ពលរដ្ឋចំនួនបីនាក់ ដែលមានមុខរបរ និងរស់នៅក្នុងតំបន់ខុសៗគ្នា បានទម្លាយពី​អាថ៌កំបាំង​នេះ ប្រាប់​ទស្សនាវដ្ដី​​មនោរម្យ.អាំងហ្វូ ថាពួកគេបានឃើញវត្តមានលោក ឈូក បណ្ឌិត នៅក្នុងគេហដ្ឋានលោកស្រី ម៉ែន សំអន ឧបនាយក​រដ្ឋមន្រ្តីប្រចាំការ និងជារដ្ឋមន្រ្តីក្រសួងទំនាក់ទំនងរដ្ឋសភា-ព្រឹទ្ធសភា។ បុរសម្នាក់ដែល​ជា​មន្ត្រីមួយរូប ធ្លាប់​មាន​វត្តមាន​ចេញចូល នៅក្បែរគេហដ្ឋានអ្នកស្រីឧបនាយករដ្ឋមន្រ្តី បានធ្លាយរឿងនេះ​ដោយ​ផ្ទាល់មាត់ប្រាប់ទស្សនាវដ្ដី តែលោក​មិនបានអនុញ្ញាត ឲ្យថតសម្លេងនោះទេ ក្រោមហេតុផលសុវត្ថិភាព។

ដោយឡែកពលរដ្ឋម្នាក់ ដែលមានមុខរបរជាអ្នករត់ម៉ូតូឌុប បានប្រាប់មកទស្សនាវដ្តីមនោរម្យ.អាំងហ្វូថា លោក​បាន​ឃើញវត្តមានលោក ឈូក បណ្ឌិត នៅផ្ទះអ្នកស្រីម៉ែន សំអន នៅមុនពេលបុណ្យភ្ជុំបិណ្ឌ។ ពលរដ្ឋ​រូប​នោះ​បានឲ្យ​ទស្សនាវដ្ដី​ថតសម្លេងលោក តែក្នុងលក្ខខ័ណ្ឌមិនបញ្ចេញឈ្មោះ បានអះអាងបន្តរថា លោកបាន​ឌុប​អ្នកដំណើរ ជិះឆ្លង​កាត់មុខផ្ទះលោកស្រី ហើយជា«ចៃដន្យ» លោកបានឃើញលោកឈូកបណ្ឌិត នៅ​ទីនោះ។ ពេលក្រោយមកទៀត ក៏​ឃើញវត្តមានលោកឈូកបណ្ឌិតដដែលនេះ នៅក្នុងឡានមួយជិះចេញ​ពីផ្ទះនោះឆ្ពោះ​ទៅ​ក្រៅ។

លោកបានបញ្ជាក់ថា លោកស្គាល់លោក ឈូក បណ្ឌិត យ៉ាងច្បាស់តាមរយៈរូបថតនានា ដែលចុះផ្សាយតាម​សារព័ត៌មាន ហើយដែលធ្វើឲ្យលោក មិនអាចមានការភ័ណ្ឌច្រឡំបានទេ។ ម្យ៉ាងទៀត លោកចំណាំមុខលោក ឈូក បណ្ឌិត បាន ក៏ដោយសារតែលោកស្អប់នូវទង្វើ របស់ជនល្មើសមានអំណាច អាងខ្នង និងបក្សពួក​ម្នាក់​នេះ ដែលមានបំណងចង់បាញ់​សម្លាប់មនុស្ស មានទាំងសាក្សី ឃើញផ្ទាល់ភ្នែកបញ្ជាក់ទៀត តែនៅរួចខ្លួនពី​សំណាញ់​ច្បាប់ ហើយរស់នៅយ៉ាងរំភើយ និង​កំពុងជិះឡានទំនើបយ៉ាងសង្ហារ។

ទស្សនាវដ្តីមនោរម្យ.អាំងហ្វូ បានស្វែងរកប្រតិកម្មដោយផ្ទាល់ ពីអ្នកស្រី ម៉ែន សំអន ចំពោះការលើកឡើង​ខាង​លើ​នេះ តែអ្នកស្រីបានបញ្ជាក់ថាលោកស្រីនៅឆ្ងាយ មិនអាចទទួលសម្លេងច្បាស់។ អ្នកស្រី ម៉ែន សំអន បាន​បង្វែ​រការ​បកស្រាយនេះ ទៅឲ្យជំនួយការរបស់លោកស្រីវិញ។

«ជាការលើកឡើងមិនពិតទាំងស្រុង» នេះជាការបដិសេធចំពោះព័ត៌មានខាងលើ របស់អ្នកស្រីជំនួយការ​ឲ្យ​អ្នកស្រី​ឧបនាយករដ្ឋមន្រ្តី។ អ្នកស្រីបានបន្តរថា អ្នកស្រីតែងតែយកសំណុំឯកសារ ឬលិខិតស្នាមផ្សេងៗ ទៅ​ផ្ទះលោកស្រីម៉ែន សំអន តែមិនដែលបានជួប ឬបានស្គាល់លោកឈូក បណ្ឌិតម្តងណានោះទេ។ «ព័ត៌មាន​នេះមិនពិតទេ (…)។ ហើយខ្ញុំក៏​មិនជឿ លើការបញ្ជាក់ របស់អ្នករត់ម៉ូតូឌុបនោះដែរ (វា) ហាក់ដូចជាមិនសម អីក៏ចៃដន្យម្លេះ គ្រាន់តែជិះកាត់មុខផ្ទះ​បាន​ឃើញ យ៉ាងច្បាស់នោះ។»

អ្នកស្រីជំនួយការ បានអះអាងទៀតថា ម្ដុំគេហដ្ឋានរបស់លោកស្រី ម៉ែន សំអន សុទ្ធតែ​ជា​លំនៅដ្ឋាន​របស់​លោក«ធំ» ដូច្នេះមិនមានអ្នកម៉ូតូឌុបឯណាអាចចុះឡើង ឬជិះកាត់ដោយធម្មតានោះឡើយ។

សូមបញ្ជាក់ថា នាយករដ្ឋមន្ត្រីស្តីទី លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ នាព្រឹក​ថ្ងៃទី៩ ខែតុលា បានប្រាប់អ្នកសារព័ត៌មាននៅទីស្តីការក្រសួងមហាផ្ទៃថា លោកបានចេញលិខិតមួយច្បាប់ បញ្ជាទៅអគ្គស្នងការ​នគរបាល​ជាតិ ឲ្យមានការស្វែងរកចាប់ខ្លួនលោក ឈូក បណ្ឌិត អតីតអភិបាល​ក្រុង​បាវិត​ដើម្បីយកមកផ្តន្ទាទោសតាមផ្លូវច្បាប់។ លោក ឈូក បណ្ឌិត ដែលកាលពីថ្ងៃទី២៥ ខែមិថុនាកន្លងមក បាន​ក្លាយជាទណ្ឌិត ដោយត្រូវបានតុលាការ ​ខេត្តស្វាយរៀង ​ផ្តន្ទាទោសកំបាំងមុខ ដាក់ពន្ធនាគារមួយឆ្នាំកន្លះ ពី​បទ​បាញ់ស្ត្រីកម្មករកាត់ដេរបីនាក់ ឲ្យរងរបួសធ្ងន់។

លោក ស ខេង បាន​ថ្លែងទៀតថា «យើងអនុវត្ត ទៅតាមសាលដីការបស់តុលាការ ធ្វើទៅតាមច្បាប់ មិនមានអ្វី​ខុសឆ្គងទេ។ (…) លោក ឈូក បណ្ឌិត កំពុងលាក់ខ្លួននៅទីណា? ហើយមូលហេតុអ្វីខ្លះដែលកន្លងមក ប៉ូលិស​មិនអាចតាមចាប់លោក ឈូក បណ្ឌិត នោះ​បាន?»៕