បន្ទាប់ពីគណបក្សសង្រ្គោះជាតិ ព្រមានបិទផ្លូវចរចាជាមួយគណបក្សប្រជាជនកម្ពុជា ហើយកំពុងដើរប្រមូល​ប្រជា​ពលរដ្ឋ តាមបណ្តាខេត្តឲ្យមកចូលរួមមហាបាតុកម្មអហិង្សាជាថ្មី ដែលមានទ្រង់ទ្រាយធំ និងអាចមានរយៈពេលយូរ​ជា​មួយ​នឹង​ការ​ដើរចុះតាមផ្លូវ ដើម្បីតវ៉ាចំពោះលទ្ធផលបោះឆ្នោត ដ៏ចម្រូងចម្រាសមកនោះ បានជម្រុញឲ្យមានការ​ព្រួយ​បារម្ភ​ជា​ទូទៅ អំពី​លទ្ធភាពនៃការប៉ះទង្គិចគ្នារវាងភាគីបាតុករ និងកងកម្លាំងរបស់រដ្ឋាភិបាល ដែលអាចបណ្តាល​ឲ្យ​ស្ថានការណ៍​នយោបាយ​កម្ពុជា មានភាពធ្ងន់ធ្ងរមួយកម្រិតទៀត។

លោក កឹម សុខា (ខាងឆ្វេង) និងលោក សម រង្ស៊ី នៅក្នុងសន្និសិទការសែតគណបក្សសង្គ្រោះជាតិ ថ្ងៃទី២០ខែកញ្ញា​ឆ្នាំ២០១៣។ (រូបថត MONOROOM.info/ O. Vary)

នយោបាយ - ប្រធានគណបក្សសង្រ្គោះជាតិ លោក សម រង្ស៊ី ក្នុងដំណើរទៅកាន់ខេត្តព្រៃវែង នៅថ្ងៃទី២០ ខែវិច្ឆិកា ឆ្នាំ​២០១៣ នេះបានថ្លែងប្រាប់សកម្មជនរបស់ខ្លួនថា គណបក្សសង្រ្គោះជាតិនឹងធ្វើចលនា ឲ្យមានមហាបាតុកម្មអហិង្សា​ទូទាំងប្រទេស និងមិនចុះចូលជាមួយរដ្ឋាភិបាលបច្ចុប្បន្ន ឬគណបក្សប្រជាជនកម្ពុជានោះទេ ដរាបណាមិនទាន់មានច្បាប់ ឬយន្តការណាមួយសមស្រប ដើម្បីធានាថាគណបក្សសង្រ្គោះជាតិមានលទ្ធភាពជាក់ស្តែង ក្នុងការការពារប្រជាពលរដ្ឋ។

ប្រធានគណបក្សជំទាស់រូបនេះបញ្ជាក់ថា៖ «បើយើងចូលឥឡូវនេះ យើងគ្មានបានអ្វីទាំងអស់ បើចូលបានតែអំណាច​ក្លែងក្លាយ បានតែអ្វីដែលនៅលើក្រដាស តែការការពារប្រទេសជាតិអត់បាន គេនៅតែកាត់ដីឲ្យយួន ឲ្យយួនចូលស្រុក កាប់បំផ្លាញព្រៃឈើ បណ្តេញប្រជាពលរដ្ឋ បាញ់សម្លាប់អ្នកតវ៉ា(...) ឥឡូវយើងអត់ចូលដាច់ខាត»។

ប្រធានមជ្ឈមណ្ឌលសិទ្ធិមនុស្សកម្ពុជា និងជាអ្នកវិភាគនយោបាយឯករាជ្យកម្ពុជា លោក អ៊ូ វីរៈ បានថ្លែងប្រាប់ទស្សនាវដ្តី​មនោរម្យព័ងអាំងហ្វូ នៅថ្ងៃទី២០ ខែវិច្ឆិកា ឆ្នាំ២០១៣ នេះថា ការបរាជ័យរបស់អ្នកនយោបាយ និងការបែកបាក់ជាតិ វាបង្ក​គ្រោះថ្នាក់ខ្លាំងណាស់ដល់ប្រទេសកម្ពុជា ហើយគេមិនអាចប៉ាន់ប្រមាណជាមុន អំពីផលលំបាក ដែលកើតចេញពីការ​ប្រេះឆានោះបានទេ។

អ្នកវិភាគដដែលនេះបន្តថា តាមរយៈការចរចារវាងគណបក្សប្រជាជនកម្ពុជា និងគណបក្សសង្រ្គោះជាតិកន្លងមក បាន​បង្ហាញថា គណបក្សទាំងពីរកាន់តែឃ្លាតឆ្ងាយពីចំណុចមិនឯកភាពគ្នា និងខិតជិតដល់ចំណុចឯកភាពគ្នាបានច្រើន តែ​ពួក​គេមិនអាចសម្រេចកិច្ចការនេះបានទាំងស្រុង ដែលឆ្លុះបញ្ចាំងថាអ្នកនយោបាយកម្ពុជា ពុំមានភាពចាស់ទុំ​នយោបាយ​គ្រប់គ្រាន់។

ចំពោះគម្រោងមហាបាតុកម្មអហិង្សារបស់គណបក្សសង្រ្គោះជាតិ លោក អ៊ូ វីរៈ បានលើកឡើងថា វាជាសិទ្ធិសេរីភាពរបស់​បុគ្គលគ្រប់រូប និងគ្រប់គណបក្សនយោបាយ នៅក្នុងប្រទេសលិទ្ធិប្រជាធិបតេយ្យ តែគណបក្សសង្រ្គោះមិនគួរបោះបង់ ការ ចរចាជាមួយគណបក្សប្រជាជនកម្ពុជានោះទេ។

ជុំវិញករណីនេះ លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានថ្លែងប្រាប់ទស្សនាវដ្តីមនោរម្យព័ងអាំងហ្វូ កាលពី​ពេលថ្មីៗនេះថា ការចរចានយោបាយ គឺជាបញ្ហាដែលគណបក្សសង្រ្គោះជាតិ ត្រូវធ្វើជាមួយគណបក្សប្រជាជន​កម្ពុជា​នៅ​រដ្ឋសភា ហើយការធ្វើមហាបាតុកម្មអហិង្សា ឬបាតុកម្មយក្ស គឺជាសិទ្ធិរបស់គណបក្សជំទាស់មួយនេះ តែបើបាតុកម្ម​ធ្វើ​ហួសពីរង្វង់ច្បាប់ នោះរដ្ឋាភិបាលនឹងចាត់វិធានការសមស្រប ដើម្បីគ្រប់គ្រងបញ្ហាទាំងនោះ៕

---------------------------------------
ដោយ៖ អ៊ុំ បូរី - ថ្ងៃទី២០ ខែវិច្ឆិកា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ