រដ្ឋាភិបាលកម្ពុជាហាក់មិនបានសម្តែងការបារម្ភសោះឡើយ ចំពោះប្រទេសមហាអំណាចណាមួយ ដែលចង់ដក​ការជឿ​ទុក​ចិត្ត និងចង់ផ្តាច់ជំនួយមកលើប្រទេសកម្ពុជា តាមរយៈការបញ្ចុះបញ្ចូលរបស់មេបក្សប្រឆាំង លោក សម រង្ស៊ី។ មន្រ្តី​ជាន់​ខ្ពស់រដ្ឋាភិបាល បានអះអាងថា រដ្ឋាភិបាលអាចរស់បាន ដោយមានសម្ព័ន្ធមិត្តចិនជួយជ្រោមជ្រែង។ ជាមួយនឹងការ​លើក​ឡើងនេះ អ្នកវិភាគលោក សុខ ទូច បានលើកឡើងថា បើកម្ពុជាអោបជើងចិន នឹងមានវាសនាដូចភូមាជាក់ជាមិនខាន។

ទិដ្ឋភាពមួយក្នុងផ្នែកខាងលិចនៃប្រទេសភូមា ក្រោយអំពើហឹង្សាទៅលើជនជាតិរ៉ូហឺយ៉ា។ (រូបថត © Soe Zeya Tun/Reuters)

រាជធានីភ្នំពេញ -  មន្រ្តីជាន់ខ្ពស់រដ្ឋាភិបាល ថ្លែងប្រាប់ប្រព័ន្ធផ្សព្វផ្សាយក្នុងស្រុក និងក្រៅស្រុកនានា​ ស្ទើររៀងរាល់ថ្ងៃ​ដោយបញ្ជាក់ថា កម្ពុជាមានការរីកចម្រើនខ្លាំងណាស់ និងខ្លួនមិនខ្វល់ខ្វាយពីជំនួយបរទេសនោះទេ ជាពិសេស​គឺជំនួយ​របស់អាមេរិកតែម្តង ដោយចង់ផ្តាច់ជំនួយមកកម្ពុជាក៏បានដែរ។ មន្រ្តីទាំងនោះ បានលើកសរសើរពីមហាមិត្តចិន​របស់​ខ្លួន​ថា កម្ពុជាអាចរស់បាន ឲ្យតែមានមហាណាចចិននេះ ជួយផ្តល់ជំនួយជួយជ្រោមជ្រែង និងរក្សានូវភាពជាសម្ព័ន្ធមិត្តជិតដិត​ជាមួយប្រទេសនេះ ។

ជុំវិញការលើកឡើងរបស់មន្រ្តីកំពូលៗរដ្ឋាភិបាលនេះ លោក បណ្ឌិត សុខ ទូច អ្នកវិភាគនយោបាយឯករាជ្យនៅកម្ពុជា បាន​និយាយយ៉ាងខ្លីថា «ប្រសិនបើរដ្ឋាភិបាលកម្ពុជា ទៅអោបជើងចិនមែន នោះកម្ពុជានឹងដូចភូមាពីមុនដែរ​ជាក់ជា​មិន​ខាន»។ លោកថា ភូមា អាងចិននឹងហើយ ដែលភូមាធ្លាក់ខ្លួនក្រ។ ម្យ៉ាងវិញទៀតអ្នកវិភាគរូបនេះ បានគូសបញ្ជាក់ថា នៅក្នុង​ប្រវត្តិ​សាស្រ្តខ្មែរអប់ជើងចិននឹងហើយ ដែលនៅក្នុងសម័យកម្ពុជាប្រជាធិបតេយ្យ ប្រជាជនខ្មែរជាង ១ លាន ៧ សែននាក់។

ទស្សនាវដ្តីមនោរម្យព័ងអាំងហ្វូ នៅមិនអាចសុំការបកស្រាយ​ ពីមន្រ្តីរដ្ឋាភិបាលបានទេនៅថ្ងៃនេះ។

កាលពីពេលកន្លងទៅ លោក ហ៊ុន សែន ក៏ធ្លាប់បាននិយាយដែរថា ចិនផ្តល់ជំនួយដល់កម្ពុជា ធ្វើឲ្យរដ្ឋាភិបាលលោកស្រួល​ចាយបំផុត ដោយមិនមានលក្ខខណ្ឌអ្វី ដូចជាជំនួយរបស់សហរដ្ឋអាមេរិក ឬបណ្ដាប្រទេសនៅសហគមន៍អ៊ឺរ៉ុបឡើយ។  លោក ហ៊ុន សែន ថាជំនួយមកប្រទេសបស្ចឹមលោក​ពិបាកណាស់ គឺជួយកម្ពុជាភ្ជាប់មកជាមួយនឹងលក្ខខ័ណ្ឌជាច្រើន។ ជាមួយគ្នានេះ ដែលកាលពីពេលកន្លងទៅ លោកប្រមុខ​ការទូតកម្ពុជា លោក ហោ ណាំហុង ក៏បាននិយាយដែលថា បើ​អាមេរិកចង់កាត់ជំនួយដល់កម្ពុជា ក៏កាត់ទៅកម្ពុជាមិនខ្វល់នោះទេ។ មន្រ្តីជាន់ខ្ពស់​កម្ពុជាមួយរូបទៀតលោក ជាម យៀប ដែលលឺសំឡេងតាមប្រព័ន្ធផ្សព្វផ្សាយមិនដែលដាច់នោះ ក៏ធ្លាប់បាននិយាយ​ដែរ​ថា កម្ពុជាមានសម្ព័ន្ធមិត្តចិន ចាំជួយ​​ជ្រោម​ជ្រែងរឹងមាំ ហើយធ្វើឲ្យកម្ពុជាអាចរស់បាន។

ជាការពិតណាស់ប្រទេសចិន ត្រូវបានគេមើលឃើញថា ជាអ្នកផ្តល់ជំនួយច្រើនជាងគេដល់ កម្ពុជា ហើយជំនួយទាំងនោះ ភាគច្រើនមិនបានភ្ជាប់លក្ខខ័ណ្ឌមកជាមួយនោះទេ ដែលវាផ្ទុយពីជំនួយរបស់អាមេរិក។ ប៉ុន្តែសម្រាប់ក្រុមអ្នកសិទ្ធិ​មនុស្ស​នៅកម្ពុជា មិនសូវពេញចិត្តនឹងជំនួយរបស់ចិននោះទេ ដោយពួកមើលឃើញថា ជំនួយចិននេះ ថ្វីដ្បិតតែគ្មានលក្ខខណ្ឌ តែ​បង្កប់នូវមហិច្ចតាលោភលន់មកជាមួយ សំឡឹងឃើញផលប្រយោជន៍ណាមួយចង់ស្រូបយកទៅវិញ ជាពិសេស​មិន​បាន​ធ្វើឲ្យមានការប្រសើរឡើង ក្នុងការគោរពច្បាប់ និងការគោរពសិទ្ធិមនុស្សនៅកម្ពុជាឡើយ។

ដោយឡែកខុសពីប្រទេសកម្ពុជា ប្រទេសភូមាដែលទើបនឹងងាកខ្លួនចេញ ពីរបបដែលគ្រប់គ្រងដោយ​មេដឹកនាំ​យោធា​«ផ្ដាច់ការ»នោះ កំពុងតែធ្វើនយោបាយបើកជើងមេឃមួយ ហើយធ្វើជំហានដើរទៅមុខតាមបែបប្រជាធិបតេយ្យ និង​ខិតខំ​បោះដៃ​របស់ខ្លួន​ទៅរកសហគមន៍អន្តរជាតិ។ ដោយសារតែនយោបាយកែទម្រង់ ដ៏គួរឲ្យលើកទឹកចិត្ត​របស់ប្រទេស​នេះ បណ្ដា​ប្រទេសបស្ចឹមលោកជាច្រើន បានលើកចេញដូចគ្នាដែរ នូវទណ្ឌកម្មនយោបាយ និងសេដ្ឋកិច្ច ដែលបាន​ដាក់​ហ៊ំព័ទ្ធ​ប្រទេស​នេះ ក្នុងពេលកន្លងមក។ ការហ៊ុំព័ទ្ធសេដ្ឋកិច្ចនិងនយោបាយ ដែលមានរយៈពេលរាប់សិបឆ្នាំ និងបានរួមរិទ្ធ​ប្រទេស​ភូមា ឲ្យ​នៅតែជាប្រទេសមួយ ដែលក្រីក្រ និងអន់ថយជាងគេក្នុងពិភពលោក បើទោះជាប្រទេសនេះ ធ្លាប់​ជា​«ក្លើម្រាស់»​​ចាក់​ទឹកមិនលេច របស់ប្រទេសចិនក៏ដោយ។

សម្រាប់អ្នកឃ្លាំមើលស្ថានការណ៍សង្គមកម្ពុជា បានយល់ថា កម្ពុជាមិនអាចមានទំនាក់ទំនងតែជាមួយចិន ​ដែលជាប្រទេស​កុំម្មុយនីសនោះទេ។ ម្យ៉ាងវិញទៀតសម្រាប់សេដ្ឋកិច្ចកម្ពុជា ក៏ពឹងផ្អែកលើបស្ចឹមលោកផងដែរ ដោយសារថា ក្នុងមួយឆ្នាំៗ សម្រាប់វិស័យកាត់ដេរកម្ពុជា បាននាំទៅលក់នៅលើទីផ្សារសហរដ្ឋអាមេរិក និងអ៊ឺរ៉ុប​រាប់ពាន់​លានដុល្លារអាមេរិក។ ដូច្នេះ សម្រាប់ភាសាដែលនិយាយថា មិនខ្វល់ពីអាមេរិក ឬអ៊ឺរ៉ុប ដោយពឹងផ្អែកតែទៅលើប្រទេសចិននោះ ត្រូវបានគេរិះគន់ថា គឺ​ជាការ​និយាយមិនជឿនលឿន និងដោយមិនចេះប្រើពាក្យការទូត ដែលតាមធាតុពិតទៅរដ្ឋាភិបាលកម្ពុជាខ្លួនឯង បាន​ភ័យ​ខ្លាច​នឹងរឿងនេះជាទីបំផុត៕

---------------------------------------------------------
ដោយៈ ជា ធីរិទ្ធ - ភ្នំពេញថ្ងៃទី ១១ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ