ក្លិបលីវើភូល (Liverpool) ពុំទាន់កំណត់មាត្រដ្ឋានពេលវេលាច្បាស់លាស់នៅឡើយទេ សម្រាប់ការត្រឡប់មកវិញ​របស់​កីឡាករ ហ្គាឡិន ចនសិន (Glen Johnson) បន្ទាប់ពីខ្សែការពារស្លាបស្តាំរូបនេះ របួសគ្រេចកជើង កំឡុងការប្រកួតយក​ជ័យជំនះលើក្រុម ម៉ែនឆេស្ទើ យូណៃធីត (Manchester United) កាលពីថ្ងៃអាទិត្យ។

កីឡាករ ហ្គាឡិន ចនសិន របស់ក្រុមបាល់ទាត់អង់គ្លេស លីវើភូល។ (រូបថត ក្លិបលីវើភូល)

កីឡាករអន្តរជាតិអង់គ្លេស វ័យ២៩ឆ្នាំ បានដូរចេញនៅនាទីទី៧៨ ខណៈដែលក្រុមលីវើភូល បំបាក់ម៉ែនញូ ១-០ ហើយ​គាត់ត្រូវពាក់បន្ទះការពារស្រោបជើង នៅពេលដែលចាកចេញពីកីឡាដ្ឋាន អេនហ្វៀល (Anfield)។

ចនសិន បានរងរបួស ក្រោយពេលប៉ះទង្គិចគ្នាមួយទំហឹង ជាមួយនឹងកីឡាករខ្សែការពារស្លាបឆ្វេងរបស់ម៉ែនញូ ផាទ្រីស អេវើរ៉ា (Patrice Evra) ក្នុងការប្រកួតវគ្គទី២ ហើយបន្ទាប់មកគាត់ត្រូវបានដូរជំនួសដោយកីឡាករបម្រុង អេនដ្រេ វីសដុម (Andre Wisdom)។

ក្លិបហង្សក្រហម បានប្រកាសថា ដោយសារតែមានបញ្ហារបួស ទើបបង្ខំឲ្យ ចនសិន ត្រូវអវត្តមានពីក្រុមជម្រើស​ជាតិ​អង់គ្លេស សម្រាប់ការប្រកួតជម្រុះបាល់ទាត់ពិភពលោក ជាមួយនឹងក្រុមម៉ុលដូវ៉ា និងអ៊ុយក្រែន។

សេចក្តីថ្លែងការណ៏របស់ក្លិប បានថ្លែងថា៖ «បន្ទាប់ពីធ្វើការពិនិត្យវិនិច្ឆ័យ ដោយក្រុមគ្រូពេទ្យរបស់ក្លិបនៅទីលានហ្វឹកហាត់ មេលវ៉ូដ (Melwood) រួចមក លទ្ធផលឃើញថា ចនសិនត្រូវតែសម្រាក ដើម្បីព្យាបាលរបួសនៅសប្តាហ៏នេះ។ ការពិនិត្យ​សារជាថ្មី នឹងត្រូវធ្វើឡើងនៅពេលក្រោយ។ ដូច្នេះក្លិបលីវើភូល ពុំទាន់ដឹងកាលបរិច្ឆេត ចំពោះការវិលត្រឡប់​របស់គាត់​នៅ​ឡើយទេ។»

បច្ចុប្បន្នក្រុមហង្សក្រហម លីវើភូល កំពុងតែឈរនៅចំណាត់ថ្នាក់លេខ១ លើកំពូលតារាង បន្ទាប់ពីប្រកួត ៣លើក ឈ្នះ​គូ​ប្រកួត ១-០ ទាំង៣លើក ហើយជាគ្រាប់បាល់របស់ខ្សែប្រយុទ្ធ ដានីញ៉ែល ស្តឺរិជ (Daniel Sturridge) ទាំង៣គ្រាប់។ ៣ប្រកួត ដែលលីវើភូលយកឈ្នះ ១គ្រាប់ៗនោះ ឈ្នះលើក្រុម ស្តូកស៊ីធី (Stoke City), អាស្តុន វីឡា (Aston Villa) និងម៉ែនញូ។

ប៉ុន្តែសម្រាប់ក្រុមជម្រើសជាតិអង់គ្លេសវិញ កំពុងតែមានក្តីបារម្មណ៏យ៉ាងខ្លាំង បន្ទាប់ពីកីឡាករឆ្នើមៗជា​ច្រើនសុទ្ធសឹង​តែមានរបួស ក្នុងនោះមានដូចជា៖ កីឡាករម៉ែនញូ២នាក់ ភីល ចូន (Phil Jones) និងវ៉ែន រ៉ូនី (Wayne Rooney) ខណៈ​ដែលកីឡាករ ជេក វ៊ែលស្ស៊ែ (Jack Wilshere), ដានីញ៉ែល ស្តឺរិជ និងជឺម៉ិន ដេហ្វូ (Jermain Defoe) សុទ្ធតែអវត្តមាន​ពីការ​ហ្វឹកហាត់ ជាមួយនឹងក្រុមជម្រើសជាតិ កាលពីថ្ងៃអង្គារ៏។

ក្រុមតោកំណាចអង់គ្លេសស្ថិតនៅចំណាត់ថ្នាក់លេខ២ នៅពូលអេច (H) ហើយពួកគេនឹងប៉ះក្រុមម៉ុលដូវ៉ា នៅថ្ងៃសុក្រ ទី០៦ ខែកញ្ញា។ បន្ទាប់មកនឹងត្រូវប៉ះក្រុមអ៊ុយក្រែន នៅថ្ងៃអង្គារ៏ ទី១០ ខែកញ្ញា ខាងមុខផងដែរ ដែលជាការប្រកួត​សន្សំ​ពិន្ទុជម្រុះបាល់ទាត់ពិភពលោក តាមពូលនីមួយៗ ដើម្បីយកកៅអីទៅកាន់ប្រទេសប្រេស៊ីល៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៤ ខែកញ្ញា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ