អ្វីដែលយើងធ្លាប់លឺតាមពាក្យចចាមអារ៉ាមកន្លងមក ក្រុមហ៊ុនស៊ាំស្ស៊ុង (Samsung) កំពុងតែខិតខំផលិតនូវនាឡិកាដៃ​វ៉ៃ​ឆ្លាតថ្មី (smartwatch) ហើយពួកគេនឹងត្រៀមប្រកាស នៅក្នុងព្រឹត្តិណ៏បង្ហាញផលិតផលបច្ចេកវិទ្យាដ៏ធំ នាទីក្រុងបឺលីន (Berlin) ប្រទេសអាឡឺម៉ង់ នៅថ្ងៃទី០៤ ខែកញ្ញាខាងមុខ។

ការតាំងបង្ហាញជាផ្លូវការ នូវផលិតផលនាឡិការថ្មីរបស់សាមស៊ុង។ (រូបថត ក្រុមហ៊ុន)

នាឡិកាដៃវ៉ៃឆ្លាតស៊េរីថ្មីនេះ មានឈ្មោះថា «ហ្គាឡាក់ស៊ីហ្គៀ» (Galaxy Gear) ហើយវានឹងចេញមកជាមួយនឹង ៥ពណ៌​ប្លែកៗពីគ្នា។

តាមសេចក្តីរាយការណ៏ពី សាំម៉ូប៊ែល (SamMobile) បានឲ្យដឹងថានាឡិកាដៃ ស៊ាំស្ស៊ុង ហ្គាឡាក់ស៊ីហ្គៀ នឹងមានពណ៌ស, ទឹកក្រូច, ប្រផេះ នឹងពណ៌ខ្មៅ។ ហើយក្រុមហ៊ុនស៊ាំស្ស៊ុង គ្រោងនឹងចេញនូវពណ៌មាស ១ពណ៌ទៀតនៅពេលក្រោយ។

ចំពោះលក្ខណៈសម្បត្តិរបស់វាលំអិតយ៉ាងណានោះ មិនទាន់ប្រាកដនៅឡើយទេ ប៉ុន្តែអ្នកវិភាគអាចព្យាករណ៏បានខ្លះថា វាអាចចាប់យករូបភាព បានដោយលាក់ការសម្ងាត់ ដោយមិនចាំបាច់បើក ឬកាន់ទូរស័ព្ទដៃ។ ហើយវានឹងភ្ជាប់​ទំនាក់​ទំនង​ទៅនឹងប្រភេទទូរស័ព្ទដៃវ៉ៃឆ្លាត ស៊េរី ស៊ាំស្ស៊ុងណាមួយ។ នៅពេលពេលដែលមានការហៅចូល វានឹងលោតសញ្ញាប្រាប់​ដល់នាឡិកានៅលើករដៃរបស់អ្នក ហើយអ្នកក៏អាចធ្វើការសន្ទនា តាមរយះនាឡិកាដៃនោះបានផងដែរ។

រីឯការរចនារបស់វា បើមើលទៅតាមរូបភាពដែលធ្លាប់លេចធ្លាយតាមគេហទំព័រកន្លងមក ឃើញថា ស៊ាំស្ស៊ុងបានធ្វើការ​រចនាឡើងយ៉ាងទាន់សម័យបំផុត។ វាមានអេក្រង់ទំហំ ១.៦៧អ៊ីញ ជាប្រភេទចុចលើអេក្រង់ផ្ទាល់ និងអាចបង្ហាញរូបភា​បាន ៣២០ X ៣២០ភិចស្យ៊ែល។

លក្ខណៈសម្បត្តិរបស់វាសំខាន់ៗមួយចំនួនទៀតមានដូចជា៖ ម៉ាស៊ីន (CPU) ប្រភេទ ស៊ាំស្ស៊ុង អ៊ិចស៊ីណូស (Samsung Exynos), អង់ចងចាំ (RAM) ទំហំ១ជីហ្គាបៃ និងមានកាមេរ៉ាផ្ទាល់ខ្លួនទំហំ ២ម៉េហ្គាភិចស្យ៊ែល។

ស៊ាំស្ស៊ុង ហ្គាឡាក់ស៊ីហ្គៀ នឹងចរាចរណ៏លើទីផ្សារនៅចុងខែសីហា ឬនៅដើមខែតុលាខាងមុខ។ យើងនឹងដឹងបន្ថែម​ទៀត​ពីតម្លៃ និងពត៌មានលំអិតផ្សេងៗទៀត នៅពេលដែលក្រុមហ៊ុនប្រកាសជាផ្លូវការ នៅថ្ងៃទី០៤ ខែកញ្ញា៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៣ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ