតួនាទីជាថៅកែដាំដំឡូង និងមានចម្ការកៅស៊ូធំ​ល្មម​មួយ នៅខេត្ត​បន្ទាយមានជ័យ ជាប់ព្រំប្រទល់ប្រទេសថៃ ដែលធ្វើឲ្យនាងកម្រឡើងចុះច្រៀងនៅភ្នំពេញ។ ក្រៅពីនោះ សម្ជស្ស​ ក៍មានដី​ធំល្មមមួយនៅម្តុំជម្ពូវ័ន​ ធ្វើជាផ្ទះជួលជាង៨០បន្ទប់ សម្រាប់ឲ្យកម្មករកាត់ដេរជួលនៅទៀត។ យ៉ាង​ហោចណាស់​ក្នុង​មួយ​១ខែ នាងមានចំណូលក្បែរពីរពាន់ដុល្លារ ពីប្រាក់ជួលផ្ទះទាំងនេះ ដើម្បីយកមក​បណ្តាក់ទុន​លើដីចម្ការ​នៅ​បន្ទាយមានជ័យ ជាមួយស្វាមីនាង ដោយរំពឹងថាប៉ុន្មានឆ្នាំទៀត នាងនឹងបានផលពីចម្ការនោះ។

រួមនឹងដំណឹងដែលថា នាងមានបុត្រនោះផង តើនេះ មិនជាសុភមង្គលដែលអ្នកផងចង់បានទេឬ ?

----------------------------------------------
ដោយ៖ សំ នៀង - ភ្នំពេញ ថ្ងៃទី២៦ ខែវិច្ឆិកា ឆ្នាំ២០១៣
រក្សាសិទ្ធិគ្រប់យ៉ាងដោយទស្សនវដ្តមនោរម្យអំាងហ្វូ