អស់រយៈពេល១៦ឆ្នាំ ដែលជនរងគ្រោះដោយសារការបោកគ្រាប់បែក នៅមុខមន្ទីរដ្ឋសភាចាស់ (បច្ចុប្បន្នតុលាការកំពូល) កាលពីថ្ងៃទី៣០ ខែមីនា ឆ្នាំ១៩៩៧ នៅមិនទាន់ទទួលបានយុត្តិធម៌ ហើយជនល្មើសនៅតែស្ថិតនៅក្រៅ​សំណាញ់ច្បាប់​នៅ​ឡើយ បើគិតមកទល់នឹងពេលនេះ។

អ្នកស្រីពៅ ស៊ីនួន ជនរងគ្រោះរបូសជើងដោយសារគ្រាប់បែកថ្ងៃទី៣០ ខែមិនា ឆ្នាំ១៩៩៧។ (រូបថត MONOROOM.info/ O. Vary)

រាជធានីភ្នំពេញ - ជនរងគ្រោះដោយសារការបោកគ្រាប់បែក នៅមុខមន្ទីរដ្ឋសភាចាស់កាលពីថ្ងៃទី៣០ ខែកញ្ញា ម្សិល​ម៉ិញ​នេះ ក្នុងពីធីបាំងក្សុល និងរាប់បាទ ដែលដឹកនាំដោយគណបក្សសង្គ្រោះជាតិ បានអំពាវនាវដល់រដ្ឋាភិបាលថ្មី ជួយចាប់​ជន​ដៃដល់ ដើម្បីស្វែងរកយុត្តិធម៌ជូនពួកគាត់ ដែលរស់នៅ ក្នុងភាពឈឺចាប់ផ្លូវកាយដោយសារតែមុខរបួស និងការបន្សល់​នូវ​កម្ទេចគ្រាប់ក្នុងរាងកាយ ពិសេសឈឺចាប់ផ្នែកផ្លូវចិត្ត ខណៈជនល្មើស បែរជាអាចរស់នៅដោយសប្បាយ ក្រៅសំណាញ់​ច្បាប់​រហូត​មកទល់បច្ចុប្បន្ននេះ យ៉ាងមានសុវត្ថិភាព។

អ្នកស្រីពៅ ស៊ីនួន ក្នុងវ័យ៣៥ឆ្នាំ ដែលរងរបូសជើងដោយសារតែអំបែងគ្រាប់បែកខ្ទាតចូល បានរម្លឹកពីការផ្ទុះ​គ្រាប់បែក​នៅ​មុខមន្ទីររដ្ឋសភាចាស់នេះថា ពេលនោះអ្នកស្រីជាកម្មការនីនៅរោងចក្រមួយ ដែលកំពុងតែឈរកាន់បដា ទាមទាឲ្យមាន​ការ​តម្លើងប្រាក់ខែ។ អ្នកស្រីបន្តរថា ពេលនោះអ្នកស្រីបានលឺគ្រាប់បែកទីមួយផ្ទុះឡើង ក្រោយមកក៏សន្លប់បាត់លែងដឹងខ្លួន។ ក្រោយពីដឹងខ្លួនវិញទើបដឹងថា ជើងមួយចំហៀងខាងឆ្វេងត្រូវបាក់ និងខាងស្តាំរងរបួស​ដោយមានកម្ទេចអំបែង​គ្រាប់បែក​មួយចំនួន។

ស្រ្តីវ័យ៣៥ឆ្នាំរូបនេះបានបន្តរថា ក្រោយពីបានដឹងខ្លួនអ្នកស្រីបានវាទៅយកកាបូបរបស់ខ្លួននៅក្បែរនោះ ក្រោយមក​ក៏​មាន​អ្នកជួយយកទៅមន្ទីរពេទ្យ។ ក្នុងការរងរបួសនេះ អ្នកស្រីត្រូវចំណាយពេលជាងបួនខែសម្រាកនៅមន្ទីរពេទ្យកាល់ម៉ែត្រ បន្ទាប់មកត្រូវទៅសំរាកនៅមន្ទីរព្រះសង្ឈ មួយរយៈពេលវែង (ជាងមួយឆ្នាំ) បន្ថែមទៀត។ នៅក្នុងមន្ទីរពេទ្យក្រោម​ការ​ជួយ​ឧបត្ថម្ភ ពីអង្គការលីការដូ ដោយមិនអាចទៅធ្វើការនៅរោងចក្រវិញបាន អង្គការលីការដូរបានជួយនូវសេវាថ្លៃព្យាបាលជើង និងបានជួយបង្ហាត់បង្រៀនផ្នែកជំនាញចុងភៅ ដែលអាចធ្វើឲ្យបងស្រីមានលទ្ធភាព ក្នុងការប្រកបមុខរបចិញ្ចឹមជីវិត​រហូត​មកដល់សព្វថ្ងៃនេះ។ តែទោះជាយ៉ាងនេះក្តី អ្នកស្រីនៅតែរងនូវការលំបាកទាំងការរស់នៅ និងក្នុងជីវភាពព្រោះ​តែការ​ឈឺ​ចាប់នូវមុខរបួស និងកម្ទេចអំបែង (គ្រាប់) ដែលមាននៅក្នុងជើងនៅឡើយ។

ជនរងគ្រោះដល់ជីវិត ដោយសារគ្រាប់បែកថ្ងៃទី៣០ ខែមិនា ឆ្នាំ១៩៩៧។ (រូបថត MONOROOM.info/O. Vary)

អ្នកស្រីបាននឹងឃើញនូវហេតុការទាំងនេះ ហាក់បីដូចជានៅថ្មីៗ នាពេលដែលបងស្រីឈឺចាប់នូវស្នាមរបួស នាពេលមាន​អាកាសធាតុត្រជាក់ម្តងៗ ដោយបានបង្ហាញបីអារម្មណ៍ថា «ខ្ញុំមានការអស់សង្ឃឹមយ៉ាងខ្លាំង ដែលមកទល់នឹងពេលនេះ នូវចំណាត់ការរបស់រដ្ឋាភិបាលដែលមិនអាចវែកមុខ និងចាប់ជនល្មើសដែលបានបង្ករឲ្យមានការបំផ្ទុះគ្រាប់បែក មក​ផ្ដន្ទា​ទោសបាន។ (…) ខ្ញុំសោកស្ដាយណាស់១៦ឆ្នាំទៅហើយនោះ ឃាតកបែរជាបន្តររស់នៅយ៉ាងសប្បាយ ចំណែកអ្នករងរបួស​វិញរស់នៅតាំងការឈឺចាប់ទាំងផ្លូវចិត្ត និងផ្លូវកាយដោយសារតែមុខរបួស។ (…) រកឃាតករមិនបានហើយ ខ្ញុំនៅមាន​អំបែងជាប់នឹងជើងទៀត»។

មន្ត្រីជាន់ខ្ពស់នៃគណបក្សសង្គ្រោះជាតិ ក្នុងពិធីបង្សុកូលឧទ្ទិសកុសលដល់វិញ្ញាណក្ខន្ធ អ្នកស្លាប់ដោយការបោក​គ្រាប់បែក​នោះថា ការវាយប្រហារដោយគ្រាប់បែកដៃកាលនោះ បានបង្កឲ្យមានមនុស្សស្លាប់ជាងម្ភៃនាក់ និងរងរបួសមិនតិចជាង​ពីរ​រយនាក់នោះទេ។ ប៉ុន្តែករណីខាងលើ លោក សម រង្ស៊ី ធ្លាប់បានចោទលោក ហ៊ុន សែន ថាជាអ្នកនៅ​ពី​ក្រោយ​ព្រឹត្តិការណ៍​ដ៏រង្គាលនេះ។

មន្រ្តីជាន់ខ្ពស់គណបក្សប្រជាជនកម្ពុជា លោក ជាម យៀប បានបញ្ជាក់នូវគោលជំហររបស់រដ្ឋាភិបាល នៅតែបន្តរឲ្យ​សមត្ថកិច្ច និងអាជ្ញាធរចាត់ការ ស្រាវជ្រាវ ស្វែងរកចាប់ជនទាំងនោះ។ ជាមួយគ្នានេះ លោកបានបញ្ជាក់ថា ក្រោមការជួយ​ស្វែងរករបស់អាមេរិក ដូចជាអេហ្វប៊ីអាយ (FBI) និង ស៊ីអាយអេ (CIA) តែជនល្មើសទាំងនៅតែរត់លាក់បំពួន ដែលពិបាក​ក្នុងការស្វែងរកការចាប់ខ្លួននេះ។ លោក ជាម យៀបបានពន្យល់ថា «សមត្ថកិច្ចចេះតែខំរក ឯអ្នកប្រព្រឹត្តចេះតែខំពួន។ ម្ខាងអ្នកពួន និងម្ខាងទៀតអ្នករក ចេះតែមានការលំបាក។ (…) រាជរដ្ឋាភិបាលមិននៅកណ្តើយនោះទេ សម្តេច (ហ៊ុន សែន) លោកខិតខំណែនាំដល់សមត្ថកិច្ច។ លោកបានបញ្ជាក់ថាជាមួយគ្នានេះ លោក ខៀវ សុភ័ក្រ អ្នកនាំពាក្យក្រសួងមហាផ្ទៃ នៅតែខិតខំធ្វើការសិក្សាស្រាវជ្រាវ និងស៊ើបអង្កេតជាបន្តទៀត៕»

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០១ តុលា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ