ភ្នំពេញ៖ បើតាមគណកម្មាធិការជាតិរៀបចំការបោះឆ្នោត ដែលទើបនឹងប្រកាសលទ្ធផលនៃការបោះឆ្នោត បានឲ្យដឹងថា​គណបក្សប្រជាជនកម្ពុជា ទទួលបានសម្លេងគាំទ្រពីប្រជាពលរដ្ឋ ៦៨ អាសនៈ ដែលអាចឲ្យគណបក្សប្រជាជនកម្ពុជា បង្កើតរាជរដ្ឋាភិបាលថ្មីបានដោយមិន«ខុសច្បាប់»ទេ ទោះជាគណបក្សប្រឆាំងធ្វើពហិការ មិនចូលរួមក្នុងការបង្កើត​រដ្ឋសភា​ថ្មីក៏ដោយ។ នេះជាការលើកឡើងរបស់លោក ជាម យៀប មន្ត្រីជាន់ខ្ពស់មួយរូបនៃគណបក្សឈ្នះឆ្នោតនេះ។

លោក ជាម យៀប តំណាងរាស្ត្រគណបក្សប្រជាជនកម្ពុជា។ (រូបថត MONOROOM.info/ Soben)

ក្នុងកិច្ចសម្ភាសជាមួយទស្សនាវដ្តីមនោរម្យព័ងអាំងហ្វូ សមាជិកគណៈអចិន្ត្រៃយ៍នៃគណៈកម្មាធិការកណ្តាល គណបក្ស​ប្រជាជនកម្ពុជា លោក ជាម យៀប បានពន្យល់ ក្រោយការប្រកាសបង្ហាញ ពីលទ្ធផលជាផ្លូវការដោយ គ.ជ.ប ថាគណបក្ស​ប្រជាជនកម្ពុជា ទទួលបាន ៦៨ អាសនៈ និងគណបក្សសង្គ្រោះជាតិទទួលបាន ៥៥ អាសនៈ ហើយបើគណបក្សប្រឆាំង​នេះ​ធ្វើពហិការ ដោយមិនមានការស្រុះស្រួលគ្នាទេនោះ គណបក្សប្រជាជនកម្ពុជានឹងធ្វើតាម«រដ្ឋធម្មនុញ្ញ» ពិសេសរដ្ឋធម្មនុញ្ញ​បន្ថែម។

តំណាងរាស្រ្តទើបនឹងជាប់ឆ្នោតរូបនេះ បានបញ្ជាក់យ៉ាងដូច្នេះថា «តាមរដ្ឋធម្មនុញ្ញបន្ថែម ក្នុងឆ្នាំ២០០៤ នីតិកាលទីបី ដែល​ពេលនោះមានភាពទាល់ច្រក ផ្នែកនយោបាយជាងដប់ខែ។ (...) ក្នុងឆ្នាំ២០០៤នេះ ក្រោយពីមានការស្រុះស្រួលគ្នា យើង​បានធ្វើវិសោធកម្មលែងឲ្យមានការឆកល្វែង ឬទាល់ប្រាជ្ញនោះទៀត យើងយកតែ៥០%+១ (ហាសិបភាគរយបូកមួយ) មាន​ន័យស្មើនឹង៦២អសនៈ។ ដូច្នេះគណបក្សប្រជាជនកម្ពុជាទទួលបាន៦៨ អាសនៈអាចធ្វើការដឹកនាំ និងរៀបចំបង្កើត​រដ្ឋសភា​ថ្មីបានហើយ។»

ក្នុងតំណែងជាតំណាងរាស្រ្តជាង៣០ឆ្នាំមកហើយ លោក ជាម យៀប បានបន្តឲ្យដឹងទៀតថា ទោះបីជាមានពហិការ មិន​ចូលរូមរបស់គណបក្សសង្គ្រោះជាតិ ក៏គណបក្សប្រជាជនអាចធ្វើតែម្នាក់ឯងបាន មិនមានការខុសច្បាប់អ្វីនោះទេ ហើយ​គណរដ្ឋមន្រ្តី និងរាជរដ្ឋាភិបាលថ្មីក៏មិនខុសច្បាប់នោះដែរ។

ការលើកឡើងរបស់លោក នៅពេលនេះ ធ្វើឲ្យអ្នកវិភាគ និងអ្នកតាមដានស្ថានការណ៍នយោបាយខ្មែរ សង្ស័យអំពី​សុពលភាពនៃរដ្ឋសភា ដែលមានតែឯកបក្ស និងមិនគ្រប់ចំនួនសមាជិកជាសភាមួយទាំងមូល ស្របតាមការចែង​របស់​មាត្រា៧៦ ដែលបានកំណត់ឲ្យរដ្ឋសភាមានសមាជិករបស់ខ្លួន ដែលជាតំណាងរាស្ត្រជាប់ឆ្នោតយ៉ាងតិច១២០រូប ខណៈ​ពេលដែលគណបក្សសង្គ្រោះជាតិ នៅតែប្រកាន់ជំហរយ៉ាងមុតមាំថា ខ្លួននឹងមិនចូលរួមប្រជុំសភាដំបូងជាដាច់ខាត ប្រសិន​បើគណកម្មការចម្រុះមួយ មិនត្រូវបានបង្កើត។

សូមអានអត្ថបទស្វែងយល់ពីរដ្ឋធម្មនុញ្ញ ជុំវិញលទ្ធភាពនៃការបង្កើតរដ្ឋសភា​ឯកបក្ស ដោយចុចនៅលើទីនេះ។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានថ្លែងបញ្ជាក់ជាថ្មីទៀត ប្រាប់ទស្សនាវដ្តីមនោរម្យព័ងអាំងហ្វូថា ជំហររបស់គណបក្សសង្គ្រោះជាតិ នឹងបន្តរធ្វើមហាបាតុកម្មដូចដែល លោកសមរង្ស៊ី និងលោក កឹមសុខា បានប្រកាស​ក្នុង​មហាបាតុកម្មអហិង្សា កាលពីថ្ងៃទី៧ ខែកញ្ញា ជាមួយនិងញត្តិទាំងបីចំណុច ដែលមហាបាតុកម្មអហិង្សានឹង​ដាក់ថ្វាយ​ដល់​ព្រះមហាក្សត្រ។ ក្នុងញត្តិនោះ គណបក្សសង្គ្រោះជាតិបានបញ្ជាក់ថាគណបក្សប្រឆាំង ទាមទារឲ្យមានការបង្កើត​គណៈ​កម្មការចម្រុះឯករាជ្យមួយ ដើម្បីដោះស្រាយភាពមិនប្រក្រតីនៃការបោះឆ្នោត និងស្នើសុំឲ្យ គ.ជ.ប ពន្យារពេល ប្រកាស​លទ្ធផលបោះឆ្នោតជាបណ្តោះអាសន្នសិន។

«មិនមែនចង់ធ្វើបាតុកម្ម អាចធ្វើបាននោះទេ»

អ្នកនាំពាក្យគណបក្សសង្គ្រោះជាតិរូបនេះបានបន្តរថា មហាបាតុកម្មនឹងមានជាបន្តរក្នុងទាមទារ ឲ្យមានការដោះស្រាយពី​លទ្ធផលនៃការបោះឆ្នោតនេ។ តែលោក យឹម សុវណ្ណ មិនបានបញ្ជាក់ពីពេលវេលា ណាមួយជាក់លាក់នោះនៅឡើយ។ ផ្ទុយទៅវិញ លោក ជៀម យៀប បានព្រមានតបវិញថា សុំច្បាប់ធ្វើបាតុកម្មម្តង ធ្វើបានតែម្តងនោះទេ ហើយរដ្ឋាភិបាល​ក៏​នឹង​ពិចារណា ពីការស្នើសុំសារជាថ្មី មិនមែនចេះតែសុំហើយអាចធ្វើបាននោះទេ។

ការបែខ្នងដាក់គ្នារបស់គណបក្សជាប់ឆ្នោតទាំងពីរ ត្រូវបានលោក គល់ បញ្ញា នាយកប្រតិបត្តិនៃអង្គការខុមហ្រែល សម្ដែ​ង​ប្រតិកម្ម ដោយបានបញ្ជាក់ថា គណបក្សប្រជាជនមិនគួណាប្រងើយកន្តើយ ចំពោះការស្នើសុំរបស់គណបក្សប្រឆាំង ក្នុង​ការបង្កើតគណកម្មការចម្រុះឯករាជ្យនោះទេ។ លោកបន្តរថា គណបក្សប្រជាជនកម្ពុជា មុននឹងធ្វើការបដិសេធនូវ​សំណើរ​ខាងលើនេះ គួតែមានជំនួបមួយនៃថ្នាក់ដឹកនាំកំពូលរបស់បក្សទាំងពីរសិន៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី៨ កញ្ញា ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ