ប្រធានគណបក្សសង្រ្គោះជាតិ លោក សម រង្ស៊ី បានអះអាងថា អ្វីដែលលោក ស ខេង មន្រ្តីជាន់ខ្ពស់គណបក្សប្រជាជន បានលើកឡើងកាលពីពេលកន្លងទៅ គឺជាការខុសទាំងស្រុង ដោយនិយាយតែទិដ្ឋភាពមួយជ្រុងតែប៉ុណ្ណោះ។ លោក ស ខេង ដែលបានប្រកាសថា លោក សម រង្ស៊ី បាននិយាយតាមទូរស័ព្ទជាមួយលោកថា លោក សម រង្ស៊ី លែងត្រូវការ​ដំណែង​ប្រធានរដ្ឋសភាហើយ ដែលវាផ្ទុយពីជំហររបស់លោក កឹម សុខា និងលោក យឹម សុវណ្ណ។

លោក កឹម សុខា (ខាងឆ្វេង) និងលោក សម រង្ស៊ី នៅក្នុងសន្និសិទការសែតគណបក្សសង្គ្រោះជាតិ ថ្ងៃទី២០ខែកញ្ញា​ឆ្នាំ២០១៣។ (រូបថត MONOROOM.info/ O. Vary)

ថ្លែងពីសហរដ្ឋអាមេរិក នៅក្នុងបទសម្ភាន៍ជាមួយវិទ្យុអាស៊ីសេរីកាលពីម្សិលមិញ លោក សម រង្ស៊ី មេបក្សប្រឆាំងនៅកម្ពុជា ដែលពេលនេះកំពុងតែបំពេញបេសកម្មការទូតនៅក្រៅប្រទេស បានអត្ថាធិប្បាយថា ការលើកឡើងរបស់​តំណាងគណបក្ស​ប្រជាជន គឺលោក ស ខេង កាលពីពេលថ្មីៗនេះ មិនត្រឹមត្រូវទាល់តែសោះ ដោយនិយាយតែពីបរិបទមួយជ្រុងតែប៉ុណ្ណោះ មិនបានលើកឡើងពីបរិបទនៃបញ្ហារួមនោះទេ។ លោក សម រង្ស៊ី បន្តថា ជំហរបស់លោក គឺនៅតែទាមទារឲ្យមាន​តុល្យភាព​អំណាច និងរកយុទ្ធធម៌ជូនពលរដ្ឋដែលជាម្ចាស់ឆ្នោតជាបញ្ហាចម្បងបំផុត។ តែលោកថា នៅក្នុងអំឡុងពេលអន្តរកាលនេះ នៅពេលបញ្ហាមិនទាន់បានដោះស្រាយ លោកទាមទារឲ្យមានការបែងចែកអំណាច ឲ្យមានតុល្យភាពបណ្តោះអាសន្ន​សិន។

ប្រធានគណបក្សសង្រ្គោះជាតិរូបនេះ បានបញ្ជាក់ថា កាលពីថ្ងៃទី ០៦ ខែតុលាកន្លងទៅ លោកពិតជាបានទូរស័ព្ទលោក ស ខេង មែន តែមិនបាននិយាយពីរឿងបែងចែកអំណាចឡើយ។ក៏ប៉ុន្តែគោលបំណងរបស់លោកពេលនោះ គ្រាន់តែនិយាយ​ពីបញ្ហាធ្វើសមាជបស់គណបក្សសង្គោះជាតិ កាលពីថ្ងៃទី០៦ ខែតុលាកន្លងទៅតែប៉ុណ្ណោះ ដោយសារថា ពេលនោះមេឃ​ភ្លៀង លោក ស្នើឲ្យលោក ស ខេង អនុញ្ញាតឲ្យគណបក្សសង្រ្គោះជាតិ បានធ្វើរោងប្រក់នៅទីលានប្រជាធិបតេយ្យ ដើម្បី​ការពារភ្លៀង ពីព្រោះតែពេលនោះអជ្ញាធរមិនអនុញ្ញាតឲ្យសង់រោងនោះទេ។ លោក សម រង្ស៊ី បានបន្ថែមថា ពេលដែល​លោកនិយាយជាមួយលោក ស ខេង លោកបានប្រាប់ថា ពេលលោកទៅក្រៅប្រទេសភារកិច្ចអ្វីទាំងអស់ត្រូវធ្លាក់លើលោក កឹម សុខា ដែលជាប្រធានស្តីទីគណបក្សសង្រ្គោះជាតិ។ លោកថា បើលោក កឹម សុខា និយាយយ៉ាងណា សម្រេចបែប​ណានោះ វាក៏គឺជាជំហររបស់រូបលោកផងដែរ។

ក្នុងរយៈពេលប៉ុន្មានថ្ងៃមកនេះ ពោលគឺបន្ទាប់ពីលោក សម រង្ស៊ី ចេញទៅក្រៅប្រទេស ព័ត៌មាននៃការខ្វែងគំនិតគ្នា​របស់​មេដឹកនាំគណបក្សសង្រ្គោះជាតិ ត្រូវបានគណបក្សប្រជាជនកម្ពុជាយកមកលាតត្រដាងជាសាធារណៈ ក្នុងគោលដៅ​ដែល​លោក កឹម សុខា ហៅថា ជាល្បិចបំបាក់របស់លោក ហ៊ុន សែន។ ហេតុផលដែលគណបក្សកាន់អំណាចថា គណបក្ស​ប្រឆាំងកំពុងខ្វែងគំនិតគ្នា ដោយយោងទៅលើពាក្យសម្តីរបស់លោក ស ខេង ដែលចេញមុខប្រាប់អ្នកការសែតថា លោក សម រង្ស៊ី បាននិយាយតាមទូរសព្ទជាមួយលោក ដើម្បីពិភាក្សាអំពីការបែងចែកអំណាចនៅក្នុងរដ្ឋសភា ដោយក្នុងនោះ​លោក សម រង្ស៊ី បានប្រាប់រូបលោកថា លែងត្រូវការដំណែងជាប្រធានរដ្ឋសភាទៀតហើយ ដោយសុំឲ្យតែមានសមាជិក​ទាំង១២ នៅក្នុងគណៈកម្មាធិការអចិន្រ្តៃយ៍នៃរដ្ឋសភាមានអំណាចស្មើគ្នា គឺខាងគណបក្សប្រជាជន ៦ និងខាងគណបក្ស​សង្រ្គោះជាតិ ៦ ទៅបានហើយ។ ជំហរលោក សម រង្ស៊ី បែបនេះ ត្រូវបានគណបក្សប្រជាជនអះអាងថា គឺវាខុសពីលោក កឹម សុខា និងលោក យឹម សុវណ្ណ មន្រ្តីកំពូលៗគណបក្សសង្រ្គោះជាតិ ដែលនូវតែរក្សាជំហរចង់បាន​ដំណែងជាប្រធាន​រដ្ឋសភាដដែល មិនប្រែប្រួលនោះទេ។ ការណ៍នេះ ត្រូវបានគណបក្សប្រជាជនហៅថា ជាការខ្វែងគំនិតគ្នានៅក្នុងជួរ​គណបក្សសង្រ្គោះជាតិ។ មិនតែប៉ុណ្ណោះគណបក្សប្រជាជន បានថែមទាំងនិយាយជាការឲ្យគណបក្សប្រឆាំងថា មន្រ្តី​គណបក្សសង្រ្គោះជាតិ គួរតែរកចំណុចឯកភាពគ្នានៅក្នុងបក្សជាមុនសិន មុននឹងជជែកជាមួយនឹងថ្នាក់ដឹកនាំ គណបក្ស​ប្រជាជនកម្ពុជា។

ជុំវិញការបដិសេធរបស់លោក សម រង្ស៊ី ពេលនេះ លោក ស ខេង មន្រ្តីជាន់ខ្ពស់គណបក្សប្រជាជន​មិនអាចទាក់ទង​សុំ​ការ​បកស្រាយបាននោះទេនៅថ្ងៃនេះ។ តែកាលពីពេលថ្មីៗនេះ លោក ស ខេង បានចេញមុខអះអាង​ប្រាប់ ប្រព័ន្ធផ្សព្វ​ផ្សាយ​នានាជាញឹកញាប់ថា លោក សម រង្ស៊ី ពិតជាបាននិយាយបែបនោះមែន ពោលគឺលែងចង់បានដំណែងជាប្រធានរដ្ឋសភា​ទៀតហើយ។

សម្រាប់ក្រុមអ្នកតាមដានស្ថានការណ៍នយោបាយនៅក្នុងប្រទេសកម្ពុជា បានមើលឃើញថា ក្នុងបរិបទប្រទេសកម្ពុជា​បច្ចុប្បន្ននេះ អ្នកនយោបាយ គឺជាមនុស្សដែលគេពិបាកជឿជាទីបំផុត ពីព្រោះថា គ្រប់សកម្មភាពរបស់ពួកគេ ភាគច្រើន​ធ្វើឡើងក្នុងគោលបំណងតែ ដើម្បីចំណេញនយោបាយសម្រាប់បក្សរៀងៗខ្លួន តាមរយៈការចោទប្រកាន់គ្នាទៅវិញទៅមក ដោយធ្វើឲ្យគូប្រជែងម្ខាងទៀតបាត់បង់ប្រជាប្រិយភាព ឬបាត់ការគាំទ្រពីប្រជាពលរដ្ឋ។ ការប្រកួតប្រជែងរបស់ពួកគេ គ្មាន​អ្វីក្រៅពីការបរិហារពីចំណុចខ្សោយរបស់គ្នាទៅវិញទៅមកនោះទេ ឬអាចនិយាយបានថា ចំណុចខ្សោយបក្សគេ គឺល្អ​សម្រាប់បក្សយើង៕

---------------------------------------
ដោយ៖ ជា ធីរិទ្ធ - ថ្ងៃទី ១៨ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ