នាយករដ្ឋមន្ត្រីវៀតណាមអរគុណ ហ៊ុន សែន ដែលបានជួយពលរដ្ឋវៀតណាមនៅកម្ពុជា
កាសែតផ្លូវការបស់វៀតណាម ទើបនឹងចេញផ្សាយនូវអត្ថបទមួយរបស់ខ្លួន ស្ដីពីជំនួបរវាងនាយករដ្ឋមន្ត្រីវៀតណាម លោក ងីយេន តាន់ដុង (Nguyên Tân Dung) ជាមួយដៃគូសន្ទនាកម្ពុជារបស់លោក គឺលោកនាយករដ្ឋមន្ត្រី ហ៊ុន សែន កាលពីថ្ងៃច័ន្ទទី០២ខែសីហាកន្លងមកនេះ នាទីក្រុងណានណីង ប្រទេសចិន ក្នុងឱកាសអញ្ជើញចូលរួមក្នុងជំនួបកំពូលលើកទី១០ ស្ដីពីពាណិជ្ជកម្ម និងការវិនិយោគទុនរវាងបណ្ដាប្រទេសសមាជិកអាស៊ាន និងប្រទេសចិន ហៅកាត់តាមភាសាអង់គ្លេសថា CABIS។ ក្នុងជំនួបនោះ នាយករដ្ឋមន្ត្រីវៀតណាម បានថ្លែងអំណរគុណ លោក ហ៊ុន សែន ដែលបានបង្កើតនូវលក្ខខ័ណ្ឌល្អ ដល់ពលរដ្ឋវៀតណាមដែលរស់លើទឹកដីកម្ពុជា ដើម្បីពួកគេបានរកទទួលទានចិញ្ចឹមជីវិត ដោយមិនពិបាក។
ជំនួបរវាងនាយករដ្ឋមន្ត្រីកម្ពុជា លោក ហ៊ុន សែន (ខាងឆ្វេង) និងលោក នាយករដ្ឋមន្ត្រីវៀតណាម លោក ងឹយេន តាន់ដុង នៅទីក្រុងណានណីង ប្រទេសចិន។ (រូបថត VNA)
កាសែតផ្លូវការ (VNA) នោះបានសរសេរថា លោក ងីយេន បានថ្លែងអបអរសាទរដល់ប្រទេសកម្ពុជា ដែលបានរៀបចំប្រកបដោយ«ជោគជ័យ» នូវការបោះឆ្នោតជ្រើសតាំងតំណាងរាស្ត្រនិតិកាលទីប្រាំ កាលពីពេលថ្មីៗនេះ ហើយលោកក៏បានរួមចំណែកអបអរសាទរផងដែរ នូវជ័យជំនះសារជាថ្មីទៀត នៃគណបក្សប្រជាជនកម្ពុជា ដែលមានលោក ហ៊ុន សែន ជាអនុប្រធានគណបក្ស។
តាមលទ្ធផលឆ្នោតដែលប្រកាសដោយ គ.ជ.ប លោកនាយករដ្ឋមន្ត្រីវៀតណាម មានជំនឿ«ជឿជាក់»ថា រដ្ឋសភានិងរដ្ឋាភិបាលកម្ពុជាថ្មីមួយ នឹងត្រូវបានបង្កើតក្នុងពេលឆាប់ៗខាងមុខនេះ ដើម្បីស្ថិរភាពនិងការអភិវឌ្ឍន៍នៃប្រទេសកម្ពុជា។
«ស្ថិរភាពនិងការអភិវឌ្ឍន៍»នៃព្រះរាជាណាចក្រ ដែលលោកនាយករដ្ឋមន្ត្រីកម្ពុជា បានឆ្លើយតបទៅដៃគូរសន្ទនារបស់លោក ថារូបលោក (ហ៊ុន សែន) និងរដ្ឋាភិបាលរបស់លោក នឹងធ្វើអ្វីគ្រប់យ៉ាងតាមដែលអាចធ្វើបាន ដើម្បីថែរក្សាឲ្យបាននូវខ្លឹមសារ នៃពាក្យទាំងពីរម៉ាត់នេះ។ ឆ្លៀតក្នុងឱកាសនោះ លោកនាយករដ្ឋមន្ត្រី ហ៊ុន សែន បានថ្លែងអំណរគុណយ៉ាងជ្រាលជ្រៅ ដល់រដ្ឋាភិបាល និងប្រជាជនវៀតណាម នូវរាល់«ជំនួយ»ទាំងឡាយ ដែលប្រទេសវៀតណាមបានធ្វើមកកម្ពុជា។
បន្ទាប់ពីបានសន្យាថា ប្រទេសទាំងពីរនឹងបន្តកិច្ចសហប្រតិបត្តិការទ្វេភាគី នៅគ្រប់វិស័យនោះមក លោក ងីយេន តាន់ដុង បានថ្លែងអំណរគុណជាថ្មីទៀត ដល់រដ្ឋាភិបាលនិងប្រជាជនកម្ពុជា ដែលបានបង្កើតនូវលក្ខខ័ណ្ឌដ៏ល្អ សម្រាប់ពលរដ្ឋវៀតណាម ដែលរស់នៅលើទឹកដីកម្ពុជា ទទួលបាននូវភាពនឹងនរមួយ ក្នុងការរកទទួលទានចិញ្ចឹមជីវិត ដែលទាំងនោះក៏ជាផ្នែកមួយ នៃការអភិវឌ្ឍន៍សម្រាប់ប្រទេសកម្ពុជា និងបានបង្ហាញនូវចំណងទាក់ទង«ដ៏ស្អិតរមួត» រវាងប្រទេសទាំងពីរនោះដែរ៕
------------------------------------------------
ដោយ ៖ កេសរកូល - ភ្នំពេញ ថ្ងៃទី០៣ ខែកញ្ញា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ