លោកអភិបាលរងខ័ណ្ឌដូនពេញ ប្រធានសណ្តាប់ធ្នាប់ខ័ណ្ឌ លោកស្រីមន្រ្តីក្រុមប្រឹក្សាសាលាខ័ណ្ឌ និង​លោកអធិការរង​ខ័ណ្ឌដូនពេញ ទាំងបួនរូប ត្រូវបានអតីតប្រជាពលរដ្ឋអ្នកបឹងកក់១១នាក់ ប្តឹងទៅសាលាដំបូងរាជធានីភ្នំពេញ​ពីបទប៉ុនប៉ង​មនុស្សឃាត និងប្លន់ កាលបីថ្ងៃទី២២ ខែកញ្ញា ឆ្នាំ២០១៣។

ក្រុមពលរដ្ឋរងគ្រោះនឹងអំពើហិង្សា បានបង្ហាញពាក្យបណ្ដឹងរបស់ខ្លួន។ (រូបថត MONOROOM.info/ O. Vary)

រាជធានីភ្នំពេញ - ប្រជាពលរដ្ឋប្រមាណជិតមួយរយនាក់បានមកពីសហគមន៍បូរីកីឡា ក្នុងនោះប្រជាពលរដ្ឋដប់មួយនាក់ បានប្តឹងលោក សុខ ពេញវុធ លោក គឹម វុត្ថា លោកស្រី ពេជ្រ សុជាតា និងលោក សៅ ណុល ទៅព្រះរាជអាជ្ញាអម​សាលា​រាជធានីភ្នំពេញ។

ក្នុងពាក្យបណ្តឹងបានបញ្ជាក់ថា អ្នកទាំងបួននាក់ខាងលើនេះ បានដឹកនាំកម្លាំងប្រដាប់អាវុធចម្រុះ​ចំនួនជិត៥០០នាក់ រួម​មានក្រុមប៉ូលីស កងរាជអាវុធហត្ថ មន្រ្តីសាលាខណ្ឌ និងក្រុមសណ្តាប់ធ្នាប់ ក្នុងសម្លៀកបំពាក់ស៊ីវិល បានពង្រាយកម្លាំង​បិទផ្លូវ ជុំវិញរមណីដ្ឋានវត្តភ្នំ នាវេលាម៉ោងជិតដប់។ ពាក្យបណ្តឹងនោះបានសរសេរបន្តរថា ក្នុពេលដែលប្រជាពលរដ្ឋមក​ពីសហគមបឹងកក់ និងបុរីកីឡា ប្រមាណជាង២០នាក់កំពុងតែអង្គុយតាំងសម្មាធិ ដើម្បីសុំសុខសន្តិភាព និងសុំឲ្យមាន​ការ​ដោះស្រាយបញ្ហាដីធ្លី ស្រាប់តែសមត្ថកិច្ចចម្រុះទាំងនោះបានប្រើអំពើហឹង្សាដោយដំបងឆក់ បាញ់គ្រាប់ឃ្លី ទាត់ ធាក់ វាយ​នឹងបំពង់ទីបរុំក្រដាសកាសែត និងបានបិទផ្លូវដោយរនាំងបន្លាលួស មិនឲ្យប្រជាពលរដ្ឋរងគ្រោះនោះចេញទៀតផង។

លោក ចាន់ ពុទ្ធស័ក្ត ជាសាក្សីក្នុងហេតុការណ៍នោះ បានរៀបរាប់ដំណោះរឿងខ្លះៗថាមិនថាអ្នកសារព័ត៌មាន មន្រ្តីអង្គការ​សង្គមស៊ីវិលអ្វីនោះទេ ក្រុមមន្រ្តីទាំងនោះបានរៀបកម្លាំងព័ទ្ធជុំវិញវត្តភ្នំ បាញ់ប្រហារដោយគ្រាប់ឃ្លី វាយសន្ធាប់​មកលើ​ប្រជាពលរដ្ឋដែលកំពុងតែអង្គុយសម្មាធិនោះតែម្តង។ លោកបានបន្តរថា ប្រជាពលរដ្ឋក៏នាំគ្នារើអីវ៉ាន់រត់ ពេលនោះក្រុម​សមត្ថកិច្ច​ទាំងនោះបានហ៊ុំព័ទ្ធវាយ ឆក់ និងបាញ់យកតែម្តង។

សូមអានអត្ថបទមុន ដែលទាក់ទងនឹងប្រធានបទនេះ៖ បង្ក្រាប​អ្នក​តវ៉ា​នៅ​វត្ត​ភ្នំ៖ មន្ត្រី​សិទ្ធិ​មនុស្ស​ថ្កោល​ទោស តែ​អាជ្ញាធរ​ថា​ជា​«កតព្វកិច្ច»។

អ្នកស្រី សុង ស្រីលាភ ក្រោយពីដាក់ពាក្យបណ្តឹង ស្នើរសុំឲ្យតុលាការជួយចាប់ជនដែលបានបង្កហេតុ និងអ្នកបញ្ជា​ក្នុង​ការប៉ុនប៉ងធ្វើមនុស្សឃាតមកលើប្រជាពលរដ្ឋ។ អ្នកស្រីបន្តរថា បើតុលាការកម្ពុជាធ្វើការឈរលើឆន្ទៈមួយ ដែលបំរើ​ប្រជាជន មិនប្រកាន់បក្សពួក នោះគាត់នឹងធ្វើការវែកញែក ស៊ើបអង្កេតលើរឿងក្តីនេះជូនយុត្តិធម៌ដល់ពួកយើង។ តែផ្ទុយ​មកវិញ បើតុលាការមិនឯករាជ្យ និយមបក្សពួក លំអៀងលើអ្នកមានអំណាច នោះយើងនឹងបន្តរនីតិវិធីប្តឹងនេះ ទៅកាន់​តុលាការអន្តរជាតិជាបន្តរទៀត។

អ្នកស្រីបន្ថែមថា ការប្តឹងនេះមិនដាក់ទៅសាលាខ័ណ្ឌដូនពេញនោះទេ ព្រោះថា​ក្រុម​គាត់​ទាំងនោះជាអ្នកប្រព្រឹត្ត ដូច្នេះមិន​អាចធ្វើការសម្រេចសេចក្តីក្នុងរឿងនេះបានទេ។ «ព្រោះពួកគាត់មិនមានចេតនាណាមួយក្នុងការដោះស្រាយនោះទេ។ (...) ពេលយើងទៅរកការអន្តរាគមន៍ មិនមានមន្រ្តីសាលាខ័ណ្ឌណាមកសម្របសម្រួលទេ តែបែរជាថែមកម្លាំង និងរនាំង​បន្លា​លួសមិនឲ្យចូលទៅវិញ។ មិនតែប៉ុណ្ណោះថែមទាំងជេរថា បើចូលមួយសម្លាប់មួយ។ (...) ពួកគេបានប្លន់នូវសម្ភារៈមួយចំនួន ឲ្យត្រឡប់មកវិញតែម៉ូតូ និងទុកទុក។»

ទស្សនាវដ្តីមនោរម្យព័ងអាំងហ្វូ មិនអាចស្នើសុំប្រតិកម្មអត្ថាធិប្បាយពីមន្រ្តីទាំងបួនរូបខាងលើ ចំពោះការចោទប្រកាន់នេះ​តាមទូរស័ព្ទបានទេ។ តែលោក ហ៊ុន សុធី អធិការនគរបាលខណ្ឌដូនពេញ ដែលកំពុងជាប់រវល់ប្រជុំនោះ បាន​​បញ្ជាក់​យ៉ាង​ខ្លី​ពីករណីដែលបង្កឲ្យកើតមានអំពើហិង្សា របស់សមត្ថកិច្ចទៅលើប្រជាពលរដ្ឋនេះ យ៉ាងដូច្នេះថា «អត់ដឹង ខ្ញុំក្តាប់អត់បាន​ផង ក្តាប់អត់បានផង» រួចលោកក៏បានផ្តាច់ទំនាក់ទំនងទៅ។

ចំពោះប្រធានផ្នែកបច្ចេកទេសស៊ើបអង្កេត របស់អង្គការសិទ្ធិមនុស្សលីកាដូ លោក អំ សំអាត ប្រទេសដែលមាននីតិរដ្ឋ និងគោរពលិទ្ធិប្រជាធិបតេយ្យ ក្រោយពីទទួលពាក្យបណ្តឹងរបស់ប្រជាពលរដ្ឋហើយ តុលាការត្រូវធ្វើការកោះ​ហៅភាគី​ពាក់ព័ន្ធទាំងអស់ មកធ្វើការសាកសួរ និងធ្វើការស៊ើបអង្គេតជាចាំបាច់ ដើម្បីស្វែងរកជនដៃដល់​ក្នុងការប្រព្រឹត្តបទ​ល្មើស​នេះ យកមកផ្តន្ទាទោសទៅតាមផ្លូវច្បាប់ លោកបន្តរថា ករណីនេះវានឹងក្លាយជា«គំរូ»មួយ ដើម្បីកុំឲ្យកើតមាននូវករណី​អំពើហិង្សារបៀបនេះនាពេលខាងមុខទៀត តែផ្ទុយទៅវិញបើតុលាការមិនចាត់ការនោះ និទណ្ឌភាពនៅតែមានជាបន្តររហូត។

លោក អំ សំអាត បានថ្លែងឲ្យដឹងទៀតថា «បើបណ្តឹងមានដាក់ឈ្មោះចំបុគ្គលណាម្នាក់ហើយនោះ តុលាការត្រូវតែហៅ​បុគ្គលនោះមកសាសួរអំពីមូលហេតុ និងអ្នកដែលពាក់ព័ន្ធ តែមិនមែនជាការចោទប្រកាន់ភ្លាមនោះទេ។ តែបើមិនមែន​អ្នក​ដែលមានឈ្មោះក្នុងនោះទេ ត្រូវធ្វើការស៊បអង្កេតរកអ្នកដែលពាក់ព័ន្ធ។ (...) អ្នកដែលជាមន្រ្តីរាជការ នៅក្នុងចំណោមដែល​ប្រជាពលរដ្ឋបានស្គាល់ និងចង្អុលបង្ហាញនោះ តុលាការត្រូវតែហៅមកធ្វើការសួរនាំទាំងអស់ ដើម្បីឈានទៅ​រកការ​ចាប់​ខ្លួនជនដែលប្រព្រឹត្តបទល្មើសពិតប្រាដក៕»

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១១ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ