ប្រព័ន្ធយុត្តិធម៌នៃប្រទេសអេស្ប៉ាញ បានដាក់ទោសកាលពីថ្ងៃសុក្រទី០៤ខែតុលានេះ អ្នកនយោបាយ និងម្ចាស់ក្រុមហ៊ុន​ឯកជន ចំនួនជាង៥០នាក់ ឲ្យជាប់ពន្ធនាគារ និងឲ្យបង់ពិន័យ យ៉ាងធ្ងន់ធ្ងរ ពីបទទាក់ទងនឹងរឿងអាស្រូវប្រព្រឹត្តិ​អំពើ​ពុក​រលួយមួយ  ដែលបានធ្វើឲ្យរជើបរំជួល ដល់ស្ថានីយ៍លំហែកាយដ៏ធំ នៅទីក្រុងម៉ាប៊ែឡា (Marbella)។

លោក ជ័ន អង់តូនីញ៉ូ រ៉ូកា ពេលនាំខ្លួនទៅតុលាការ។ (រូបថត intereconomia.com)

ទីក្រុងប៉ារីស - បន្ទាប់ពីរកឃើញថា បានបង្កើតឲ្យប្រព័ន្ធពុករលួយជាទូទៅមួយ ក្នុងសំនុំរឿង អតីតទីប្រឹក្សាផ្នែក​រៀបចំ​ដែនដីនគរោបនីយកម្មមួយរូប លោក ជ័ន អង់តូនីញ៉ូ រ៉ូកា (Juan Antonio Roca) ត្រូវបានកាត់ទោសឲ្យ​ជាប់ពន្ធនាគារ​«១១ឆ្នាំ» និងបង្ខំឲ្យបង់ពិន័យ«២៤០លានអ៊ឺរ៉ូ (៣២៥លានដុល្លារអាមេរិក)»។ នេះបើតាមការសាលក្រម កម្រាស់ច្រើន​ជាង៥០០០ទំព័រ ដែលត្រូវបានបានអានដោយចៅក្រមនៃទីក្រុងម៉ាឡាហ្គា (Malaga) ស្ថិតនៅផ្នែកខាងត្បូងនៃ​ប្រទេស​អេស្ប៉ាញ។

លោក រ៉ូកា ត្រូវបានទទួលយកឲ្យធ្វើការ ដោយសាលាក្រុងម៉ាប៊ែឡា នៅអំឡុងឆ្នាំ១៩៩០ ដោយចៅហ្វាយក្រុងនៅ​ពេល​នោះ គឺលោក ជេស៊ូ ជីល (Jesus Gil) ដែលធ្លាប់ជាប្រធានក្លិបបាល់ទាត់ អាត្លេទីកូ នៃទីក្រុងម៉ាឌ្រីដ តែបានស្លាប់តាំងពី​ឆ្នាំ២០០៤មកម្លេះ។ លោកជីល បានប្រគល់ទៅឲ្យ លោក រ៉ូកា នូវអំណាចដ៏ធំមួយ ក្នុងតំណែង ហើយត្រូវបានកាន់​កាប់​ជាបន្ត ដោយមនុស្សពីរនាក់ផ្សេងទៀត គឺលោក ជូលិយ៉ាន ម៉ុយណូស (Julian Muñoz) និងម៉ារីសុល យ៉ាហ្គែ (Marisol Yagüe) ដែលសុទ្ធសឹងជាសមាជិកគណបក្សប្រជា-អភិរក្សនិយម។

តុលាការបានចោទប្រកាន់ លោក ជ័ន អង់តូនីញ៉ូ រ៉ូកា ថាបានទទួលប្រាក់ច្រើនរយលានអ៊ឺរ៉ូ ពីសំណាក់ប្រធានក្រុមហ៊ុន​សំណង់ ហើយលោកបានបែងចែកប្រាក់នោះ រវាងអ្នកទទួលខុសត្រូវនៅសាលាក្រុង ជាថ្នូទៅនឹងការទទួល​បាន​ទីផ្សារ​ផ្ដាច់មុខ។

សាលក្រមបានសរសេរដូច្នេះថា «កម្មវត្ថុនៅពេលនោះ គឺដើម្បីគ្រប់គ្រងនយោបាយរបស់សាលាក្រុង ដើម្បីទាញយកផល​ចំណេញផ្នែកហិរញ្ញវត្ថុ ហើយលោក រ៉ូកា ខ្លួនលោក បានអនុវត្តន៍រឿងនេះ ពេលស្ថិតក្នុងតំណែងរបស់ខ្លួន អស់រយៈពេល​រាប់សិបឆ្នាំ»។

ទំហំនៃរឿងអាស្រូវ បានបែកធ្លាយនៅឆ្នាំ២០០៦ នៅពេលដែលប្រទេសអេស្ប៉ាញបានផុងខ្លួន ទៅក្នុងវិបត្តិហិរញ្ញវត្ថុ ដែល​បង្ខំឲ្យរដ្ឋាភិបាលមកពីគណបក្សសង្គមនិយមនៅពេលនោះ រំលាយទីប្រឹក្សាសាលាក្រុង ម៉ាប៊ែឡា ដែលមិនសូវដែលធ្លាប់​ជួប នៅក្នុងរបបប្រជាធិបតេយ្យនៃប្រទេសអេស្ប៉ាញ។

សវនាការកាត់ក្ដីនៃសំនុំរឿងនេះ បានប្រព្រឹត្តិទៅនៅឆ្នាំ២០១០ ចំណាយពេល៨០០ម៉ោង ដោយមានការចូលរួមពីសាក្សី​ជាង៤០០នាក់ ផង។ លោក ម៉ារីសុល យ៉ាហ្គែ ត្រូវបានតុលាការកាត់ទោសឲ្យជាប់ពន្ធនាគារ ៦ឆ្នាំ និងលោកជូលិយ៉ាន ម៉ុយណូស ជាប់ទោស ២ឆ្នាំ។ ប៉ុន្តែទន្ទឺមនឹងនោះ ប្រធានក្រុមហ៊ុនរវាងពី៤០នាក់ ទៅ៩៥នាក់ ត្រូវបានប្រកាសថា​មិនបាន​ជាប់ទាកទងអ្វីឡើយ៕

-----------------------------------------------------
ដោយ សេក មនោរកុមារ - ថ្ងៃទី០៥ ខែតុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ