រដ្ឋសភា​កម្ពុជា អនុម័ត​ថវិកា​ជាតិ ឬ​ថវិកា​បក្ស?

ច្បាប់ថវិកាជាតិសម្រាប់ការគ្រប់គ្រងឆ្នាំ២០១៤ ត្រូវបានរដ្ឋសភាអនុម័តក្រោមសម្លេង៦៦ លើ៦៦ នៃសមាជិករដ្ឋសភាដែលមានវត្តមានមកពីគណបក្សប្រជាជនកម្ពុជា រួមទាំងលោក នាយករដ្ឋមន្ត្រី ហ៊ុន សែន។ ដោយឡែកសម្រាប់សមាជិកតំណាងរាស្រ្តរដ្ឋសភាមកពីគណបក្សសង្គ្រោះជាតិមិនមានវត្តមានឡើយ។
Loading...
  • ដោយ: អ៊ុម វ៉ារី
  • កែប្រែចុងក្រោយ: November 13, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ច្បាប់ថវិកាជាតិសម្រាប់ការគ្រប់គ្រងឆ្នាំ២០១៤ ត្រូវបានរដ្ឋសភាអនុម័តក្រោមសម្លេង៦៦ លើ៦៦ នៃសមាជិក​រដ្ឋសភា​ដែលមានវត្តមានមកពីគណបក្សប្រជាជនកម្ពុជា រួមទាំងលោក នាយករដ្ឋមន្ត្រី ហ៊ុន សែន។ ដោយឡែកសម្រាប់​សមាជិក​តំណាងរាស្រ្តរដ្ឋសភា មកពីគណបក្សសង្គ្រោះជាតិមិនមានវត្តមានឡើយ។


រដ្ឋសភានិងអ្នកតំណាងរាស្ត្រពីគណបក្សប្រជាជនកម្ពុជា ថ្ងៃទី២៣ខែកញ្ញា មុនអាគាររដ្ឋសភា។ (រូបថត MONOROOM.info/ O.vary)

រាជធានីភ្នំពេញ - រដ្ឋសភាជាតិកម្ពុជាបានធ្វើការអនុម័តលើសេចក្តីព្រាងច្បាប់ថវិកាជាតិសម្រាប់ការគ្រប់គ្រងឆ្នាំ២០១៤ កាលពីថ្ងៃទី១២ ខែវិច្ឆិកា ម្សិលម៉ិញនេះ ជាមួយនឹងការស្នើសុំពីប្រធានរដ្ឋសភា ដោយតំណាងរាស្រ្តសាម៉ី ក្នុងការ​ស្នើ​នូវ​យោបល់ដែលទាក់ទងនឹងច្បាប់ទាំងនោះ តែមិនត្រូវបានតំណាងរាស្រ្តណាមួយលើកមកសួរដេញដោល ឬពិភាក្សា​លំអិត​លើខ្លឹមសារក្នុងមាត្រានីមួយៗ ឬចោទសួរដេញដោលនោះឡើយ។ ផ្ទុយមកវិញកិច្ចប្រជុំរដ្ឋសភា ដែលមាន​តំណាង​រាស្រ្ត​ទាំងអស់មកពីគណបក្សប្រជាជនកម្ពុជាតែមួយនោះ ក្រៅតែពីការលើកដៃគាំទ្រក្នុងការអនុម័ត និងការលើកជាមតិមួយ​ចំនួន​ដែលឆ្ងាយពីប្រធានបទនោះ មានតែការការលើកសរសើរពីរាជរដ្ឋាភិបាល រួមជាមួយនឹងការដឹងគុណចំពោះ​លោក​នាយករដ្ឋមន្ត្រី ហ៊ុន សែន ប៉ុណ្ណោះ។

លោក ជាម យៀប ប្រធានគណៈកម្មការហិរញ្ញវត្ថុធនាគារ និងសវនកម្មនៃរដ្ឋសភា បានធ្វើការបញ្ជាក់ថា សម្រាប់ឆ្នាំ​២០១៤នេះ រដ្ឋាភិបាលគ្រោងនឹងចំណាយប្រាក់ជាង១៤ ២៣៧ ៤៤៩,៣លានលានរៀល ក្នុងនោះមានចំណូលថវិការ​ជាតិចំនួន១៣ ៦៥៥ ៦២៧លានលានរៀល និងថវិការថ្នាក់ក្រោមជាតិ៥៧១៨២២,៣លានលានរៀល។

ប្រធានគណៈកម្មការហិរញ្ញវត្ថុធនាគារ និងសវនកម្មនៃរដ្ឋសភា បានបញ្ជាក់បន្ថែមថា ថវិកាជាតិគ្រោងនឹង​ចំណាយក្នុង​ឆ្នំាំ២០១៤នេះ មានការកើនឡើងជាង១៣% បើធៀបទៅនឹងច្បាប់ថវិកាជាតិសម្រាប់ការគ្រប់គ្រងឆ្នាំ២០១៣។ មន្រ្តីរូប​នេះបានបន្តរថា ទឹកប្រាក់សរុបចំនួន១៤ ២៣៧ ៤៤៩,៣លានលានរៀលក្នុងឆ្នាំ២០១៤នេះ រួមផ្សំជាមួយនឹងកំណើន​សេដ្ឋកិច្ចជាមធ្យម៧% ដែលជំរុញឲ្យរដ្ឋាភិបាលអាចបង្កើនការចំណាយក្នុងគោលបំណងអភិវឌ្ឍន៍ប្រទេសជាតិ។

ជាមួយគ្នានេះតាមគម្រោងទឹកប្រាក់ខាងលើ រាជរដ្ឋាភិបាលត្រូវធ្វើការចំណាយទៅលើវិស័យបួនធំៗ ជាចំបងដូចជា វិស័យរដ្ឋបាលសាធារណៈ វិស័យសង្គមកិច្ច វិស័យសេដ្ឋកិច្ច វិស័យការពារជាតិនិង សន្តិសុខសង្គម ក្នុងក៏បានធ្វើការ​ផ្តោតសំខាន់ទៅលើការកសាងហេដ្ឋារចនាសម្ព័ន្ធនានា ដែលបានខូចខាតដោយសារទឹកជំនន់ និងការដំឡើងនូវប្រាក់​បៀវត្សន៍ជូនមន្ត្រីរាជការផងដែរ។ លោកបានចាត់ទុកថា «ច្បាប់នេះជាឧបករណ៍ ដែលអាចឲ្យរាជរដ្ឋាភិបាល​ប្រែក្លាយ​គោលនយោបាយទៅជា សកម្មភាពជាក់ស្ដែងសម្រាប់ដឹកនាំប្រទេស ស្របតាមយុត្តិសាស្រ្តចតុកោណ របស់រាជ​រដ្ឋាភិបាល​អាណត្តិទីប្រាំប្រកបដោយចិរភាព។»

លោក អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថ្មី បានបញ្ជាក់ និងធ្វើការអះអាងថា ក្នុងនាមលោកជារដ្ខមន្រ្តី​ក្រសួងសេដ្ឋកិច្ច និងហិរញ្ញវត្ថុ ដែលជាសេនាធិការឲ្យរាជរដ្ឋាភិបាលនោះ នឹងខិតខំប្រមូល«ថវិកា»ចូលរដ្ឋឲ្យកាន់​តែច្រើន​ឡើង ដោយមិនមានការប៉ះពាល់ជំរុញឲ្យមានការបង្កើន ឬបន្ថែមពន្ធថ្មីនោះទេ។ លោកបានបន្តថាជាសវាងនូវ​ការកិបកេង អំពើពុករលួយ ការស៊ីសំណូកសូកសូកប៉ាន់ជាដើមនោះ ប្រសិទ្ធិភាពនៃការទប់ស្គាត់ ក្រសូងរដ្ឋមន្ត្រីក្រសួងសេដ្ឋកិច្ច និង​ហិរញ្ញវត្ថុក៏បាន«បញ្ជា»ឬ តម្រូវឲ្យអ្នកជាប់ពន្ធទាំងអស់ ត្រូវធ្វើការបង់ពន្ធតាមរយៈធនាគារវិញ។

យោងតាមសេចក្តីថ្លែងហេតុ នៃសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៤ មានប្រាំជំពូក ១៤មាត្រា និងឧបសម្ព័ន្ធ២៦ទំព័រ រួមទាំងតារាងចំណូល និងចំណាយលម្អិតតាមស្ថាប័នក្រសួងនិមួយៗផងនោះ លោក ជាម យៀប ក៏បានប្រកាស និងបញ្ជាក់ពីចំណាយនៃវិស័យធំទាំងបួនដូចជា វិស័យសង្គមកិច្ចរួមមាន ក្រសួងសុខាភិបាល ត្រូវបាន​គ្រោងចំណាយ ៩៧ម៉ឺន លានរៀល។ ក្រសួងអប់រំយុវជននិងកីឡា គ្រោងចំណាយជាងមួយលាន លានរៀល។ ក្រសួង​សង្គមកិច្ច អតីតយុទ្ធជន និងយុវនីតិសម្បទា គ្រោងចំណាយជាង៥៦ម៉ឺនលានរៀល។ វិស័យសេដ្ឋកិច្ចរួមមាន​ក្រសួង​កសិកម្ម រុក្ខាប្រមាញ់ និងនេសាទ ចំនួនជាង១៣ម៉ឺនលានរៀល ក្រសួងធនធានទឹក និងឧតុនិយម គ្រោងចំណាយ​ជាង​៦១ពាន់លានរៀល ។ វិស័យរដ្ឋបាលទូទៅ គ្រោងចំណាយជាងមួយលានលានរៀល។ ឯវិស័យការពារជាតិ និងសន្តិសុខ​រួមមាន ក្រសួងការពារជាតិត្រូវចំណាយជាងមួយសែនលានរៀល និងក្រសួងមហាផ្ទៃ-សន្តិសុខសាធារណៈ​ចំណាយ​ជាងប្រាំពីរសែនលានរៀល។

ក្នុងកិច្ចប្រជុំរដ្ឋសភានេះឃើញមានតំណាងរាស្ត្របីរូប ដូចជាលោកស្រី ឡោក ខេង លោក មុំ ជីមហ៊ុយ និងលោក ឈាង វុន បានឡើងផ្ដល់យោបល់ជាច្រើន ក្នុងការអនុម័តច្បាប់ផ្សេងៗ រួមទាំងច្បាប់ថវិការនេះផងដែរ តែភាគច្រើន​នៃការ​លើក​ឡើងរបស់ពួកគាត់គឺ គាំទ្រមតិអ្នកនេះ ឬមតិអ្នកនោះយ៉ាងវែងអន្លាយ ដោយមិនមានទាក់ទងនឹងខ្លឹមសារច្បាប់​ដែល​ត្រូវ​អនុម័តនោះឡើយ។ ជាពិសេស គេស្ដាប់លឺមានតែការកោតសរសើរ លោកនាយករដ្ឋមន្ត្រី ហ៊ុន សែន តែប៉ុណ្ណោះ។

ទាក់ទងនឹងបញ្ហានេះ លោក យង់ គឹមអេង ប្រធានមជ្ឈមណ្ឌល ប្រជាពលរដ្ឋដើម្បីអភិវឌ្ឍនិងសន្តិភាព (PDP) បានលើក​ឡើងថា ច្បាប់ដែលបានអនុម័តនេះមិនមានលក្ខណៈពេញលេញ តំណាងឲ្យប្រយោជន៍ជាតិ និងប្រជារាស្រ្តទាំងមូល​នោះទេ។ លោកបានចាត់ទុកថា នេះជាការសម្រេចដោយឯកបក្ស ឬជាការសម្រេចក្នុងនាម«បក្ស» មិនមែនប្រទេសជាតិ ឬប្រជាពលរដ្ឋនោះទេ ព្រោះតែគ្មានការជជែកដេញដោលគ្នា។

លោកបន្តរទៀតថា «ការអនុម័តច្បាន់នេះ បានធ្វើឲ្យមានការមន្ទិល ពីបណ្តាអ្នកវិភាគមួយចំនួន ព្រោះតែគ្មាន​ការដេញ​ដោល ការសួរទល់គ្នា ការជជែក ការតម្រង់ទិសដល់រដ្ឋាភិបាល ដែលបង្ហាញពីការធ្វើតុល្យភាពក្នុងការសម្រេច ឬអនុម័ត​នោះ ទោះបីអ្នកដែលត្រូវជជែកដេញដោលទាំងនោះ ជាតំណាងរាស្រ្តមកពីបក្សតែមួយ ដែលជាបក្សរបស់ខ្លួនក៏ដោយ។» លោកបានបន្ថែមថាក្នុងតំណាក់កាលនេះ ប្រទេសកំពុងស្ថិតក្នុងភាពចម្រូងចម្រាស់បញ្ហានយោបាយ ដែលត្រូវធ្វើស្វែង​រកនូវការស្រុះស្រួលគ្នា ដើម្បីបង្ហាញភាពជឿជាក់ទៅកាន់បណ្តាប្រទេសជាម្ចាស់ជំនួយ។ «ថវិកាដែលអនុម័តទាំងនេះ​មិនមែនយកត្រឹមតែពីពន្ធនោះទេ គេត្រូវយកពីសហគមអន្តរជាតិផងដែរ ដូច្នេះហើយទើបគេត្រូវការ ឲ្យមានការចូលរួម​ពីភាគីបក្សប្រឆាំង ដែលជាបក្សមិនកាន់អំណាច។»

ទស្សនាវដ្ដីមនោរម្យព័ងអាំងហ្វូមិនអាចសុំការបញ្ជាក់ ពីអ្នកនាំពាំក្យគណបក្សសង្គ្រោះជាតិបានទេ ក្នងថ្ងៃនេះ។ តែតាម​កិច្ចសម្ភាសជាមួយវិទ្យុអាស៊ីសេរីកាលពីម្សិលម៉ិញ លោកសុន ឆ័យ បានហៅការប្រជុំសភានេះថា ជាការប្រជុំរបស់​គណបក្សប្រជាជនកម្ពុជា។ តំណាងរាស្ត្រគណបក្សប្រជាជនកម្ពុជា ពិតជាមិនហ៊ានហើបមាត់តវ៉ា ឬជជែកនៅក្នុង​សភា​ដើម្បីប្រយោជន៍ជាតិទេ។ គម្រោងចាយលុយជាតិ ជាការសម្រេចលើមនុស្សមួយក្រុមប៉ុណ្ណោះ។ «ថវិកាលើកនេះជា​ថវិកា​ចម្លែកមួយ ជាថវិកាដែលអនុម័តដោយបក្ស មិនមែនជាថវិកាដែលអនុម័តដោយសភាដែលតំណាងឲ្យប្រជាជាតិខ្មែរនោះ ទេ។ ខ្ញុំមានការសោកស្ដាយថា ថវិកាជាតិហ្នឹងត្រូវ មិនអាចធ្វើឲ្យប្រញាប់អ៊ីចឹងបានទេ គ្មានមូលដ្ឋាននៃការប្ដូរយោបល់ មុននឹងរៀបចំការចាយវាយថវិកាជាតិ ហ្នឹង»។

សូមរម្លឹកថា ក្រៅពីសេចក្តីព្រាងច្បាប់ស្តីពីហិរញ្ញវត្ថុ សម្រាប់ការគ្រប់គ្រងឆ្នាំ២០១៤ ដែលកំណត់ឲ្យរដ្ឋាភិបាល​មាន​លទ្ធិភាព និងសិទ្ធិចាយវាយថវិកាជាតិជាង១៤លានលានរៀល ពិសេសការអនុញ្ញាត​ឲ្យរាជរដ្ឋាភិបាល«ខ្ចីបំណុល»​ពី​បរទេសជាង៩រយលានដុល្លារក្នុងអត្រាការប្រាក់អនុគ្រោះ និងកម្ចីសម្បទាននេះ រដ្ឋសភាក៏បានអនុម័តសេចក្ដី​ព្រាង​ច្បាប់​បីដោយឡែកទៀត ស្តីពីការបង្កើតក្រសួងមុខងារសាធារណៈ ការបង្កើតក្រសួងឧស្សាហកម្ម សិប្បកម្ម និង ការបង្កើត​ក្រសួងរ៉ែ និងថាមពល។

---------------------------------------------------------
ដោយ៖ អ៊ុម វ៉ារី - ភ្នំពេញថ្ងៃទី១៣ ខែវិច្ឆិកា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...