នៅទីបផុតទីបក្សសង្គ្រោះជាតិ បានប្រកាសមិនចូលរូមប្រជុំសភាលើកដំបូង តាមការកោះហៅរបស់ព្រះមហាក្សត្រ​នោះ​ទេ។ ជាមួយគ្នានឹងការមិនចូលរួមប្រជុំ សភារបស់បក្សប្រឆាំងនេះ ត្រូវបានគណបក្សប្រជាជនអះអាងថា ជាការមិន​គោរព​ឲ្យ​តម្លៃ​ចំពោះ​ព្រះមហាក្សត្រ។ ក៏ប៉ុន្តែមន្រ្តីគណបក្សសង្គ្រោះជាតិបាន លើកឡើងថា ខ្លួនគោរពតាមព្រះហាក្សត្រជានិច្ច តែឆន្ទៈ​របស់​ពលរដ្ឋក៏សំខាន់ដែរ។

លោក ផៃ ស៊ីផាន មន្ត្រីគណបក្សប្រជាជនកម្ពុជា និងជាអ្នកនាំពាក្យរដ្ឋាភិបាល​កម្ពុជា។ (រូបថត ទីស្ដីការគណរដ្ឋមន្ត្រី)

បើតាមការគ្រោងទុក្ខនៅសល់តែរយៈពេលជាង២ថ្ងៃទៀតប៉ុណ្ណោះ កិច្ចប្រជុំសភាលើកដំបូងនឹងត្រូវចាប់ផ្តើមឡើង ដែល​ព្រះមហាក្សត្រកម្ពុជា បានចេញព្រះរាជសារយ៉ាងទទូចម្តងហើយម្តងទៀត សូមឲ្យតំណាងរាស្រ្តបក្សប្រឆាំង ចូលរួមប្រជុំ​សភាតាមការកំណត់កុំខានឲ្យសោះ។ ក៏ប៉ុន្តែជាជំហរចុងក្រោយ នៅថ្ងៃនេះ គណបក្សសង្គ្រោះជាតិ បានប្រកាសហើយថា ខ្លួននឹងមិនចូលរួមប្រជុំសភា តាមការកោះអញ្ជើញរបស់ព្រះមហាក្សត្រនោះទេ ដោយសារតែនៅមិនទាន់រកយុត្តិធម៌​ជូន​ម្ចាស់ឆ្នោតបាន។

ការប្រកាសជំហរបែបនេះ ត្រូវបានលោក ផៃ ស៊ីផាន មន្រ្តីបក្សប្រជាជនអះអាងថា គឺជាការប្រមាថចំពោះព្រះមហាក្សត្រ ដោយមិនស្តាប់ឧិវាទព្រះអង្គឡើយ។ លោក ផៃ ស៊ីផាន បានបន្តថា កាលពីពេលមុន គណបក្សប្រឆាំង បានតតាំងមិន​គោរព វាយប្រហារ ប្រមាថចំពោះស្ថាប័នកំពូលៗរបស់ជាតិដូចជា គណៈកម្មាធិការជាតិរៀបចំការបោះឆ្នោត និងស្ថាប័ន​ក្រុមប្រឹក្សា​ធម្មនុញ្ញ។ លោកថា ឥឡូវនេះដល់វេន គណបក្សសង្គ្រោះជាតិ វាយប្រហារ ប្រមាថមើលងាយចំពោះ​តួអង្គ​ព្រះមហាក្សត្រ​វិញ​ម្តងហើយ។ ប្រមាថ ដោយសារថា តំណាងរាស្រ្តគណបក្សនេះ បានប្រកាសជំហរផ្ទុយពីព្រះរាជតម្រិះ​របស់ ព្រះមហាក្សត្រ ដោយផ្គឺនមិនចូលរួមប្រជុំសភាលើកដំបូង តាមការកោះហៅរបស់ព្រះមហាក្សត្រនៅថ្ងៃទី ២៣ ខែកញ្ញា ខាងមុខ។

ទាក់ទងនឹងបញ្ហានេះ អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានធ្វើការអត្ថាធិប្បាយថា ការសម្រេច​ចិត្ត​មិនចូលរួមប្រជុំសភា របស់អ្នកតំណាងរាស្រ្តជាប់ឆ្នោត របស់បក្សប្រឆាំងនេះ មិនមែនមានន័យមិនគោរព មិនឲ្យតម្លៃ ប្រមាថ ព្រះមហាក្សត្រ​ដូចការចោទប្រកាន់ របស់គណបក្សប្រជាជនឡើយ។ លោកថា មានតែគណបក្សប្រជាជនទេ ដែលមិន​គោរព​ស្ថាប័នព្រះមហាក្សត្រនោះ។ អ្នកនាំពាក្យរូបនេះបានបញ្ជាក់ថា ព្រះមហាក្សត្រគឺជាតួអង្គដែលគណបក្ស​នេះគោរព​កោត​ក្រែង​ជាទីបំផុត មិនដែលមានចេតនាចង់ប្រមាថព្រះអង្គឡើយ។ ក៏ប៉ុន្តែគណបក្សសង្គ្រោះជាតិ បាន​ទទួលការគាំទ្រខ្លាំង និងបាន​ឈានដល់កម្រិតនេះ គឺដោយសារតែពលរដ្ឋបោះឆ្នោតឲ្យ។ ដូច្នេះឆន្ទៈរបស់ពលរដ្ឋ ក៏វា​សំខាន់ផងដែរ។

បើគេបានលឺបានស្គាល់ឃ្លាមួយនិយាយថា ព្រះរាជាណាចក្រកម្ពុជា គេប្រាកដជាយល់ថា ប្រទេសនេះ ជាប្រទេស​ដែល​មាន​ព្រះមហាក្សត្រឡើងសោយរាជ្យសម្បត្តិ។ ជាការពិតណាស់កម្ពុជាគឺជាដែនដីមាន ស្តេចគ្រងរាជ្យសម្បត្តិ ស្តេចជា​ប្រមុខរដ្ឋ និងជាម្លប់ដ៏ត្រជាក់របស់បណ្តាប្រជារាស្រ្ត នៅទូទាំងនគរ។ នៅក្នុងច្បាប់រដ្ឋធម្មនុញ្ញដែលជា​ច្បាប់កំពូលនៃ​ប្រទេសនេះ បាន​ចែងថា អង្គព្រះមហាក្សត្រ គ្មាននរណា មួយអាចរំលោភបំពានបានឡើយ ជាពិសេសព្រះមហាក្សត្រ ក៏​គឺជាអជ្ញាកណ្តាល ក្នុងការដោះស្រាយ នូវវិបត្តិរបស់ប្រទេសជាតិផងដែរ។ តួយ៉ាងដូចជាស្ថានការណ៍ ដែលកំពុង​តែ​កើត​ឡើងយ៉ាងក្តៅគគុកនៅ ក្នុងប្រទេសបច្ចុប្បន្ន ដែលមិនមានភាពឯកភាពគ្នា ក្រោយការបោះឆ្នោត បានរុញច្រានស្ថានភាព នយោបាយនៅកម្ពុជា ឲ្យធ្លាក់ទៅក្នុងវិបត្តិមួយ ដែលមកទល់ពេលនេះ នៅតែមិនទាន់អាចរកដំណោះ ស្រាយរួម​បាន​ឡើយ។ ដូច្នេះតួអង្គ​ព្រះមហាក្សត្រ គឺជាការចាំបាច់ណាស់ក្នុងការដោះស្រាយនូវបញ្ហា នេះ។ ប៉ុន្តែក្នុងដំណាក់កាលនេះ គេសង្កេតឃើញថា ឥទ្ធិពលរបស់ព្រះមហាក្សត្រ ហាក់មិនមានទម្ញន់អ្វី ឡើយលើអ្នកនយោបាយ និងពលរដ្ឋកម្ពុជា។

ជុំវិញការប្រមាថស្ថាប័នព្រះមហាក្សត្រ និងអង្គព្រះមហាក្សត្រ ខ្សែរាជវង្សមួយព្រះអង្គ ព្រះនាម ស៊ីសុវត្ថិ ធម្មិកោ កាល​ពី​ពេលថ្មីៗកន្លងទៅ បានចេញមុខបរិហារជាសាធារណៈថា លោក ហ៊ុន សែន នាយករដ្ឋមន្រ្តីចាំផ្ទះ និងលោក ជាម យៀប មន្រ្តីបក្សប្រជាជនកម្ពុជា ធ្លាប់បានគម្រាមបញ្ចប់របបរាជនិយមនៅកម្ពុជា។ លោក ហ៊ុន សែន ដែលបានគម្រាម​ព្រះមហាក្សត្រ​កាលពីឆ្នាំ ២០០៥ កន្លងទៅនៅព្រលានយន្តហោះអន្តរជាតិភ្នំពេញ បន្ទាប់ពីលោកត្រលប់មកពី​ប្រជុំ​នៅ​វៀតណាមវិញ ទាក់​ទងនឹងសន្ធិសញ្ញាព្រំដែនកម្ពុជា- វៀតណាមថា ប្រសិនបើព្រះមហាក្សត្រ មិនព្រមឡាយ​ព្រះហស្ថ​លេខា​ចំពោះ​សន្ធិសញ្ញា​នេះទេ ត្រូវតែគិតគូយករបបសាធារណរដ្ឋមកដាកជំនួនរាជានិយមវិញ។ ចំណែកលោក ជាម យៀប វិញ បានព្រមានចំពោះ ព្រះមហាក្សត្រកាលពីឆ្នាំ ២០០៦ ខែវិច្ឆិការ កន្លងទៅដែរថា គណបក្សប្រជាជនកម្ពុជា យក​លទ្ធិរាជាធិបតេយ្យមកបាន ចង់​លុបវិញពេលណាក៏បានដែរ៕

---------------------------------
ដោយ៖ ជា ធីរិទ្ធ - ភ្នំពេញថ្ងៃទី២០ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ