ចិនពិន័យមន្ត្រីជិត១៧ពាន់នាក់ ពីបទ«ហឺហាបំពានតួនាទី»
មន្ត្រីអ្នករដ្ឋកាចិនសរុបទាំងអស់ ជិត១៧ពាន់នាក់ ត្រូវបានចាប់ឲ្យទទួលពិន័យ ពីបទបានរំលោភលក្ខត្តិកៈថ្មី នៃបក្សកុម្មុយនីសរបស់ប្រទេសនេះ ដែលកំហិតកាន់តែខ្លាំងឡើងឲ្យមន្ត្រីសាធារណៈទាំងអស់ ប្រកាន់អត្តចរិកសមរម្យជាមួយនឹងប្រជាជន។ នេះបើតាមសេចក្ដីរាយការណ៍ របស់សារព័ត៌មានផ្លូវការរបស់ប្រទេសចិន។
លោក ស៊ី ជៀងភីង ប្រធានបក្សកុម្មុយនីស និងជាប្រធានាធិបតីថ្មី នៃប្រទេសចិន។
អំពើពុករលួយ - ទីភ្នាក់ងារសារព័ត៌មានចិនថ្មី បានថ្លែងនៅក្នុងសេចក្ដីរាយការណ៍របស់ខ្លួនថា ក្នុងចំណោមការរំលោភលក្ខត្តិកៈទាំងនោះ មានរាប់បញ្ចូលផងដែរ នូវការចំណាយពិសេសៗ ជ្រុលហួសហេតុ ការប្រើប្រាស់រថយន្ដរដ្ឋហួសតម្រូវការ ឬការធ្វើដំណើរទៅបរទេស ដែលមិនមានប្រយោជន៍នោះជាដើម។ ការត្រួតពិនិត្យទាំងនោះ ត្រូវបានធ្វើដោយម៉ត់ចត់ដោយគណកម្មាធិការកណ្ដាលមួយ ដែលហៅកាត់ជាភាសាអង់គ្លេសថា CCDI ឬអាចពន្យល់ជាខេមរភាសាឲ្យស្រួលស្ដាប់ ជាកងសេនាជនរបស់បក្សកុម្មុយនីស។
តាំងពីដើមខែធ្នូឆ្នាំ២០១២នោះមក ការិយាល័យនយោបាយ នៃបក្សកុម្មុយនីសចិន (PCC) ដឹកនាំដោយ លោក ស៊ី ជៀងភីង (Xi Jinping) បានដាក់ឲ្យអនុវត្តន៍ នូវវិធានការមួយដើម្បីបំបាត់ចំណាយខ្ជះខ្ជាយទាំងឡាយ ជាពិសេសមានដូចជាដាក់ក្រាលកម្រាលព្រំ ការរៀបចំលំអរផ្កាភ្ញី ការជប់លៀងស៊ីផឹកជោគជាំ និងការបង្ហាញភាពសម្បើមអស្ចារ្យ របស់អ្នកទទួលខុសត្រូវនានារបស់បក្ស។
ការរំលោភបំពាននោះ ត្រូវបានរកឃើញជិត១៧ពាន់ករណី នៅក្នុងរយៈពេលតែ១១ខែប៉ុណ្ណោះ ក្នុងខណៈពេលដែលនយោបាយថ្មីរបស់មេដឹកនាំបក្ស ចង់បង្ហាញពីឆន្ទះរបស់បក្ស ក្នុងការដាក់ឲ្យមានការរស់នៅត្រឹមត្រូវមួយ នៃសមាជិកនានារបស់បក្ស។
ជានិច្ចកាល បក្សកុម្មុយនិស្តចិន តែងតែលើកឡើងពីការសន្យា និងការប្តេជ្ញាចិត្តជាបន្តបន្ទាប់។ ប៉ុន្តែការសន្យាទាំងនោះ ច្រើនតែត្រូវគេធ្វើឡើងដើម្បីគ្រាន់តែល្អមើល និងរងការរិះគន់យ៉ាងខ្លាំងក្លា ពីសំណាក់ប្រជាជនចិនរិះគន់ ជាពិសេសទៅលើអាទិភាពហួសកម្រិត ដែលបណ្ដាមេដឹកនាំគ្រាក់ៗចិននានា តែងតែទទួលបាន សំរាប់លទ្ធផលដ៏តិចតួច បើប្រៀបធៀបទៅនឹងតួនាទីពួកគេ៕
-----------------------------------------------
ដោយ ៖ កេសរកូល - ភ្នំពេញ ថ្ងៃទី១៨ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ