រូងគុហាដែលមានឈ្មោះថា ហង់ស៊ូនដុង​ (Hang Son Doong) ត្រូវបានចាត់ទុកថា ជារូងភ្នំដែលមានទំហំធំជាងគេ​នៅក្នុង​ពិភពលោក។ តាមពិតទៅ ការបើកឲ្យចូលទស្សនា នៅមិនទាន់បើកទូលាយជាសាធារណៈនៅឡើយទេ ក្រោម​មូលហេតុ​អភិរក្សតំបន់ និងរក្សានូវជីវសាស្ត្រនៃទីតាំង។ សម្រាប់ឆ្នាំ២០១៤ខាងមុខ អាជ្ញាធរនឹងផ្ដល់ការអនុញ្ញត ឲ្យអ្នក​ទេសចរណ៍​តែចំនួន ២២០នាក់ប៉ុណ្ណោះ មានសំណាងអាចចូលទៅទស្សនានៅទីនោះបាន ហើយក្នុងទេសចរណ៍ម្នាក់ៗ ត្រូវចំណាយ​ច្រើនជាង ២២០០អ៊ឺរ៉ូ (ប្រមាណជា៣០០០ដុល្លារអាមេរិក) ទៅឲ្យក្រុមហ៊ុនគ្រប់គ្រងមួយ។

គុហាដែលធំជាងគេ មានកំពស់ស្មើនឹងអាគារ៤០ជាន់

មានកំពស់២៤០ម៉ែត្រ និងទទឺង១៥០ម៉ែត្រ រូងគុហានេះមានទំហំធំជាងគេមែន តែមិនមែនមានន័យថាមានបណ្ដោយ​វែង​ជាងគេនោះទេ។ បណ្ដោយរបស់វា ដែលមានប្រវែងត្រឹមតែ៤គីឡូម៉ែត្រនោះ មិនជាវែងណាស់ណាទេ បើប្រៀបទៅនឹង​គុហាម៉ាម៊ូដ (Mammoth) នៅអាមេរិក ដែលមានប្រវែងដល់ទៅ៦០០គីឡូម៉ែត្រ។ វាត្រូវបានរកឃើញនៅឆ្នាំ១៩៩១ នៅ​ក្នុងខេត្តគ័ងប៊ីង (Quang Binh) តែវាទើបនឹងត្រូវបានអ្នកវិទ្យាសាស្ត្រចូលទៅស្រាវជ្រាវ នៅឆ្នាំ២០០៩នេះតែប៉ុណ្ណោះ។ នៅ​ក្នុងគុហា មានអាងធំដ៏ធំមួយ ដែលអ្នកទេសចរណ៍អាចងូតកំសាន្តបាន ដោយទទួលទឹកពីស្ទឹងមួយហូរកាត់ទីនោះ។

គុហានោះ អាចទទួលបានពន្លឺព្រះអាទិត្យតាមរយៈក្រហែងថ្មចំនួនពីរ ដែលអាចឲ្យជីវិតដែលរស់នៅក្នុងនោះ ស្គាល់ពី​យប់ថ្ងៃ ដូចពិភពខាងក្រៅដែរ។ ប្រភេពសត្វជាច្រើន ក្នុងនោះស្វា សត្វស្លាប ប្រជៀវ និងសត្វល្អិតផ្សេងទៀត បានបង្កើត​ជាធម្មជាតិដ៏ស្រស់បំព្រងមួយ មិនអាចស្មានដល់។ តែវានៅតែជាពិភពដាច់ដោយឡែកមួយ សម្រាប់អ្នកចង់ដឹង​ចង់​ឃើញ​ទាំងឡាយ ដែលចង់ទៅធ្វើដំណើរផ្សងព្រេង និងស្នាក់ក្នុងទីនោះ រហូត៧យប់៧ថ្ងៃ ដោយមានការចង្អុលបង្ហាញ ពី​មគ្គុទេសទេសចរណ៍ជំនាញម្នាក់ផង។

សូមទស្សនារូបភាព និងវីដេអូនៅខាងក្រោមនេះ ដូចតទៅ៖