ស្របពេលគណបក្សសង្រ្គោះសង្រ្គោះជាតិ គ្រោងនឹងផ្តើមធ្វើបាតុកម្មអហិង្សា នៅថ្ងៃទី២៣ ខែតុលា ឆ្នាំ២០១៣ ក្នុងពេល​ដែលស្ថាភាពនយោបាយរបស់កម្ពុជា កំពុងជាប់គាំងនៅឡើយនោះ សាលារាជធានីបានសម្រេចអនុញ្ញាត ឲ្យធ្វើតាម​ការ​ស្នើសុំរបស់គណបក្សជំទាស់មួយនេះ តែបានកំណត់ចំនួនមនុស្សចូលរួម មិនឲ្យលើសពី១ម៉ឺននាក់។ ការកំណត់នេះ ត្រូវ​មន្រ្តីអង្គការសង្គមស៊ីវិលចាត់ទុកថា ជារឿងមិនត្រឹមត្រូវ ប្រសិនបើបាតុកម្មនោះធ្វើឡើងក្នុងលក្ខខណ្ឌអហិង្សា និងមានការ​ជូនដំណឹងជាមុន។

ក្រុមអ្នកគាំទ្រគណបក្សសង្គ្រោះជាតិ នៅទីលានប្រជាធិបតេយ្យ កាលពីថ្ងៃទី០៦ខែសីហាឆ្នាំ២០១៣។ (រូបថត MONOROOM.nfo/ U. Bory)

រាជធានីភ្នំពេញ - លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្ស លីកាដូ បានថ្លែងប្រាប់​ទស្សនាវដ្តីមនោរម្យព័ងអាំងហ្វូ នៅថ្ងៃទី១៩ ខែតុលា ឆ្នាំ២០១៣ នេះថា គេមិនត្រូវកំណត់ចំនួនមនុស្សចូលរួមទេ ប្រសិន​បើបាតុកម្មមូយបានប្រព្រឹត្តទៅ នៅក្រោមការធានាថាមិនមានអំពើហិង្សា និងមានការជូនតំណឹងជាមុន។ ប្រធានផ្នែក​បច្ចេកទេសស៊ើបអង្កេតរូបនេះ បានលើកឡើងថា ប្រទេសប្រជាធិបតេយ្យគួរតែផ្តល់សិទ្ធិ ឲ្យប្រជាពលរដ្ឋ​បញ្ចេញមតិ​របស់​ពួកគេ និងការពារចំពោះការលើកឡើង និងទាមទាររបស់គេ ក្នុងលក្ខខណ្ឌស្របច្បាប់។

លោក អំ សំអាត បញ្ជាក់ថា៖ «ការធ្វើបាតុកម្មដោយសន្តិវិធី បើយកតាមបទដ្ឋានច្បាប់អន្តរជាតិ មិនត្រូវបានបង្រ្កាប​ដោយ​កងកម្លាំងរដ្ឋាភិបាលនោះទេ ផ្ទុយទៅវិញពួកគេត្រូវធានាសន្តិសុខ ដោយកងកម្លាំងរដ្ឋាភិបាល លើកលែងតែការធ្វើ​បាតុកម្ម​ដោយហិង្សា ដែលវាធ្វើឲ្យប៉ះពាល់ ដល់សណ្តាប់ធ្នាប់សាធារណៈ នោះកងកម្លាំងអាចបង្រ្កាបបាន»។

គួរម្លឹកថា បន្ទាប់ពីគណបក្សសង្រ្គោះជាតិ បានដាក់ពាក្យស្មើសុំធ្វើបាតុកម្មអហិង្សា នៅទីលានប្រជាធិបតេយ្យ ចំនួន៣ថ្ងៃ គឺពីថ្ងៃទី២៣ ២៤ និង២៥ ខែតុលា ឆ្នាំ២០១៣ ទៅសាលារាជធានីភ្នំពេញមក គណបក្សសង្រ្គោះជាតិត្រូវបាន​សាលា​រាជធានីភ្នំពេញអនុញាតិឲ្យធ្វើ តែត្រូវកំណត់ចំនួនមនុស្សចូលរួម មិនឲ្យលើសពី១ម៉ឺននាក់ ខណៈគម្រោងរបស់​គណបក្ស​សង្រ្គោះជាតិ អាចមានបាតុករចូលរួម ចន្លោះពី២ម៉ឺននាក់ ទៅ៥ម៉ឺននាក់។

លោក ឡុង ឌីម៉ង់ អ្នកនាំពាក្យ និងលោក កើត ឆែ នាយកទីចាត់ការរដ្ឋបាល សាលារាជធានីភ្នំពេញ មិនអាចសុំធ្វើការ​អត្ថាធិប្បាយចំពោះករណីនេះបានទេ។

តែបើយោងលើលោក ហូ វ៉ាន់ អ្នតំណាងរាស្រ្ត និងជាអ្នកទទូលបន្ទុកសន្តិសុខ របស់គណបក្សសង្គ្រោះជាតិ បានពន្យល់ ថាបាតុកម្មរបស់របស់គណបក្សសង្រ្គោះជាតិ ធ្វើឡើងដោយអហិង្សា ក្នុងគោលបំណងទាមទារយុត្តិធម៌ជូនម្ចាស់ឆ្នោត និង​ការដង្ហែរយកញត្តិ ដែលមានស្នាមមេដៃប្រជាពលរដ្ឋច្រើនជាង១លាននាក់ យកទៅដាក់នៅតំណាង​អង្គការសហ​ប្រជាជាតិ​ប្រចាំកម្ពុជា និងបណ្តាប្រទេសធំៗមួយចំនួនទៀត ដើម្បីឲ្យពួកគេដាក់សម្ពាធលើរដ្ឋាភិបាលកម្ពុជា ឲ្យគោរព​និង​អនុវត្ត​កិច្ច​ព្រមព្រៀងសន្តិភាពទីក្រុងប៉ារីស ឲ្យមានប្រសិទ្ធិភាពឡើងវិញ៕

-------------------------------------------------
ដោយ៖ អ៊ុំ បូរី - ថ្ងៃទី១៩ ខែតុលា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ