មហាបាតុកម្មប្រឆាំងលទ្ធផលឆ្នោតរបស់គណបក្សសង្គ្រោះជាតិ (Live)
- ដោយ: មនោរម្យ.អាំងហ្វូ
- កែប្រែចុងក្រោយ: September 07, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
នេះជាទំព័រផ្សាយផ្ទាល់ ពីព្រឹត្តិការណ៍ថ្ងៃទី៧ខែកញ្ញា ឆ្នាំ២០១៣ នៃមហាបាតុកម្មប្រឆាំងលទ្ធផល នៃការបោះឆ្នោតជ្រើសតាំងតំណាងរាស្ត្រអាណត្តិទីប្រាំនៅកម្ពុជា ឆ្នាំ២០១៣ រៀបចំដោយគណបក្សសង្គ្រោះជាតិ។
សូមអញ្ជើញត្រឡប់ចូលមកអាន នៅក្នុងទំព័រដដែលនេះវិញ ឬប្រសិនបើលោកអ្នក នៅទីនេះរួចជាស្រេចហើយ លោកអ្នកគ្រាន់តែចុចលើប៊ូតុង «ធ្វើបច្ចុប្បន្នភាព (refresh/Actualiser la page)» ឬ ប៊ូតុង «F5» ដើម្បីអាននូវពត៌មាន ឬរបាយការណ៍ ដែលកើតឡើងជាបន្ដបន្ទាប់ភ្លាមៗ ដាក់ផ្សាយជូនពីព្រឹត្តិការណ៍នេះ។ សូមបញ្ជាក់ថា ម៉ោងដែលដាក់ផ្សាយ នៅលើទំព័រនេះ ជាម៉ោងនៅរាជធានីភ្នំពេញ បើទោះជាការផ្សាយផ្ទាល់របស់មនោរម្យព័ងអាំងហ្វូ ធ្វើចេញពីទីក្រុងប៉ារីស ប្រទេសបារាំងក៏ដោយ។
--------------------------------
- ថ្ងៃសៅរ៍ទី៧ខែកញ្ញា ម៉ោង១១និង៣០នាទីព្រឹក៖
សូមជូនរូបភាពមួយចំនួន៖
- ថ្ងៃសៅរ៍ទី៧ខែកញ្ញា ម៉ោង១០និង៥០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
លោក កឹម សុខា ឡើងថ្លែងទៅកាន់ក្រុមបាតុករជាលើកទី ២ ដើម្បីបិទកម្មវិធី ធ្វើមហាបាតុកម្មនៅថ្ងៃនេះ។ នៅបរិវេណទីលានសួនសេរីភាពឥឡូវនេះ ព្រះអាទិត្យបានបញ្ចេញ កម្តៅយ៉ាងខ្លាំង។ តែបើទោះបីជាក្តៅយ៉ាងណា ក៏បាតុករនៅតែឈរហាលថ្ងៃ ស្តាប់ការថ្លែងរបស់មេដឹកនាំរបស់ខ្លួនដែរ។ គួរកត់សម្គាល់ថា មកដល់ម៉ោងជិត ១១ ព្រឹកនេះ នៅមិនទាន់ មានការចាប់ផ្តើមស្មឹងស្មាធនោះទេ ពោលគឺសុទ្ធតែការថ្លែងពីសំណាក់ថ្នាក់ដឹកនាំ គណៈបក្សសង្គ្រោះជាតិប៉ុណ្ណោះ។
- ថ្ងៃសៅរ៍ទី៧ខែកញ្ញា ម៉ោង១០និង៤០នាទីព្រឹក៖
ខ្លឹមសាររួមក្នុងសេចក្តីថ្លែងការណ៍ផ្លូវការ របស់គណបក្សសង្គ្រោះជាតិនៅក្នុងមហាបាតុកម្មអហិង្សា៖
១. បដិសេធន៍លទ្ធផលបណ្តោះអាសន្ននៃការបោះឆ្នោត។
២. ទាមទារបង្កើតឲ្យមានគណៈកម្មការចម្រុះឯករាជ្យ ដើម្បីដោះស្រាយភាពមិនប្រក្រតីនៃការបោះឆ្នោត ដែលមានសមាសភាពចូលរួមពីតំណាងគណបក្សប្រជាជនកម្ពុជា គណបក្សសង្គ្រោះជាតិ និងអង្គការក្រៅរដ្ឋាភិបាលជាតិ និងអន្តរជាតិ។ លោកបានបញ្ជាក់ថា គណៈកម្មការចម្រុះនេះគឺមិនត្រូវមានវត្តមានរបស់ គ.ជ.ប ទេ ព្រោះ គ.ជ.ប ជាអ្នកបង្កើតឲ្យមានបញ្ហាមិនប្រក្រតីទាំងនេះ។
៣. ស្នើ គ.ជ.ប ពន្យាការប្រកាសលទ្ធផលផ្លូវការ រហូតទាល់តែមានដំណោះស្រាយ លើបញ្ហានៃភាពមិនប្រក្រតីជាមុនសិន។ បើ គ.ជ.ប នៅតែរឹងទទឹងក្នុងការប្រកាសលទ្ធផលផ្លូវការ គណបក្សសង្គ្រោះជាតិនឹងប្រកាន់ជំហររឹងក្នុងការតវ៉ាផងដែរ។
៤. បើពុំមានបង្កើតគណៈកម្មការចម្រុះឯករាជ្យទេ ហើយ គ.ជ.ប នៅតែប្រកាសលទ្ធផលផ្លូវ គណបក្សសង្គ្រោះជាតិនឹងបន្ត ធ្វើមហាបាតុកម្មអហិង្សាជាបន្តទៀតរហូតដល់មានដំណោះស្រាយចំពោះបញ្ហាភាពមិន ប្រក្រតីទាំងនេះ។
- ថ្ងៃសៅរ៍ទី៧ខែកញ្ញា ម៉ោង១០និង៣០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
បើទោះបីជាសម្តេចស្ឃទាំងពីគណៈ បានចេញសង្ឃប្រកាសអំពាវនាវ មិនអនុញ្ញាតិឲ្យព្រះសង្ឃចូលរួមធ្វើមហាបាតុកម្ម ជាមួយនឹងគណបក្សប្រឆាំងក៏ដោយ ក៏នៅថ្ងៃនេះព្រះសង្ឃរាប់រយអង្គ បានចូលរួមធ្វើមហាបាតុកម្ម ជាមួយនឹងគណបក្សសង្រ្គោះជាតិដែរ។
ព្រះតេជគុណមួយអង្គ ព្រះនាម សុវណ្ណ គង់នៅវត្តស្ទឺងមានជ័យ បានមានសង្ឃដីកាថា ព្រះអងនិមន្តមកនេះក្នុងនាមជាកូនខ្មែរម្នាក់ដែលស្រឡាញ់ដែលស្នេហាទឹកដី កំណើតរបស់ព្រះអង្គ។ ព្រះតេជគុណ មានថេរដីកាបន្តថា ការមិនអនុញ្ញាតឲ្យព្រះសង្ឃចូលរួមធ្វើមហាបាតុកម្មនេះ ជាការរំលោភលើសិទ្ធិរបស់ព្រះអង្គ។ ព្រះតេជគុណ បានចោទជាសំនួរថា ប្រសិនបើមិនឲ្យព្រះសង្ឃធ្វើបាតុកម្ម ចុះហេតុអ្វីសម្តេចសង្ឃទេព វង្ស និមន្តទៅទេសនានៅទីណាក៏ដោយនិយាយ តែរឿង ៧ មករា និងលើកតម្កើនតែបក្សប្រជាជន?
- ថ្ងៃសៅរ៍ទី៧ខែកញ្ញា ម៉ោង១០និង២០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
ពេលនេះ ព្រះអង្គម្ចាស់ស៊ីសុវត្ថិ ធម្មិកោ កំពុងតែឡើងថ្លែងទៅកាន់ក្រុមបាតុករថា «យើងត្រូវការយុត្តិធម៌។ ដូច្នេះការធ្វើបាតុកម្មរបស់យើង មិនចប់នោះទេ លុះត្រាតែយើងទទួលបានយុត្តិធម៌។» ព្រះអង្គម្ចាស់ ធម្មិកោ ក៏បានបញ្ជាក់ដែរថា នៅសប្តាហ៍ក្រោយនេះ ព្រះមហាក្សត្រខ្មែរ នឹងយាងត្រប់ពីប្រទេស ចិនមកកាន់មាតុប្រទេសវិញ ហើយនៅពេលនោះ ព្រះអង្គម្ចាស់នឹងទាមទារ ឲ្យព្រះមហាក្សត្ររកយុត្តិធម៌ជូនពលរដ្ឋ។
- ថ្ងៃសៅរ៍ទី៧ខែកញ្ញា ម៉ោង១០និង១០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
នៅពេលនេះ នៅលើវេទិការ មានការផ្លាស់ប្ដូរវេនគ្នាទៅវិញទៅមក ដើម្បីច្រៀងនូវចម្រៀង ដែលមានលក្ខណៈបម្រើឲ្យគណបក្ស និងមានលក្ខណៈជាតិនិយម។
គួរឲ្យកត់សម្គាល់ផងដែរថា ខណៈពេលដែលលោកសម រង្ស៊ី កំពុងតែថ្លែងទៅកាន់បាតុករ រាប់ម៉ឺននាក់ធ្វើមហាបាតុកម្មអហិង្សា នៅលើវេទិកា ប្រពន្ធលោក សម រង្ស៊ី លោកស្រី ជូឡុង សូមូរ៉ា បែជាដើរជុំវិញបរិវេណកន្លែងធ្វើបាតុកម្ម ដើម្បីផ្តិតយករូបថតអ្នកចូលរួមក្នុងបាតុកម្ម។
- ថ្ងៃសៅរ៍ទី៧ខែកញ្ញា ម៉ោង១០និង០០នាទីព្រឹក៖
សេចក្ដីរាយការណ៍ពីអង្គការខមហ្វ្រែល៖
ប្រតិកម្មរវាងបាតុករ និងអ្នកយកព័ត៌មានរបស់ទូរទស្សន៍ ស៊ីអិនស៊ី
នៅទីតាំងស្ពាននាគតាមបណ្តាយផ្លូវព្រះនរោត្តមក្បែរវត្តភ្នំ ការសង្កេតឃើញថា មានវត្តមានរបស់អ្នកយកព័ត៌មានរបស់ស្ថានីយ៍ទូរទស្សន៍ ស៊ីអិនស៊ី ដែលមាននិន្នាការគាំទ្រគណបក្សប្រជាជនកម្ពុជា បានចុះថតយកសកម្មភាពរបស់បាតុករ។ អ្វីដែលគួរឲ្យកត់សម្គាល់នោះគឺបាតុករបានទាមទារឲ្យអ្នកយកព័ត៌មានទាំង នោះ ទៅផ្តិតយកសកម្មភាពនៅទីលានប្រជាធិបតេយ្យ ព្រោះនៅទីនោះមានសកម្មភាពបាតុករផុសផុល និងមានការថ្លែងរបស់ថ្នាក់ដឹកនាំរបស់គណបក្សសង្គ្រោះជាតិ។ មួយវិញទៀតបាតុករបានទាមទារឲ្យមានការចាក់ផ្សាយផង បើថតហើយមិនចាក់ផ្សាយទេនោះមិនចាំបាច់ថតទេ។ អ្នកយកព័ត៌មាននោះបានសន្យាថា ស្ថានីយ៍នឹងធ្វើការចាក់ផ្សាយ នៅ១២ថ្ងៃត្រង់នេះ។
- ថ្ងៃសៅរ៍ទី៧ខែកញ្ញា ម៉ោង០៩និង៥០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
បន្ទាប់ពីថ្នាក់ដឹកនាំនៃគណបក្សសង្គ្រោះជាតិ បានថ្លែងទៅកាន់ក្រុមបាតុករចប់អស់ហើយ នៅពេលនេះ ក្រុមតន្ត្រីរបស់បក្សសង្គ្រោះជាតិ កំពុងតែច្រៀងចម្រៀងទាក់ទងនឹងការ ធ្វើបាតុកម្ម និងចម្រៀងរបស់បក្ស។ យើងកត់សម្គាល់ថា មកទល់ពេលនេះ អស់រយៈពេលជាងពីរម៉ោង ការស្មឹងស្មាធ បួងសួងសុំសន្តិភាពនៅមិនទាន់ចាប់ផ្តើមនោះទេ។
- ថ្ងៃសៅរ៍ទី៧ខែកញ្ញា ម៉ោង០៩និង៤០នាទីព្រឹក៖
ដោយសារមានការស្នើសុំរបស់ប្រិយមិត្ត យើងសូមដាក់រូបភាពផ្សាយផ្ទាល់ របស់គណបក្សសង្គ្រោះជាតិនៅទីនេះដូចតទៅ៖
- ថ្ងៃសៅរ៍ទី៧ខែកញ្ញា ម៉ោង០៩និង៣០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
បន្ទាប់ពីលោក សម រង្ស៊ី ដែលជាប្រធានគណបក្សសង្គ្រោះជាតិ បានឡើងថ្លែងទៅកាន់បាតុករនោះមក នេះជាវេនរបស់ លោក កឹម សុខា ជាអនុប្រធានគណបក្សម្ដង។ លោកបានថ្លែងថា មហាបាតុកម្មថ្ងៃនេះ គឺចង់បង្ហាញគោលជំហរគាំទ្រអ្វីដែលប្រជាពលរដ្ឋចង់បាន គឺ«មិនមែនយុត្តិធម៌ក្លែងក្លាយ យើងចង់បានយុត្តិធម៌ពិតប្រាកដ ការធ្វើបាតុកម្មនេះព្រោះ គណបក្សសង្រ្គោះជាតិ និងអង្គការពាក់ព័ន្ធរកឃើញថាការបោះឆ្នោតបានប្រព្រឹត្តទៅដោយមិនប្រក្រតី ខ្វះតម្លាភាព គ្មានយុត្តិធម៌ បាត់ឈ្នោះ បន្លំឈ្នោះជាដើម ហើយនេះជាកំហុសរបស់ គ.ជ.ប»។ គណបក្សសង្រ្គោះជាតិ ចង់ឲ្យមានការដោះស្រាយភាពមិនប្រក្រតី តាមរយៈគណៈកម្មាចម្រុះយ៉ាងពិតប្រាដត។
លោក កឹម សុខាគម្រាមថា «បើ គ.ជ.ប នៅតែរឹងទទឺងប្រកាសលទ្ធផលឆ្នោតជាផ្លូវការ យើងក៏រឹងដែរ»។
- ថ្ងៃសៅរ៍ទី៧ខែកញ្ញា ម៉ោង០៩និង២០នាទីព្រឹក៖
ព័ត៌មានពីខាងអង្គការខបហ្វ្រែល (COMFREL) ដែលជាអង្គការសង្កេតការលើការបោះឆ្នោត បានឲ្យដឹងថា ចំនួនបាតុករដែលបានចូលរួមមហាបាតុកម្មអហិង្សា នៅទីលានប្រជាធិបតេយ្យ ក្នុងនាទីនេះមានការកើនឡើងប្រមាណ«១សែន»នាក់។
- ថ្ងៃសៅរ៍ទី៧ខែកញ្ញា ម៉ោង០៩និង១០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
លោក សម រង្ស៊ី មានថ្លែងទៅកាន់ហ្វូងបាតុករថា ការធ្វើបាតុកម្មនេះដើម្បីទាមទារយុត្តិធម៌សម្រាប់ម្ចាស់ឆ្នោត ជាការទាមទារតាមបែបវប្បធម៌អហិង្សា។ «ប្រជាជាតិខ្មែរបានរងគ្រោះពីអំពើហិង្សាយូរមកហើយ ពួកគេបានប្រើអំពើហិង្សា អំពើហិង្សាសម្លាប់អ្នកប្រជាធិបតេយ្យ យើងរួមគ្នាលប់បំបាត់អំពើហិង្សា។ ចាប់ពីពេលនេះគឺខ្មែរចេះស្រលាញ់ខ្មែរ ខ្មែរចេះគោរពខ្មែរ ខ្មែរចេះដោះស្រាយជាមួយគ្នាដោយយុត្តិធម៌ យើងត្រូវលុបបំបាត់អំពើហិង្សា ក្នុងសង្គមយើងចាប់ពីពេលនេះតទៅ។» នេះជាការថ្លែងរបស់លោក សម រង្ស៊ី ក្រោមសម្លេងគាំទ្រ របស់ពួកអ្នកគាំទ្រ។ ពួកគេស្រែកឡើងថា «មានយុត្តិធម៌ គឺមានសន្តិភាព»។
- ថ្ងៃសៅរ៍ទី៧ខែកញ្ញា ម៉ោង០៩និង០០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
បាតុករបានចូលមកកាន់ទីលានប្រជាធិបតេយ្យ មានចំនួនកាន់តែច្រើនឡើងៗ។ តាមការប៉ាន់ប្រមាណ ដោយសង្កេតតាមសមាមាត្រនៃផ្ទៃក្រឡារបស់ទីលាន និងប្រៀបធៀបទៅនឹងការជួបជុំដែលធ្លាប់ធ្វើកន្លងមក ចំនួនបាតុករអាចមានចំនួនច្រើនជាង ៥ម៉ឺននាក់។ យើងសង្កេតឃើញអាជីវករ នៅផ្សារដែលជិតនេះ (ផ្សារចាស់ និងផ្សារថ្មី) ក៏បានធ្វើដំណើរមកចូលរួមដែរ។
- ថ្ងៃសៅរ៍ទី៧ខែកញ្ញា ម៉ោង០៨និង២០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
លោក គង់ គាំ សមាជិកព្រឹទ្ធសភាកម្ពុជា និងជាប្រធានគណបក្ស សម រង្ស៊ី បានឡើងថ្លែងនៅលើវេទិកា ថាគណបក្សសង្គ្រោះជាតិ បានឈ្នះការបោះឆ្នោត ហើយថាដំណោះស្រាយដែលធ្វើឡើយដោយ គ.ជ.ប ទៅលើភាពមិនប្រក្រតីទាំងឡាយ ព្រមទាំងក្រុមប្រឹក្សាធម្មនុញ្ញនោះផង មិនបានផ្ដល់យុត្តិធម៌ ដល់ម្ចាស់ឆ្នោតនោះទេ។ លោកបញ្ជាក់ថា នេះជាមូលហេតុដែល គណបក្សសង្គ្រោះជាតិ ទាមទារឲ្យបង្កើតនូវគណកម្មការចម្រុះឯករាជ្យមួយ ដើម្បីអង្កេតលើការបោះឆ្នោតនេះ។
ដោយឡែក គេសង្កេតឃើញ លោក ជួន សុវណ្ណ ស្នងការនគរបាលរាជធានីភ្នំពេញ ក៏បានមកដល់ទីលានប្រជាធិបតេយ្យនេះដែរ។
- ថ្ងៃសៅរ៍ទី៧ខែកញ្ញា ម៉ោង០៨និង១០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
មានការបិទផ្លូវនៅមុខក្រសួងការពារជាតិ ហើយមានការដាក់ពង្រាយកងកម្លាំងជាច្រើនសិបនាក់នៅទីនោះ។ រូបថតនឹងបញ្ជូនមកតាមក្រោយ។
- ថ្ងៃសៅរ៍ទី៧ខែកញ្ញា ម៉ោង០៨និង០០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
លោក សម រង្ស៊ី និងលោក កឹម សុខា ប្រធាន អនុប្រធានគណបក្សសង្គ្រោះជាតិ បានមកដល់លើវេទិកា របស់គណបក្ស ដែលសង់នៅលើទីលានប្រជាធិបតេយ្យ។ លោកទាំងពីរ បានលើកដៃជាសញ្ញាទទួលស្វាគមន៍ ទៅកាន់បាតុករទាំងអស់ ដែលមានវត្តមាននៅទីនោះ។ សម្រែកជ័យឃោស ក៏ត្រូវបានបន្លឺឡើង យ៉ាងទ្រហឹងអឺងអាប់។
ក្នុងពេលនេះ ព្រះសង្ឃកំពុងសូត្រជយន្ដោ ឲ្យទៅថ្នាក់ដឹកនាំទាំងនេះ។
- ថ្ងៃសៅរ៍ទី៧ខែកញ្ញា ម៉ោង០៧និង៥០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
នៅលើទីលានប្រជាធិបតេយ្យ មានការបែងចែកជាប្លង់ សម្រាប់ប្រជាពលរដ្ឋអង្គុយ ព្រះសង្ឃ និងសម្រាប់អ្នកសារព័ត៌មាន។ នៅខាងមុខ មានការដាក់ស្តង់ ដើម្បីទទួលការឧបត្ថមចំនួនប្រាំមួយកន្លែង និងមានការចែកទឹកដោយឥតគិតថ្លៃ សម្រាប់អ្នកចូលរួម។ យើងសង្កេតឃើញមាន អ្នកសារព័ត៌មានជាតិ និងអន្តរជាតិ ព្រមទាំងមន្ត្រីអង្គការសិទ្ធិមនុស្ស ឃ្លាំមើលការរំលោភសិទ្ធិមនុស្ស ជាច្រើនសិបនាក់ ចូលរួមយកព័ត៌មាន និងឃ្លាំមើលដំណើរប្រព្រឹត្តិទៅ នៃមហាបាតុកម្មនេះផងដែរ។
- ថ្ងៃសៅរ៍ទី៧ខែកញ្ញា ម៉ោង០៧និង៣០នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
ពីម៉ោង៦ ចាប់ពីស្ពានអាកាសពេទ្យលោកសង្ឃ មកតាមបណ្ដោយផ្លូវរ៉ូស្សី មានចរាចរណ៍ជាធម្មតា គ្មានការដាក់កំលាំងសមត្ថកិច្ចណាមួយ គួរឲ្យចាប់អារម្មណ៍នោះទេ។ ចំណែកនៅឯទីលានប្រជាធិបតេយ្យ ការរក្សាសន្តិសុខដោយកម្លាំងសមត្ថកិច្ច ដូចជាប្រព្រឹត្តិទៅបានល្អ មិនទាន់មានសេចក្ដីរាយការណ៍មកថា មានការហាមឃាត់ក្នុងការចូលរួមរបស់ប្រជាពលរដ្ឋនោះនៅឡើយ។
ប៉ុន្តែនៅក្រៅរាជធានី ប្រភពមួយស្និតនឹងគណបក្សប្រឆាំង បានថ្លែងថា មានការហាមឃាត់ព្រះសង្ឃជិត៤០០អង្គ នៅចំនុចព្រែកព្នៅដោយសមត្ថកិច្ចនគរបាល។ ប៉ុន្តែព័ត៌មាននេះ នៅមិនទាន់មានការអះអាងដោយប្រភពឯករាជ្យណាផ្សេងបាននៅឡើយ។
- ថ្ងៃសៅរ៍ទី៧ខែកញ្ញា ម៉ោង០៧និង១៥នាទីព្រឹក៖
សេចក្ដីរាយការណ៍របស់អ្នកសារព័ត៌មានមនោរម្យព័ងអាំងហ្វូ៖
មនុស្សម្នាចាប់ផ្ដើមធ្វើដំណើរមកកាន់ទីលានប្រជាធិបតេយ្យ ជាបណ្ដើរៗ។ ពួកគេមួយចំនួន មានពាក់កំណាត់បូពណ៌លឿង នៅលើក្បាល ខ្លះទៀតកាន់មកជាមួយនូវផ្ទាំងបដា ដែលសុទ្ធតែមានខឹមសារប្រឆាំងនឹងលទ្ធផលនៃការបោះឆ្នោត និងចោទ គណកម្មាធិការជាតិរៀបចំការបោះឆ្នោត ថាមិនយុត្តិធម៌នោះជាដើម។ នៅក្នុងចំណោមនោះ គេក៏សង្កេតឃើញមានព្រះសង្ឃ ប្រមាណជាជាង៥០អង្គ និមន្តចូលរួមជាបណ្ដើរៗដែរ។
- ថ្ងៃសៅរ៍ទី៧ខែកញ្ញា ម៉ោង០៧និង០០នាទីព្រឹក៖
រូបភាពនៃអ្នកដែលបានមកត្រៀមធ្វើបាតុកម្ម តាំងពីពេលយប់៖
(រូបភាពទំព័រហ្វេសប៊ុកនៃវិទ្យុសម្លេងសហរដ្ឋអាមេរិក)
- ថ្ងៃសៅរ៍ទី៧ខែកញ្ញា ម៉ោង០៦និង៣០នាទីព្រឹក៖
គណបក្សសង្គ្រោះជាតិបានបើកកម្មវិធីផ្សាយផ្ទាល់ នៅលើទំព័រហ្វេសប៊ុករបស់ខ្លួន ដែលទើបនឹងដាក់ឲ្យដំណើរការ នៅយប់ថ្ងៃទី៦ចូលថ្ងៃទី៧ខែកញ្ញានេះប៉ុណ្ណោះ។ ការផ្សាយផ្ទាល់នេះ ត្រូវបានធ្វើតាមរយៈកម្មវិធីមួយរបស់បណ្ដាញសង្គមហ្វេសប៊ុក ដោយប្រើប្រាស់ប្រព័ន្ធគេហទំព័រចែកផ្សាយវីដូអូផ្ទាល់របស់ USTREAM ដែលគណបក្សនេះធ្លាប់បានធ្វើកន្លងមក។ អ្នកចង់តាមដានព្រឹត្តិការណ៍មហាបាតុកម្មនេះ នៅជុំវិញពិភពលោក អាចចូលទៅទស្សនារូបភាពជាវីដេអូ នៅទីនោះបាន ដោយគ្រាន់តែចុចនៅលើទីនេះ។
ប៉ុន្តែការផ្សាយ នៅលើបណ្ដាញអាំងធើណែត បែបនេះ បានរងនូវគុណវិបត្តិជាច្រើន ដូចជាមានការកំណត់ចំនួនមនុស្សចូលទៅទស្សនា ឬពិបាកក្នុងការតាមដានប្រសិនបើគេមានការភ្ជាប់បណ្ដាញ ដែលមានល្បឿនយឺតជាដើម។ ទោះជាយ៉ាងណាក៏ដោយ នេះអាចចាត់ទុកជាជំហានមួយថ្មី ដែលគណបក្សប្រឆាំងបានបង្កើតឡើង ដើម្បីបញ្ជូនរូបភាពនៃគណបក្សរបស់ខ្លួនទៅកាន់មហាជន បន្ទាប់ពីគណបក្សនេះធ្លាប់សុំឲ្យក្រសួងពត៌មាន អនុញ្ញាតឲ្យខ្លួនមានវិទ្យុឬទូរទស្សន៍ មិនបានសម្រេចជាច្រើនដងរួចមក។
- ថ្ងៃសៅរ៍ទី៧ខែកញ្ញា ម៉ោង០៦និង១៥នាទីព្រឹក៖
ខាងក្រោមនេះ ជាលក្ខខ័ណ្ឌដែលសាលារាជធានីភ្នំពេញ ក្រោមការចង្អុលបង្ហាញពីក្រសួងមហាផ្ទៃ កំណត់ឲ្យគណបក្សសង្គ្រោះជាតិ រៀបចំធ្វើបាតុកម្មថ្ងៃទី០៧ខែកក្កដានេះ ៖
- បាតុកម្មធ្វើពីម៉ោង០៧ និងត្រូវបិទបញ្ចប់នៅម៉ោង១២ថ្ងៃត្រង់
- បាតុករត្រូវកំណត់មិនឲ្យលើសពី១ម៉ឺននាក់
- មិនឲ្យដង្ហែជាក្បួន
- មិនឲ្យបោះជាជំរុំ បានសេចក្ដីថា មនុស្សមកចូលរួមអាចឈរអង្គុយធម្មតា តែគ្មានការធ្វើជាតូបឬជម្រកបណ្ដោះអាសន្ន អ្វីឡើយ។ ចប់បាតុកម្មកាលណា នាំគ្នាំបំបែកជួរជាបន្ទាន់។
ប៉ុន្តែការកំណត់ខាងលើ ត្រូវបានលោក កឹម សុខា វាយតម្លៃថា ជាការ«កំណត់»សិទ្ធិសេរីភាព ក្នុងការបញ្ចេញមតិរបស់ប្រជាពលរដ្ឋដែលមានចែង និងការពារដោយរដ្ឋធម្មនុញ្ញ នៃព្រះរាជាណាចក្រកម្ពុជា។ ថ្លែងនៅក្នុងកម្មវិធីវេទិកាអ្នកស្ដាប់វិទ្យុអាស៊ីសេរី យប់ថ្ងៃទី០៦ខែកញ្ញា លោកបាននិយាយថា ពេលវេលានៃការធ្វើបាតុកម្មដែលគណបក្សសង្គ្រោះជាតិយល់ព្រមជាមួយអាជ្ញាធរ មិនចំណុះទៅលើការចង់បាន នៃទឹកចិត្តរបស់ប្រជាពលរដ្ឋនោះទេ ហើយចំនួនបាតុករ ក៏វាអាស្រ័យទៅលើការចង់ចូលរួមរបស់ពលរដ្ឋនោះដែរ។ គេត្រូវគោរព ទៅដល់សិទ្ធិនៃការចង់បញ្ចេញមតិ របស់ពួកគាត់ទាំងនោះ។
លោក កឹម សុខា បានសង្កត់ធ្ងន់ បើរដ្ឋាភិបាលគ្មានសមត្ថភាពថែរក្សាសណ្ដាប់ធ្នាប់ ផ្ដល់លទ្ធភាពទៅឲ្យពលរដ្ឋរបស់ខ្លួន ធ្វើការសម្ដែងមតិទេ លោកស្នើឲ្យរដ្ឋាភិបាលនេះ ចុះចេញពីតំណែង ដើម្បីផ្ដល់ឱកាសទៅអ្នកដែលមានសមត្ថភាពឲ្យធ្វើជំនួសវិញ។
ក្រុមអ្នកគាំទ្រគណបក្សសង្គ្រោះជាតិ នៅទីលានប្រជាធិបតេយ្យ កាលពីថ្ងៃទី០៦ខែសីហាឆ្នាំ២០១៣។ (រូបថត MONOROOM.nfo/ U. Bory)
ជាបថម ដើម្បីស្វែងយល់ ឬអានឡើងវិញនូវព្រឹត្តិការណ៍ដែលបានប្រែប្រួល ក្នុងរយៈពេលចុងក្រោយ ជុំវិញការបោះឆ្នោតជ្រើសតាំងតំណាងរាស្ត្រឆ្នាំ២០១៣នេះ សូមអញ្ជើញចូលទៅរកអាន ដោយចុចលើទីនេះ។