គណៈកម្មការចម្រុះដែលស្មើរឲ្យបង្កើត ដោយគណបក្សសង្រ្គោះជាតិ ដើម្បីស៊ើបអង្កេតពីភាពមិនប្រក្រតី ក្នុងដំណើរការ​បោះឆ្នោត នឹងមិនអាចសម្រេចទៅបានឡើយ ដោយសារតែការមិនឯកភាពគ្នា នូវលក្ខខណ្ឌមូយចំនួន ក្នុងពេលជួបចរចារ​គ្នាកន្លងមក ខណៈដែលលោក ជាម យៀប អះអាងជាថ្មីនៅថ្ងៃទី២០ខែសីហានេះ ថាវាហួសពេលទៅហើយក្នុងការបង្កើត។

លោក ជាម យៀប តំណាងរាស្រ្តគណៈបក្សប្រជាជន។ (រូបថត វិទ្យុជាតិកម្ពុជា)។

លោក ជាម យៀប មន្រ្តីជាន់ខ្ពស់របស់គណបក្សប្រជាជនកម្ពុជា បានថ្លែងប្រាប់ទស្សនាវដ្តីមនោរម្យព័ងអាំងហ្វូ តាម​ទូរស័ព្ទនៅថ្ងៃទី២០ ខែសីហា ឆ្នាំ២០១៣នេះថា៖ «ការបង្កើតគណៈកម្មការចម្រុះ គឺហួសពេលហើយ ដោយសារតែ គ.ជ.ប បានប្រកាសថា ខ្លួនបានដោះស្រាយបណ្តឹងរួចរាល់ហើយ»។ មន្ត្រីជាន់ខ្ពស់គណបក្សប្រជាជនកម្ពុជារូបនេះ បន្ថែមថា ចំពោះបណ្តឹងដែលប្តឹងដោយគណបក្សសង្រ្គោះជាតិ ហើយនៅសេសសល់ ដោយសារតែមិនអាចដោះស្រាយ រួចត្រឹម​គណៈកម្មាធិការជាតិរៀបការបោះឆ្នោត គ.ជ.ប បានបន្តទៅដល់ដៃក្រុមប្រឹក្សាធម្មនុញនៅថ្ងៃនេះ។

នៅពេលសួរអំពីការចេញសេចក្តីថ្លែងការណ៍ របស់គណបក្សប្រជាជនកម្ពុជានៅថ្ងៃទី១៩ ខែសីហា ឆ្នាំ២០១៣ ដែលថា​គណបក្សប្រជាជនកម្ពុជា នៅតែប្រកាន់ជំហរពិភាក្សា ជាមួយគណបក្សសង្រ្គោះជាតិ ដើម្បីដោះស្រាយបញ្ហា​នានា​ដោយ​សន្តិវិធី លោក ជាម យៀប បានបដិសេធមិនធ្វើការអត្ថាធិប្បាយនោះទេ។

សូមរម្លឹកថាគណបក្សប្រជាជនកម្ពុជា បានចេញសេចក្តីថ្លែងការណ៍ នៅថ្ងៃទី១៩ ខែសីហា ឆ្នាំ២០១៣ ដោយអះអាងថា​គណបក្សខ្លួន មិនបានឃុបឃិតជាមួយ គ.ជ.ប ដើម្បីលួចបន្លំសន្លឹកឆ្នោតដូចការចោទប្រកាន់ នាពេលកន្លងមកនោះទេ។ សេចក្តីថ្លែងការណ៍ដដែល បញ្ជាក់ថាគណបក្សប្រជាជនកម្ពុជា នៅតែប្រកាន់គោលចំហរពិភាក្សា ជាមួយគណបក្ស​សង្រ្គោះជាតិដើម្បីស្វែងរកដំណោះស្រាយដោយសន្តិវិធី។

ទស្សនាវដ្តីមនោរម្យព័ងអាំងហ្វូ បានស្វែងរកសុំប្រតិកម្មពី លោក យឹម សុវណ្ណ មន្រ្តីអ្នកនាំពាក្យគណបក្សសង្រ្គោះជាតិ នៅថ្ងៃទី២០ ខែសីហា ឆ្នាំ២០១៣នេះ តែលោកថ្លែងថា មិនអាចធ្វើការអត្ថាធិប្បាយអ្វីបានទេនៅពេលនេះ ដោយរង់ចាំ​ការ​ជួបពិភាក្សាគ្នា រវាងមន្រ្តីគណបក្សប្រជាជនកម្ពុជា និងគណបក្សសង្រ្គោះជាតិ នៅម៉ោង២រសៀល ថ្ងៃទី២០ ខែសីហាឆ្នាំ​២០១៣នេះ ក្នុងមន្ទីររដ្ឋសភា។

រីឯលោក សម រង្ស៊ី មេដឹកនាំគណបក្សសង្រ្គោះជាតិ បានថ្លែងទៅកាន់អ្នកគាំទ្រនៅថ្ងៃទី១៨ ខែសីហា ឆ្នាំ២០១៣ថា គណៈកម្មាធិការជាតិរៀបចំការបោះឆ្នោត គ.ជ.ប មិនមានភាពឯករាជ្យ និងមិនអាចទុកចិត្តបាន។ មេដឹកនាំគណបក្ស​ប្រឆាំងរូបនេះបន្ថែមថា គ.ជ.ប បានដើរតួនាទីជា ចោរផង ជាប៉ូលីសផង និងជាចៅក្រមផង។ ដូចច្នេះគណបក្សលោក​មិនសុខចិត្តនោះទេ ចាំបាច់ត្រូវបង្កើតគណៈកម្មការចម្រុះដើម្បីស៊ើបអង្កេតពីភាពមិនប្រក្រតី ខណៈដែលគណបក្សនេះ នៅតែប្រកាន់គោលជំហរថា នឹងធ្វើមហាបាតុកម្មដោយអហិង្សា ប្រឆាំងលទ្ធផលបោះឆ្នោតប្រសិនបើ​គណៈកម្មការ​ចម្រុះ​មិនបានបង្កើត។

លោក ធុន សារ៉ាយ ប្រធានអង្គការសិទ្ធិមនុស្សអាដហុកថ្លែងថា ប្រសិនបើគណបក្សប្រជាជនកម្ពុជា និងគណបក្សសង្រ្គោះ​បានជួបប្រជុំគ្នា ពិតមែនវានឹងអាចមានដំណោះស្រាយមួយថ្មី ប្រសើរជាងពេលបច្ចុប្បន្ន។ ប្រធានអង្គការសិទ្ធិ​មនុស្ស​រូប​នេះ បន្ថែមថា យើងនឹងរង់ចាំលទ្ធផលក្រោយការជួបប្រជុំ រវាងមន្រ្តីគណបក្សទាំងពីរ។

--------------------------------------------------------
ដោយៈ អ៊ុំ បូរី - ភ្នំពេញថ្ងៃទី២០ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ