ការជួបជុំរបស់អង្គការសង្គមស៊ីវិល ព្រះសង្ឃ និងប្រជាពលរដ្ឋនៅទូលលោកយាយដូនពេញ (ក្បែរវត្តភ្នំ) ទាំងនេះ ហើយ​បានដង្ហែក្បួនទៅកាន់សាលារាជធានីនោះ ត្រូវ​បាន​អាជ្ញាធរសាលារាជធានីភ្នំពេញ ធ្វើការរំខាន ដោយបានចោទប្រកាន់​ថាពួកគេ «រំលោភបំពានច្បាប់ និងកិច្ចប្រជុំកាលពី​ថ្ងែ​ទី៨ ខែតុលានេះ»។

រូបសំណាក់ផ្ទះដែល ក្រុមពលរដ្ឋបានលើកមកបង្ហាញក្នុងទិវាសិទ្ធិលំនៅដ្ឋាន ថ្ងៃទី១០ខែតុលាឆ្នាំ២០១៣។ (រូបថត MONOROOM.info/ O. Vary)

រាជធានីភ្នំពេញ - ព្រឹកថ្ងៃព្រហស្បតិ៍ទី១០ខែតុលានេះ អង្គការសិទ្ធិលំនៅដ្ឋាន ប្រជាពលរដ្ឋដែលរងការបណ្តេញ ពី​លំនៅដ្ឋាន​ដោយបង្ខំរួមមានសហគមន៍បុរីកីឡា បឹងកក់ ៣៤៧ ថ្មគោលនិងសហគមន៍ជាច្រើនទៀត ដែលឡើងមក​តាម​បណ្តាខេត្តនានា ប្រមាណជិតមួយពាន់នាក់ រួមទាំងព្រះសង្ឃផង នៅមុខរូបសំណាកលោកយាយដូនពេញ (វត្តភ្នំ ) ដើម្បី​ដង្ហែរយកញ្ញត្តិដែលស្នើសុំ ឲ្យរដ្ឋាភិបាលថ្មីដោះស្រាយលើបញ្ហាដីធ្លី និងផ្ទះសម្បែង។ ក្រុមអ្នកចូលរួមដែលមានចំនួនជិត​១០០០នាក់នោះ បានលើកបដារួមទាំង​ពាក់​អាវយឺតស និងមានចងក្រណាត់ក្រហមនៅក្បាលផង តាមរយៈតំណាង​សហគមន៍​នីមួយៗ ឡើងថ្លែង​ការណ៍ពីការទុក្ខលំបាកដោយសារតែជម្លោះដីធ្លី និងការបណ្តេញចេញដោយបង្ខំនោះ។

ស្របពេលនឹងការឡើងរបស់ប្រជាពលរដ្ឋ ដែលរងទុក្ខលំបាកក្នុងការរស់នៅ ដោយ​គ្មានការយកចិត្តទុកដាក់ពីអាជ្ញាធរ​មូលដ្ឋាន ដើម្បីបង្ហាញពីទុក្ខលំបាកទាំងនេះឲ្យរដ្ឋាភិបាលឲ្យបានដឹង និងជួយ​ដោះ​ស្រាយនូវបញ្ហា និងវិបត្តនានានោះ ក្រុមអាជ្ញាធរ ដែលមានកម្លាំងសមត្ថកិច្ចចម្រុះ រួមទាំងកម្លាំងស៊ី​ឈ្នួល​ (របស់ក្រុមហ៊ុន) ដែលមានចំនួនមិនតិចជាងចំនួន​ប្រជាពលរដ្ឋនោះឡើយ បានដាក់ពង្រាយពេញមួយចំហៀងវត្តភ្នំខាងត្បូង។ ក្រុមសមត្ថកិច្ចទាំងនោះ ថែមទាំងបាន​ស្រែក​បំពងសម្លេង តាមឃោសនៈស័ព្ទប្រណាំងប្រជែង ជាមួយនឹងការស្រែកទាមទារបស់ប្រជាពលរដ្ឋទាំងនោះផង។

ប៉ះពាល់សណ្ដាប់ធ្នាប់ និងមុខមាត់ដ៏ស្រស់បំព្រងរបស់រាជធានី?

ក្រុមអាជ្ញាធរទាំងនោះបាននិយាយឲ្យក្រុមប្រជាពលរដ្ឋ និងអង្គការសង្គមស៊ីវិលធ្វើការចាកចេញពីទីទួលនេះ ទៅធ្វើនៅ​កន្លែងណាផ្សេង ឬនៅការិយាល័យអង្គការរបស់ខ្លួន ដើម្បីបញ្ជៀសការកកស្ទះចរាចរ របៀបរៀបរយសាធារណៈ និងដើម្បី​មុខមាត់​ដ៏ស្រស់បំព្រងរបស់រាជធានីភ្នំពេញ និងកុំឲ្យមានការភិតភ័យដល់ភ្ញៀវទេសចរជាតិ និងអន្តរជាតិដែលមក​ទស្សនា​នៅរមណីដ្ឋានវត្តភ្នំនេះ។

លោក ឡៅ ម៉ុងហៃ អ្នកវិភាគឯករាជ្យដែលមានវត្តមានផ្ទាល់នៅទីនោះដែរ បាននិយាយបញ្ជាក់ តាមរយៈអ្នកការសែត​ថា ចំពោះការជួបជុំរបស់ប្រជាពលរដ្ឋទាំងនេះ មិនមានអ្វីដែលនាំឲ្យខូចសណ្តាប់ធ្នាប់សាធារណៈនោះទេ ព្រោះពួកគាត់​អង្គុយ​មួយកន្លែងនៅទីទួលមួយខ្ពស់ និងផុតពីការធ្វើចរាចររបស់ប្រជាពលរដ្ឋផ្សេងៗទៀត។ លោកបន្តរថាផ្ទុយទៅវិញ គឺ​អាជ្ញាធរ​ខ្លួនឯងទេ ដែលជាអ្នកធ្វើឲ្យខូចសណ្តាប់ធ្នាប់សាធារណៈ ដោយស្រែករំខានដល់ការជួបជុំក្នុងទិវាសិទ្ធលំនៅដ្ឋាន ដែល​ប្រទេសប្រកាន់របបប្រជាធិបតេយ្យនៅលើពិភពលោកបានធ្វើ។ ការពង្រាយកម្លាំងពេញមួយចំហៀង​ប៉ែកខាងត្បូងនៃ​រមណីដ្ឋានវត្តភ្នំ ការចតរថយន្តរបស់ក្រុមសត្ថកិច្ច និងរថយន្តដឹកក្រុមទាហានទាំងនេះឈប់គ្មានសណ្តាប់ធ្នាប់ មិនតែ​ប៉ុណ្ណោះបានដាក់រនាំងបាំងផ្លូវ ដោយគ្មានច្បាប់ទម្លាប់ទៀតផង។

ជាមួយគ្នានេះលោក សៀរ ភារម្យ ប្រធានសម្ព័ន្ធក្រុមការងារសិទ្ធិលំនៅឋាន បានបញ្ជាក់ថាការជួបជុំនេះ ជាការប្រារព្វ​ទិវា​សិទ្ធិលំនៅដ្ឋានអន្តរជាតិលើកទី២៨ ដែលទូទាំងពិភពលោកបានឲ្យសារៈសំខាន់។ លោកបន្តរថា «បើសិនជា​ការជួបជុំ​នេះធ្វើនៅការិយាល័យនោះ មិនចាំបាញ់ជូនដំណឹងមកសាលារាជធានីនោះទេ ម្យ៉ាងទៀត​នៅគ្រប់កន្លែងឯកជន​មិន​ត្រូវ​បានអនុញ្ញាតិជួលឲ្យនោះទេ ព្រោះតែក្រុមអាជ្ញាធរចេះតែទៅគំរាមកំហែង និងពេលខ្លះទៀត ក្រុមអាជ្ញាធរទាំងនោះ​ចុះទៅ​បិទផ្ទាល់តែម្តង យើងធ្លាប់បើមានបទពិសោធជាច្រើនសារមកហើយ។»

សូមរម្លឹកថាក្នុងការប្រារព្វទិវាសិទ្ធិលំនៅដ្ឋាននាព្រឹកថ្ងៃទី១០ ខែតុលា ឆ្នាំ២០១៣ ក្រៅពីក្រុមកម្លាំងសមត្ថកិច្ចចម្រុះ​ជិត​មួយពាន់នាក់ដែលប្រដាប់ដោយដំបង និងខែល មានឡានទាហាន មានឡានទ្រុងសម្រាប់ដាក់មនុស្ស តែមិនមាន​ឡាន​ពេទ្យ និងមិនមានការសម្រួលដល់ការជួបជុំរបស់ប្រជាពលរដ្ឋ ដូចដែលមានចែងក្នងច្បាប់នោះទេ។

ទោះបីមានការរារាំងពីក្រុមសមត្ថកិច្ចយ៉ាងណាក៏ដោយ ការដង្ហែរញ្ញត្តិ​របស់ប្រជាពលរដ្ឋបានមកដល់មុខសាលារាជធានី​ដូចបំណងនាវេលាម៉ោងជាង១០ព្រឹក។ នៅមុខសាលារាជធានីភ្នំពេញ នោះមានការប៉ះទង្គិចបន្តិចបន្តួចរវាងក្រុមអ្នកតវ៉ា និងសមត្ថកិច្ចដែលនាំឲ្យមានការកក ស្ទះចរាចរណ៍យ៉ាងខ្លាំង។ ការច្រានទៅ ច្រានមក រវាងក្រុមសមត្ថកិច្ច ព្រះសង្ឃ និង​ប្រជាពលរដ្ឋ និងការរូញច្រានរបស់សមត្ថកិច្ចមកលើប្រជាពលរដ្ឋ ដើម្បីបើកផ្លូវនោះ បានធ្វើឲ្យមានការប៉ះទង្គិច​ដៃជើង​បន្តិចបន្ទួច និងមានអ្នករបួសមួយចំនួនតូច។ ហេតុការណ៍នេះបានបណ្តាលឲ្យព្រះសង្ឃមួយអង្គមានរបួសលើផ្ទៃមុខ និង​ស្រ្តីពីរនាក់រងរបួសដោយការវាយនឹងដំបងរបស់ក្រុមសមត្ថកិច្ចម្នាក់របួសត្រង់ដៃ និងម្នាក់ទៀតរបួសត្រង់ជើង។

សូមបញ្ជាក់ថាការជួបជុំគ្នាខាងលើនេះ មិនត្រូវបានអនុញ្ញាតិ និងមានការឯកភាពពីអាជ្ញាធរសាលារាជធានីភ្នំពេញឡើយ ក្នុងជំនួបប្រជុំជាមួយតំណាងប្រជាពលរដ្ឋ និងសាលារាជធានីកាលពីថ្ងៃទី៨ ខែតុលានេះ។

----------------------------------------------
ដោយៈ អ៊ុម វ៉ារី - ថ្ងៃទី១០ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ