ភ្នំពេញ៖ គ្រាប់បែក និងការបង្កៃជាតិផ្ទុះចំនួនពីរកន្លែង ត្រូវបានគេរកឃើញនៅព្រឹកថ្ងៃទី១៣ខែកញ្ញានេះ កណ្ដាល​រាជធានី​ភ្នំពេញ។ ជា​ព្រឹត្តិការណ៍មួយថ្មីទៀត បង្កជាសញ្ញា«មិនល្អ»ដល់នយោបាយប្រទេស ជាពិសេសនៅមុនការជួបប្រជុំ​រវាង​មេ​ដឹកនាំ​គណបក្សធំទាំងពីរ ក្រោមព្រះរាជាធិបតីភាពនៃព្រះមហាក្សត្រ នៅថ្ងៃសៅរ៍ទី១៤ខែកញ្ញា និងមហាបាតុកម្ម ដែល​គ្រោងរៀបចំដោយ​គណបក្ស​​សង្គ្រោះជាតិ នៅថ្ងៃអាទិត្យទី១៥ខែកញ្ញាខាងមុខ។

គ្រាប់បែក M79 ដែលត្រូវបានគេ យកមកបំផ្លុងចោល នៅជិតស្ពាននាគវត្តភ្នំថ្ងៃទី១៣ខែកញ្ញាឆ្នាំ២០១៣។ (រូបថត MONOROOM.info/ O.Vary)

នាព្រឹកថ្ងៃទី១៣ ខែកញ្ញានេះ ប្រជាពលរដ្ឋដែលមកហាត់ប្រាណជាប្រចាំរាល់ព្រឹក បានសម្ដែងការភ្ញាក់ផ្អើលជាខ្លាំង ដោយ​ពួកគាត់បានប្រទះឃើញ ​គ្រឿង«បំផ្ទុះ»យ៉ាងហោចពីរកន្លែង ត្រូវបានដាក់បង្កៃចោល នៅកណ្ដាលបេះដូងនៃ​ព្រះរាជា​ណាចក្រ។ ការ​បង្កៃគ្រាប់ផ្ទុះពីគ្រាប់៖ មួយគ្រាប់ស្ថិតនៅក្បែរវិមានរដ្ឋសភា ជាប្រភេទម្សៅលាយជាមួយជីអ៊ីរ៉េដាក់ក្នុង​«ធុងប៊ីដុង» ដែល​មានទាំងក្បាលគ្រាប់មួយនៅក្នុងនោះផង និងមួយគ្រាប់ទៀត ស្ថិតនៅសួនច្បារជិតស្ពាននាគក្បែវត្តភ្នំ នៅមិនឆ្ងាយប៉ុន្មាន​ពីទីលានប្រជាធិបតេយ្យ ជាទីដែលអ្នកគាំទ្រគណបក្សសង្គ្រោះជាតិ នឹងជួបជុំគ្នានៅថ្ងៃខាងមុខនេះ។ ចំណុចទីពីរនេះ ស្ថិតនៅក្បែររូបចម្លាក់​មហាត្មះគន្ធី ជិតស្ពាននាគ គ្រឿងផ្ទុះប្រភេទគ្រាប់ M79 ចំនួន៣គ្រាប់ ដាក់នៅក្នុង​ថង់ខ្មៅមួយ ដែលមើលទៅ​នៅថ្មីៗនៅឡើយ បានចងភ្ជាប់គ្នាចំនួនបីគ្រាប់ ក្នុងនោះក៏មានដែកគោលមួយចំនួន​ចងភ្ជាប់​ជាមួយ។

សម្រាប់«គ្រឿងផ្ទុះ» ជាប្រភេទម្សៅលាយជាមួយជីអ៊ីរ៉េដាក់ក្នុង«ធុងប៊ីដុង» នៅជិតវិមានរដ្ឋសភានោះ ត្រូវបាន​កងកម្លាំង​អាជ្ញាធរ​«បំផ្ទុះនៅនឹងកន្លែង»។ ឯគ្រាប់ប្រភេទM79 ចំនួន៣គ្រាប់ ដែលថ្មីស្រឡាងបានចងភ្ជាប់គ្នាចំនួនបីគ្រាប់ ត្រូវ​កង​កម្លាំង​អាជ្ញាធរ​ និងមន្ត្រី CMAC ធ្វើការដោះយកចេញ ដោយមិនបានធ្វើការបំផ្ទុះនៅនឹងកន្លែងនោះទេ។ ទាំងការរកឃើញ និងកំទេច«គ្រឿងផ្ទុះ»នេះ ធ្វើឡើងក្រោយពេលគ្នាបន្តិចតែប៉ុណ្ណោះ និយាយរួមកំទេច«គ្រឿងផ្ទុះ»នោះនៅជិត​រដ្ឋសភារួច​ ហើយបានបន្តរមកកំទេច«គ្រឿងផ្ទុះ»មួយផ្រេងទៀត ជិតស្ពាននាគជាក្រោយ។ ការកំទេច និងយកចេញនៃគ្រឿងផ្ទុះ​ទាំង​ពីរកន្លែងនេះ មិនបណ្តាលឲ្យមានគ្រោះថ្នាក់ដល់មនុស្ស ឬប៉ះពាល់អ្វីឡើយ។

គ្រាប់បែកបង្កៃ គម្រាមដល់គម្រោងធ្វើបាតុកម្ម?

ដល់ម៉ោង១១ថ្ងៃត្រង់ លោក ជួន សុវណ្ណ ស្នងការនគរបាលរាជធានិភ្នំពេញ និង លោក ហេង រតនា ប្រធានមជ្ឈមណ្ឌល​កម្ចាត់មីនកម្ពុជា ដែលមាន«វត្តមាន»នៅទីនោះ មិនបានផ្តល់កិច្ចសម្ភាសដល់អ្នកសារព៏ត៌មានទេ ក្រោយព្រឹត្តការណ៍​នានានៃការបំផ្ទុះ និងចល័តគ្រឿងផ្ទុះទាំងពីរកន្លែងនោះ។

តែលោក សុខ សម្បត្តិ អភិបាលខណ្ឌដូនពេញ បានបញ្ជាក់ប្រាប់ចំពោះហេតុការនេះថា មិនទាន់បានធ្វើការ​វាយតម្លៃ​នោះ​ទេ។ លោកនឹងបន្តរធ្វើការស្រាវជ្រាវ (…) រួមគ្នាជាមួយស៊ីម៉ាក់ ដើម្បីបន្តរតាមដាន និងពិនិត្យទៅតាមភូមិសាសន៍​ផ្សេងៗ​ទៀត។ លោកបានបញ្ជាក់ថា «យើងមិនទាន់ដឹងថាជាការគំរាមកំហែងផ្នែកនយោបាយ ឬយ៉ាងណានោះ​មិន​ទាន់​ដឹងទេ។ យើងបន្តរការស្រាវជ្រាវឲ្យបានច្បាស់សិន ទើបដឹងថាវាយ៉ាងម៉េច។ (…) បាតុកម្មដែលធ្វើឡើងដោយគណបក្សប្រឆាំង ឬអង្គការសង្គមស៊ីវិល ដែលមានច្បាប់ត្រឹមត្រូវ ពីសាលារាជធានីភ្នំពេញ ពីក្រសួងមហាផ្ទៃ ពីរាជរដ្ឋាភិបាល យើងនឹង​ការពារសុវត្ថិភាពជូនពួកគេ។ តែមិនអនុញ្ញាតិឲ្យមានការសម្រាកនៅទីនោះទេ ហេតុផលគឺសន្តិសុខ។»

សម្រាប់មន្រ្តីខាងគណបក្សសង្គ្រោះជាតិ លោក ហូ វ៉ាន់ ដែលបានចូលរួមតាមដាននោះ លោកមិនបានសន្និដ្ឋានថា ជា​ទង្វើរបស់ភាគីណាមួយនោះទេ តែយោងតាមទិដ្ឋភាពខាងលើ លោកនឹងបង្កើនសុវត្ថិភាពទាំងផ្ទៃក្នុង និងសហការជាមួយ​អជ្ញាធរ ដើម្បីធ្វើការទប់ស្កាត់នូវហេតុការណ៍នានា។ លោកបានបន្តរថា «សូមសមត្ថកិច្ចចាត់វិធានការឲ្យបានរឹងមាំ និង​ប្រុងប្រយ័ត្នខ្ពស់ លោកបានបន្តរថាក្នុងស្ថានការកំពុងតែតានតឹងនេះ សូមកុំឲ្យកើនមានការផ្ទុះ ឬសម្លេងផ្ទុះ ដើម្បីរក្សា​ភាពស្ងប់ស្ងាត់ជូនប្រជាពលរដ្ឋ ដែលជាបាតុករក្នុងថ្ងៃបាតុកម្មខាងមុខនេះ»។ លោកនឹងសហការជាមួយអាជ្ញាធរ រួមទាំង​សមត្ថកិច្ចដែលមានជំនាញខ្ពស់ក្នុងការរក្សា និងការពារដល់សុវត្ថិភាព របស់បងប្អូនប្រជាពលរដ្ឋដែលចូលរួម។ បាតុកម្ម​នេះនឹងបន្តរទៅទាំងបីថ្ងៃ តាមការគ្រោងទុក ទោះបីសាលារាជធានីភ្នំពេញអនុញាតិតែមួយថ្ងៃក៏ដោយ។

អាចមានក្រុមទីបី?

មានវត្តមានក្នុងពេលនោះដែរ មន្ត្រីខាងសង្គមស៊ីវិលមួយរូប លោក អំ សំអាត ប្រធានផ្នែកបច្ចេកទេសស៊ើបអង្កេត របស់​អង្គការសិទ្ធិមនុស្សលីកាដូ បានបញ្ជាក់ពាក់ព័ន្ធនឹងការផ្លុងគ្រាប់បែកទាំងពីរកន្លែងនេះថា អាចមានក្រុមទីបីផ្សេងទៀត​ដែលបង្កឡើង ដើម្បីបង្កើតឲ្យមានភាពចលាចល ក្នុងពេលប្រទេសកំពុងមានវិបត្តិផ្នែកនយោបាយ និងបញ្ហាប្រទាំង​ប្រទើសនៃការរស្នើសុំ«ចំនួនបីថ្ងៃ»ធ្វើមហាបាតុកម្មអហិង្សា របស់គណបក្សសង្គ្រោះជាតិ ជាមួយនិងសាលារាជធានី​ភ្នំពេញ។

បញ្ហាក្រុមទីបីនេះ លោក អំ សំអាត មិនអាចធ្វើការសន្និដ្ឋានថា កើតឡើងពីក្រុមទីមួយ ឬក្រុមទីពីរ (គណបក្សកាន់អំណាច ឬគណបក្សប្រឆាំង) នោះទេ។ តែទោះជាយ៉ាងណាក៏ដោយ លោកបានស្នើសុំដល់ភាគីទាំងពីរ កុំឲ្យយកបញ្ហានេះធ្វើការ​«លាបពណ៌»​គ្នាទៅវិញទៅមក។ ករណីដែលពិសេសនោះ គេត្រូវរួមគ្នាបង្កើតនូវគណៈកម្មការចម្រុះមួយដើម្បីត្រួតពិនិត្យ និងស្រាវជ្រាវ។ លោកបានបន្ថែមថា ចេតនានៃអ្នកបង្កឡើងនោះមានពីរ «ទីមួយធ្វើឲ្យមានភាពចលាចលក្នុងសង្គម ទីពីរ​ជាការគំរាមកំហែងដល់ក្រុមបាតុករ ដែលនឹងចូលរួមមហាបាតុកម្មចំនួនបីថ្ងៃខាងមុខនេះ។»

សូមរម្លឹកថា កាលពី ថ្ងៃទី១២ ខែកញ្ញាម្សិលម៉ិញនេះ ក៏មានគ្រាប់បែកដៃចាស់មួយគ្រាប់ដែរ ត្រូវបានគេប្រទះឃើញ នៅ​ក្បែរវេទិការៀបចំពិធីស្វាគមន៍ ថ្នាក់ដឹកនាំគណបក្សសង្គ្រោះជាតិ នៅឯទីរួមខេត្តសៀមរាប ខេត្តអង្គរ។ ប៉ុន្តែអាជ្ញាធរ​បាន​អះអាងថា នោះជាគ្រាប់បែកច្រែសចាប់មួយ ដែលទំនងជាបានមកជាមួយ នឹងការចាក់ដីបំពេញទីធ្លាមួយនៅក្បែរនោះ។

សម្រាប់ព្រឹត្តិការណ៍«គ្រាប់បែបបង្កៃ» ដែលមើលទៅដូចមានការរៀបចំយ៉ាងត្រឹមត្រូវ នៅកណ្ដាលរាជធានីភ្នំពេញនេះ ត្រូវបានអ្នកតាមដានស្ថានការណ៍នយោបាយកម្ពុជា ជាពិសេសមជ្ឈដ្ឋានពីប្រជាពលរដ្ឋ ចោទជាសំនួរឡើងថា តើគ្រាប់​ផ្ទុះទាំងនោះ នរណាអាចមានលទ្ធភាពលាក់ទុក ឬយកមកផ្លុងចោលដោយងាយយ៉ាងនេះ? តើជាពលរដ្ឋធម្មតា អាច​មាន​សមត្ថភាព ចល័តគ្រឿងផ្ទុះទាំងនេះ បានយ៉ាងងាយស្រួលដូច្នេះបានឬទេ?

តែទោះបីជាយ៉ាងណាក៏ដោយ គេបានជឿជាក់​ថា មិនមានប្រជាពលរដ្ឋ«សមញ្ញ»ណាម្នាក់ ចង់ប្រឡែងលេង ឬចង់បង្កឲ្យ​មានបញ្ហាដ៏អាក្រក់បែបនេះកើតឡើងឡើយ បន្ទាប់ពីប្រទេសកម្ពុជាបានហែលឆ្លងកាត់ ការប្រើប្រាស់អាវុធជាតិផ្ទុះ ក្នុង​រយៈពេលសង្គ្រាមក្នុងស្រុកដ៏រ៉ាំរ៉ៃ ជាង៣០ឆ្នាំ កន្លងមកនោះ។ គេបានទម្លាក់ការទទួលខុសត្រូវមួយផ្នែកទៅលើអាជ្ញាធរ ទាក់ទងនឹងសមត្ថភាពគ្រប់គ្រងជាតិផ្ទុះ នៅក្នុង​ប្រទេសកន្លងមក ហើយនេះអាចជា«លេស»មួយ ដើម្បីអាចឲ្យអាជ្ញាធរ​រឹតបន្តឹងការឆែកឆេរ ក្រោមរូបភាពរកអាវុធជាតិផ្ទុះ ខណៈពេលអាចមានមហាជនរាប់សិបពាន់នាក់ អាចនឹងសម្រុកចូល​មករាជធានីភ្នំពេញ ដើម្បីចូលរួមធ្វើបាតុកម្មជាមួយគណបក្សសង្គ្រោះជាតិ នៅថ្ងៃអាទិត្យទី១៥ខែកញ្ញាខាងមុខ៕

(វីដេអូ ទាក់ទងនឹងបញ្ហានេះ នឹងមានដាក់ជូនក្នុងពេលបន្តិចទៀត)

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី១៣ កញ្ញា ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ