ហ៊ុន សែន ព្រមានថៅកែរោងចក្រអេសអ៊ិល ជាថ្នូរនឹងអនុសាសន៍៥ចំណុច
- ដោយ: ដារា រិទ្ធ
- កែប្រែចុងក្រោយ: November 15, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
បើសិនបើថៅកែរោងចក្រ អេសអ៊ិល មិនគោរពតាមអនុសាសន៍ ៥ចំណុច សម្រាប់ការដោះស្រាយវិវាតទេនោះ ថៅកែ រោងចក្ររូបនេះ នឹងអាចរងនូវវិធានការផ្លូវច្បាប់ ពីសំណាក់នាយករដ្ឋមន្ត្រី លោក ហ៊ុន សែន។ អនុសាសន៍ ដែលបានរៀបចំចាត់ចែងឡើងដោយទីស្ដីការគណរដ្ឋមន្ត្រី បានដាក់ចុះមក ក្នុងបំណងបំបាត់វិវាតនៅរោងចក្រ អេសអ៊ិល បន្ទាប់ពីហេតុការណ៍បាតុកម្ម ដែលបានប្រែក្លាយជាហិង្សា យ៉ាងសោកសៅ កាលពីថ្ងៃទី១២ខែវិច្ឆិកាកន្លងមក។
លោក ហ៊ុន សែន នៅមន្ទីររដ្ឋសភាថ្ងៃទី២៤ខែកញ្ញាឆ្នាំ២០១៣។ (រូបថត MONOROOM.info/ O.Vary)
វិវាតការងារ - ព្រះរាជាណាចក្រកម្ពុជា អាចចាត់ទុកថាជាប្រទេសដ៏មានសំណាងមួយ ដែលមាននាយករដ្ឋមន្ត្រីបញ្ចេញ«អនុសាសន៍»មួយសន្លឹកមក ទោះជាត្រឹមត្រូវតាមច្បាប់ ឬយ៉ាងណាក៏ដោយចុះ តែបើអនុសាសន៍នោះ ដាក់បញ្ជាទៅនរណាឲ្យអនុវត្តន៍តាមហើយ មិនអាចថាមានអ្នកប្រឆាំងបានឡើយ។ បើហ៊ានតែរឹងទទឺង នឹងត្រូវរងនូវការចាត់វិធានការតាមផ្លូវច្បាប់ ដូចមានចែងនៅក្នុងអនុសាសន៍នោះស្រាប់។
លិខិតចុះហត្ថលេខាដោយ លោក ឃុន ជិនកេង របស់ទីស្តីការគណៈរដ្ឋមន្ត្រីចុះថ្ងៃទី១៥ ខែវិច្ឆិកានេះ បានឲ្យដឹងថា លោកនាយករដ្ឋមន្ត្រីហ៊ុន សែន បានផ្តល់អនុសាសន៍៥ចំណុច ដើម្បីរកដំណោះស្រាយបញ្ចប់ជម្លោះ រួមមាន បញ្ជាឲ្យក្រុមហ៊ុនទទួលយកតំណាងកម្មករ ១៩នាក់ ឲ្យចូលធ្វើការវិញ ភាគីពាក់ព័ន្ធត្រូវបន្តការសម្រួបសម្រួល រវាងភាគីទាំងពីរបន្តទៀត ដោយសហការជាមួយនឹងដៃគូរពាក់ព័ន្ធ និងកម្លាំងមានសមត្ថកិច្ច ត្រូវបន្តរក្សាសន្តិសុខ និងសណ្តាប់ធ្នាប់នៅរោងចក្រ អេសអិល ឲ្យបានល្អ នោះជាដើម។
នៅលើទំព័រហ្វេសប៊ុកមួយ ដែលមានដាក់ឈ្មោះលោកនាយករដ្ឋមន្ត្រីហ៊ុន សែន ក៏មានសរសេរដែរថា «ការកេងប្រវ័ញ្ចលើកម្លាំងពលកម្មរបស់កម្មករ និង បុគ្គលិកគឺជាការរំលោភសីទ្ឋិ និង ច្បាប់ការងារ។ ក្រុមហ៊ុនត្រូវតែយកចិត្តទុកដាក់ ចំពោះបុគ្គលិកកម្មករកម្មការនី ទាំងនៅពេលមានជំងឺ និងពេលគ្រោះថ្នាក់ផ្សេងៗ ព្រមទាំងមានលក្ខ័ណ្ឌការងារច្បាស់លាស់ រួមទាំងប្រាក់ ឧបត្ថម្ភសមរមរ្យសំរាប់ពួកគេ។»
ក្នុងកិច្ចសម្ភាសមួយទៅឲ្យវិទ្យុសម្លេងវាយោ លោកប៊ុត ប៊ុនឈឿង មន្ត្រីដោះស្រាយវិវាទសម្ព័ន្ឋសហជីពប្រជាធិបតេយ្យកម្មករ កាត់ដេរកម្ពុជា បាននិយាយថា រហូតមកដល់ពេលនេះខាងសហជីព បានទទួលព័ត៌មានមកថា មានចំណារអន្តរាគមន៏ពីសម្តេចនាយករដ្ឋមន្ត្រីហ៊ុន សែន ហើយ ប៉ុន្តែមិនទាន់ដឹងថា ច្បាស់ថាលទ្ឋផលវិជ្ជមាន ឬអវិជ្ជមាននោះទេ ដោយហេតុចាំមើលចម្លើយពីខាងរោងចក្រនោះមកវិញ។
រហូតមកដល់វេលានេះ ទស្សនាវដ្ដីមនោរម្យព័ងអាំងហ្វូ មិនទាន់អាចរកប្រតិកម្ម ឬចម្លើយពីខាងភាគីរោងចក្របាននៅឡើយ ដោយសារការិយាល័យរដ្ឋបាលបានបិទទ្វា និងអ្នកទទួលខុសត្រូវមួយចំនួន ទូរស័ព្ទផ្ទាល់ដៃមិនលើក។
ដំណឹងខាងលើ បើទោះជាអ្នកវិភាគគិតថា វាជាវិធីបញ្ជៀសមួយរបស់លោកនាយករដ្ឋមន្ត្រី ហ៊ុន សែន ពីការក្ដៅក្រហាយរបស់មហាជន ក្នុងករណីបង្ក្រាបបាតុកម្មថ្មីៗនេះក៏ដោយ អាចចាត់ទុកជាដំណឹងល្អមួយ សម្រាបភាគីកម្មករ ដោយសារតែអ្វីៗទំនងជា មានដំណើរទៅមុខជាបណ្ដើរៗហើយ។ ប៉ុន្តែបើសិនបើកិច្ចការសម្របសម្រួលនេះ បានធ្វើឡើងលឿងជាងតែ៣ថ្ងៃមុននេះ ម្លេះមិនមានព្រឹត្តិការណ៍បាតុកម្ម នៅមុខវត្តស្ទឺងមានជ័យ នៅថ្ងៃទី១២ ខែវិច្ឆិកា ឆ្នាំ២០១៣ ដែលធ្វើឲ្យស្ត្រីអ្នកលក់បាយម្នាក់ស្លាប់ ៨នាក់របួស និងជាង៣០នាក់ត្រូវបានចាប់ខ្លួន នៅពេលសមត្ថកិច្ចរារាំងក្រុមកម្មករ មិនឲ្យស្វែងរកអន្តរាគមន៍ពីលោក ហ៊ុន សែន ជាលើកទី២ នោះទេ៕
-------------------------------------------------
ដោយ ៖ ដារា រិទ្ធ - ថ្ងៃទី១៥ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ