ប្រាសាទព្រះវិហារ៖ រដ្ឋមន្ត្រីការបរទេសកម្ពុជានិងថៃជួបគ្នា មុនប្រកាសសាលក្រម២សប្ដាហ៍
រដ្ឋមន្ត្រីការបរទេសកម្ពុជា លោក ហោ ណាំហុង បានជួបជាមួយសមភាគីថៃ គឺលោក ស៊ូរ៉ាពង្ស តូវីចាក់ចៃគុល (Surapong Tovichakchaikul) នៅថ្ងៃចន្ទទី២៨ខែតុលានេះ ដើម្បីជជែកគ្នាជុំវិញបញ្ហាព្រំដែនរវាងប្រទេសទាំងពីរ។ ជំនួបថ្នាក់រដ្ឋមន្ត្រីការបរទេសនេះ ត្រូវបានគេមើលឃើញថា បានធ្វើឡើងតែពីរសប្ដាហ៍ប៉ុណ្ណោះ មុនការប្រកាសសាលក្រមដោយតុលាការយុត្តិធម៌អន្តរជាតិ ជុំវិញជម្លោះទឹកដីដ៏រំជើបរំជួល រវាងប្រទេសទាំងពីរ ជាប់នឹងប្រាសាទព្រះវិហារ។
សវនាការកាត់ក្ដី នៅថ្ងៃច័ន្ទទី១៥ខែមេសា នៅតុលាការយុត្តិធម៌អន្តរជាតិ។ (រូបថតផ្ដិតពីអេក្រង់វីដែអូ របស់សាលាក្ដី)
រាជធានីភ្នំពេញ - នៅព្រឹក ថ្ងៃទី២៨ ខែតុលានេះ នៅទីក្រុងប៉ោយប៉ែត នៃប្រទេសកម្ពុជា លោក ហោ ណាំហុង រដ្ឋមន្ត្រីការបរទេសកម្ពុជា បានដឹកនាំគណៈប្រតិភូប្រមាណជា ៦ ទៅ៧ រូប ដែលមកពីគណៈកម្មការព្រំដែន តំណាងក្រសួងការពារជាតិ តំណាងក្រសួងមហាផ្ទៃ មេបញ្ជាការយោធភូមិភាគការពារប្រាសាទព្រះវិហារ រួមទាំងអភិបាលខេត្តព្រះវិហារផង មកជួបប្រជុំជាមួយគណៈប្រតិភូថៃ ដែលដឹកនាំដោយរដ្ឋមន្ត្រីការបរទេសថៃលោក ស៊ូរ៉ាពង្ស តូវីចាក់ចៃគុល ។
សេចក្ដីប្រកាសព័ត៌មានមួយ ចុះថ្ងៃទី២៤ខែតុលា របស់ក្រសួងការបរទេសកម្ពុជា បានឲ្យដឹងថាកិច្ចប្រជុំនេះបានផ្តោតសំខាន់លើ ការអភិវឌ្ឍន៍តំបន់ព្រំដែនកម្ពុជា និងថៃ អោយកាន់តែមានការរីកចម្រើនថែមទៀត និងបញ្ហាបើកច្រកព្រំដែនថ្មីមួយចំនួនទៀត ដើម្បីបង្កលក្ខណៈងាយស្រួលក្នុងការចរាចរណ៍ទំនិញ និងប្រជាជននៅតាមព្រំដែនក្នុងតំបន់ទាំងនោះ។ តែទន្ទឹមនឹងនេះ សេចក្ដីប្រកាសព័ត៌មានក៏បានបញ្ជាក់ដែរថា «អង្គប្រជុំក៏នឹងពិភាក្សាការរក្សាឲ្យបាននូវសន្តិភាព សន្តិសុខ និងស្ថិរភាពនៅតាមតំបន់ព្រំដែននៃប្រទេសទាំងពីរ»។
«សន្តិភាព សន្តិសុខ និងស្ថិរភាព» ដែលទំនងជាចង់សង្កត់ធ្ងន់ ទៅលើសភាពការណ៍ ក្រោយពេលប្រកាសសាលក្រម របស់តុលាការយុត្តិធម៌អន្តរជាតិ ដែលនឹងត្រូវធ្វើនៅថ្ងៃទី១១ខែវិច្ឆិការខាងមុខ សម្រេចពីករណីទឹកដី៤,៦គីឡូម៉ែត្រក្រឡា ជាប់ប្រាសាទព្រះវិហារ ដែលប្រទេសថៃបានទាមទារថាជាទឹកដីរបស់ខ្លួន។ អ្នកតាមដានសភាពការណ៍ព្រំដែន បានលើកពីក្ដីកង្វល់ជាទូទៅរបស់ពួកគេ ជុំវិញភាពតានតឹងរវាងប្រទេសទាំងពីរ ថានឹងអាចកើតមានឡើងវិញ ដោយសារតែជារឿយៗមេដឹកនាំកងទ័ពថៃ តែងតែប្រកាសថាពួកខ្លួនអាចនឹង«មិនគោរព» តាមសាលក្រមរបស់ស្ថាប័នយុត្តិធម៌អន្តរជាតិ មួយនេះ ប្រសិនណាជាការសម្រេចប៉ះពាល់ ទៅដល់បូរណភាពទឹកដីរបស់ប្រទេសខ្លួន។
សូមអានអត្ថបទដែលទាក់ទងនឹងប្រធានបទដដែលនេះឡើងវិញ ដោយចុចលើទីនេះ។
ប្រាសាទព្រះវិហាររបស់កម្ពុជា ដែលសាងសង់ឡើងតាំងពីសតវត្សទី១១ ដោយអតីតព្រះរាជាខ្មែរ នៅលើភ្នំដងរែក ដើម្បីឧទ្ទិសទៅសាសនាព្រហ្មញ្ញនោះ ត្រូវបានប្រទេសថៃទន្ទ្រាន ទាមទារកាន់កាប់ម្ដងហើយ នៅក្រោយពេលដែលកម្ពុជាទើបនឹងទទួលបានឯករាជ្យ ពីអាណាព្យាបាលបារាំង។ បន្ទាប់ពីកម្ពុជាបានប្ដឹងទាមទារសិទ្ធិស្របច្បាប់ ដើម្បីគ្រប់គ្រងលើប្រាង្គប្រាសាទបូរាណនោះមក តុលាការអន្តរជាតិយុត្តិធម៌ ដែលជាស្ថាប័នកំពូលរបស់អង្គការសហប្រជាជាតិ បានសម្រេចក្ដីឲ្យកម្ពុជាឈ្នះក្ដី នៅថ្ងៃទី១៥ខែមិថុនាឆ្នាំ១៩៦២ ដោយបង្គាប់ឲ្យថៃដងកងទ័ពចេញពីទីនោះ និងប្រគល់សងមកឲ្យកម្ពុជាវិញ នូវរាល់អ្វីៗដែលខ្លួនបានយក។
ប៉ុន្តែជាថ្មីម្ដងទៀត បន្ទាប់ពីកម្ពុជាបានដាក់បញ្ចូលប្រាសាទបូរាណ ទៅក្នុងបញ្ជីបេតិកភ័ណ្ឌពិភពលោក របស់អង្គការយូនីស្កូនៅខែកក្កដាឆ្នាំ២០០៨ នោះមក ប្រទេសថៃបានបញ្ជូនកងទ័ព ចូលមកកាន់កាប់តំបន់ជុំវិញប្រាសាទព្រះវិហារ។ ថៃ បានចាត់ទុកទឹកដី៤,៦គីឡូម៉ែត្រក្រឡា ជារបស់ខ្លួនដោយសម្អាងទៅលើផែនទីជាឯកត្តោភាគីមួយ ដែលគូសដោយប្រទេសថៃខ្លួនឯង។ ការប្រទាញប្រទង់គ្នានេះ បានបង្កើនភាពតានតឹងរវាងប្រទេសទាំងពីរ រហូតដល់មានផ្ទុះអាវុធខ្លាំងក្លា ហើយជម្រុញឲ្យកម្ពុជាប្ដឹងទៅតុលាការអន្តរជាតិជាលើកទីពីរ (ឆ្នាំ២០១១) ដើម្បីបកស្រាយឲ្យបានច្បាស់ ពីអ្វីដែលសាលាក្ដីរនេះបានសម្រេចក្នុងឆ្នាំ១៩៦២។
តែទោះបីជាយ៉ាងណាក៏ដោយ ក៏មន្ត្រីរដ្ឋាភិបាលនៃប្រទេសទាំងពីរ ក្នុងពេលកន្លងមក តែងតែបានប្រកាសជាប់ជានិច្ចប្រាប់ប្រព័ន្ធផ្សព្វផ្សាយ ពីបំណងរបស់ពួកគេដែលចង់បាន«សន្តិភាព សន្តិសុខ និងស្ថិរភាព»នៅតាមបណ្ដោយព្រំដែនកម្ពុជា-ថៃ។ កាលពីសប្ដាហ៍កន្លងទៅ លោក កុយ គួង មន្ត្រីអ្នកនាំពាក្យរបស់ក្រសួងការបរទេសកម្ពុជា បាននិយាយថា កិច្ចសហប្រតិបត្តិការជាមិត្ត កម្ពុជា-ថៃ នឹងមិនមានផលរមាស់អ្វី ដោយសារសាលក្រមរបស់តុលាការនោះឡើយ។
លោកស៊ូរ៉ាពង្ស តូវីចាក់ចៃគុល ក៏ធ្លាប់បានប្រកាសដែរថា កិច្ចប្រជុំថ្ងៃនេះនឹងអាចឈានទៅដល់ ការ«យោគយល់»គ្នាមួយរវាងប្រទេសទាំងពីរ ហើយលោកបានថ្លែងព្រមានថា ក្នុងករណីថៃចាញ់ក្ដីនោះ អ្នកដែលចង់បង្កឲ្យមានការរំជើបរំជួល នឹងមិនមានជោគជ័យឡើយ។ រីឯនាយករដ្ឋមន្ត្រីថៃ លោកស្រី យីងឡាក់ ស៊ីណាវ៉ាត្រា (Yingluck Shinawatra) បានថ្លែងប្រាប់អ្នកសារព័ត៌មានកាលពីថ្ងៃទី១៧ខែតុលាកន្លងមកថា ក្រុមការងារមួយរបស់ប្រទេសថៃ នឹងមានតួនាទីពន្យល់ប្រជាជនថៃ នៅក្រោយបន្ទាប់ពីសាលក្រមត្រូវបានប្រកាស។ លោកស្រីបញ្ជាក់ច្បាស់ៗថា «បើទោះជាការសម្រេចចិត្តរបស់តុលាការ មានរូបរាងបែបណាក៏ដោយ ក៏យើងត្រូវតែស្មោះស្ម័គ្រជុំវិញដំណើរការសន្តិភាព ហើយប្រទេសទាំងពីរត្រូវជៀសវាងការប្រឈមមុខដាក់គ្នា»៕
--------------------------------------------------------
ដោយ ៖ កេសរកូល - ភ្នំពេញ ថ្ងៃទី ២៨ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ