សំបុត្រសម្រាប់ចូលទស្សនា កំពូលព្រឹត្តិការណ៏ដ៏ធំ បាល់ទាត់ពិភពលោកឆ្នាំ២០១៤ នៅប្រទេសប្រេស៊ីល បានចេញលក់​ហើយ ដែលអ្នកគាំទ្រក្រុមបាល់ទាត់ទាំងអស់ អាចចូលទៅបំពេញបែបបទសុំទិញបាន នៅលើគេហរទំព័ររបស់​សហព័ន្ធ​បាល់ទាត់ពិភពលោក ហៅកាត់ថា «ហ្វីហ្វា» (Fifa)។

បុរសម្នាក់ កំពុងពិគ្រោះគេហទំព័ររបស់សហព័ន្ធបាល់ទាត់ពិភពលោក។ (រូបថត MONOROOM.info)

ហ្វីហ្វា បានរំពឹងទុកថា នឹងមានចំនួនអ្នកចូលទស្សនា ប្រហាក់ប្រហែលទៅនឹងព្រឹត្តិការណ៏ឆ្នាំ២០០៦ នៅប្រទេស​អាឡឺម៉ង់​ដែរ ហើយសំបុត្រមាន៧ប្រភេទ ក្នុងចំណោមការប្រកួតសរុមមាន ៦៤ប្រកួត។

សំបុត្រប្រមាណ ៣.៣លានសំបុត្រ នឹងត្រៀមលក់សម្រាប់ការប្រកួតនៅឆ្នាំក្រោយ។ ហើយវានឹងមានតម្លៃពី ៥៨លាន​ផោន (៩០ដុល្លា) សម្រាប់ការប្រកួតជុំដំបូង រហូតដល់តម្លៃ ៦៣២ផោន (៩៩០ដុល្លា) សម្រាប់ការប្រកួតវគ្គផ្តាច់ព្រ័ត្រ នាកីឡាដ្ឋាន ម៉ារ៉ាហ្គាណា (Maracana Stadium) ក្នុងទីក្រុង រីយ៉ូ ដឺជែណឺរ៉ូ (Rio de Janeiro)។

ប៉ុន្តែសម្រាប់ប្រជាជនប្រេស៊ីល ដែលមានអាយុលើស៦០ឆ្នាំ, សិស្សសាលា និងសមាជិកកម្មវិធីពិសេសណាមួយ នឹងអាច​ទិញសំបុត្របានក្នុងតម្លៃត្រឹមតែ ១៥ផោន (២៣ដុល្លា) តែប៉ុណ្ណោះ។

នាយកទីផ្សាររបស់ហ្វីហ្វា លោកធារី វ៉េល (Thierry Weil) បាននិយាយថា៖ «វាពិតជាពិបាកព្យាករណ៏ខ្លាំងណាស់ អំពី​ចំនួនអ្នកដែលចូលមកទស្សនា។ ប៉ុន្តែខ្ញុំជឿថា វានឹងមានចំនួនប្រហាក់ប្រហែលទៅនឹងព្រិត្តិការណ៏នៅប្រទេសអាឡឺម៉ង់ ជាងនៅអាហ្វ្រិកខាងត្បូង កាលពីឆ្នាំ២០១០។»

ហ្វីហ្វាបានប្រាប់ឲ្យដឹងថា បាល់ទាត់ពិភពលោកឆ្នាំ២០០៦ នៅប្រទេសអាឡឺម៉ង់ មានចំនួនអ្នកទស្សនា ប្រមាណជាង ៣.៣លាននាក់។ ប៉ុន្តែសម្រាប់ឆ្នាំ២០១០ ដែលអាហ្វ្រិកខាងត្បូងធ្វើជាម្ចាស់ផ្ទះនោះ សំបុត្រលក់អស់ត្រឹមតែ ២លាន​ប៉ុណ្ណោះ ដែលជាចំនួនមួយធ្លាក់ចុះខ្លាំង។

ចំពោះតម្លៃសេវាកម្មមួយចំនួន នៅបាល់ទាត់ពិភពលោកប្រេស៊ីល សូមមើលនៅខាងក្រោមនេះ៖
• សំបុត្រ (វគ្គចែកពូល)៖ ៩០ដុល្លា - ១៧៥ដុល្លា
• សំបុត្រ (វគ្គផ្តាច់ព្រ័ត្រ)៖ ៤៤០ដុល្លា - ៩៩០ដុល្លា
• សណ្ឋាគារ៖ ២២៨.៥ដុល្លា - ១២៤៨ដុល្លា (ក្នុងមួយយប់)
• អាហារសម្រន់៖ ១៧.២៣ដុល្លា
• អាហារពេលល្ងាចមធ្យម៖ ៤៥.៤ដុល្លា
• អាវយឺត៖ ២០.៣៦ដុល្លា
• ទឹកសុទ្ធ៖ ២ដុល្លា (១ដប)
• ស្រាបៀរក្រៅប្រទេស៖ ៦ដុល្លា (១កំប៉ុង)
• ស្រាបៀរក្នុងស្រុក៖ ៣ដុល្លា (១កំប៉ុង)
• កាហ្វេ៖ ៤ដុល្លា (១កែវ)។

គួរបញ្ជាក់ថា ព្រឹត្តិការណ៏បាល់ទាត់ពិភពលោកឆ្នាំ២០១៤នេះ នឹងចាប់ផ្តើមប្រកួតនៅថ្ងៃទី១២ ខែមិថុនា ខណៈ​ដែល​ក្រុម​ម្ចាស់ផ្ទះប្រេស៊ីល នឹងបើកឆាកប្រកួតមុនគេ នៅក្នុងទីក្រុង សៅប៉ូឡូ (Sao Paulo)៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២១ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ