ភ្នំពេញ៖ សេចក្ដីប្រកាសព័ត៌មានថ្ងៃទី៩ខែសីហា របស់គណបក្សសង្គ្រោះជាតិ បាននិយាយឲ្យដឹងថាគណៈកម្មការចម្រុះ​ឯករាជ្យ ទំនងជានឹងអាចមានរូបរាង ដោយស្នើសុំឲ្យអង្គការសង្គមសីវិលជាតិជំនាញខាងការបោះឆ្នោតចូលរួម និង​អង្គការ​សហប្រជាជាតិនៅត្រឹមជាអ្នកសង្កេតការណ៍ប៉ុណ្ណោះ។ តែមន្ត្រីជាន់ខ្ពស់របស់គណបក្សប្រជាជនឯណោះវិញ នៅតែអះ​អាងពីជំហរដើមរបស់ខ្លួន ដោយបង្កើតគណៈកម្មការចម្រុះនេះត្រឹមតែបីភាគីប៉ុណ្ណោះ។ តើស្ថានការណ៍នយោបាយកម្ពុជា អាចនឹងឈានទៅរកវិបត្តិជាប់គាំងក្នុងថ្ងៃខាងមុខ?

សូមតាមដានព្រឹត្តិការណ៍នេះឡើងវិញ ដោយមានការចូលរួមពន្យល់បកស្រាយ ពីលោក ឡៅ ម៉ុងហៃ អ្នកវិភាគល្បី​ឈ្មោះ​មួយរូប ជាមួយនឹងការសាកសួររបស់ទស្សនាវដ្ដីមនោរម្យព័ងអាំងហ្វូ។

អ្នកគាំទ្រគណបក្សប្រជាជនកម្ពុជាមួយរូប កាន់ទង់ជាតិប្រទេសកម្ពុជា។ (រូបថត Céline Martin)

ជាមួយនឹងសំនួរថា តើស្ថានការណ៍នយោបាយសព្វថ្ងៃ មានភាពជាប់គាំងទេ លោកបណ្ឌិត ឡៅ ម៉ុងហៃ បានបង្ហាញ​សុទិដ្ឋិនិយមថា នៅក្នុងតំណាក់ការនេះមិនអាចចាត់ទុកថា មានភាពជាប់គាំងអ្វីផ្នែកនយោបាយនោះទេ ព្រោះបញ្ហាដែល​ត្រូវដោះស្រាយទាំងឡាយ កំពុងស្ថិតក្នុងនីតិវិធីរបស់ គ.ជ.ប នៅឡើយ។ លោកបានបន្តរថា លទ្ធផលនៃការបោះឆ្នោត មិនទាន់បានប្រកាសជាស្ថារដោយគ.ជ.ប នោះនៅឡើយ ឯរយៈពេលនៃការប្រជុំសភាដំបូង ក្រោយថ្ងៃបោះឆ្នោតនោះ​មាន​រយៈ៦០ថ្ងៃ (២ខែ) ហើយមកដល់ពេលនេះ នៅមានរយៈពេលជាងមួយខែទៀត។

សូមរម្លឹកថា លោក សម រង្ស៊ី ប្រធានគណបក្សសង្គ្រោះជាតិ បានដាក់របាយការណ៍ពីភាពមិនប្រក្រតី នៃការបោះឆ្នោត​ជ្រើសតាំងតំណាងរាស្ដ្រនីតិកាលទី៥ ទៅ គ.ជ.ប ដើម្បីធ្វើការដោះស្រាយកាលពីថ្ងៃទី០៦ ខែសីហា ឆ្នាំ២០១៣។ ក្នុងថ្ងៃ​ជាមួយគ្នានេះ គ.ជ.ប ក៏បានដាក់លិខិតតបជាផ្លូវការមកលោក សម រង្ស៊ី វិញថា គ.ជ.ប មិនអាចបង្កើតគណៈកម្មការ​ពិសេស តាមសំណើរបស់គណបក្សសង្គ្រោះជាតិបានទេ ដោយបានសំអាងថា «ហួសពីសិទ្ធិអំណាច និងសមត្ថកិច្ចរបស់​ខ្លួន» នៅពេលដែលគណបក្សនេះ ចង់កំណត់តួនាទីរបស់អង្គការសហប្រជាជាតិឲ្យទូលាយ ជាងអ្វីដែលគ.ជ.ប និង​គណបក្សប្រជាជនបានលើកឡើង។ ការឆ្លើយឆ្លងគ្នា តាមសំបុត្រស្នាមទាំងនេះ រួមផ្សំនិងការប្រកាសធ្វើមហាបាតុកម្ម​របស់លោក សម រង្ស៊ីនោះផង បានធ្វើឲ្យគេយល់ថា ស្ថានការណ៍នយោបាយបានឈានទៅរកភាពជាប់គាំងហើយ។

តែអ្វីដែលគេបានចាប់អារម្មណ៍នោះ គឺព្រះករុណានរោត្ដម សីហមុនី ព្រះមហាក្សត្រនៃព្រះរាជាណាចក្រ​កម្ពុជា​ កាលពី​ថ្ងៃ​ទី០៧ ខែសីហា ឆ្នាំ២០១៣ ព្រះអង្គបានចេញព្រះរាជសារអំពាវនាវ ដល់គណបក្សនយោបាយធំៗទាំងពីរ ពិភាក្សាគ្នារក​ដំណោះស្រាយ ដោយសន្ដិវិធីចំពោះការវិវាទ ឬបញ្ហាទាំងឡាយដែលនៅសេសសល់ ដើម្បីជាផលប្រយោជន៍​ដ៏ឧត្ដម​សម្រាប់ប្រទេស និងប្រជាពលរដ្ឋយើង និងដើម្បីរក្សាសន្ដិភាព និងស្ថិរភាពជាតិ។ ព្រះរាជអន្តរាគមន៍ ដែលដូចជាបាន​រំលឹកទៅដល់ ក្រុមអ្នកនយោបាយពីតួនាទីរបស់ទ្រង់នេះ បានធ្វើឲ្យមានការរីកចម្រើនខ្លះៗ នៅក្នុងស្ថានការណ៍​ដែលគេ​គិតថា សឹងតែជាប់គាំងនោះ។

អ្នកវិភាគវ័យចំណាស់ បានបញ្ជាក់ជុំវិញបញ្ហាខាងលើនេះថា ក្រោយពីមានព្រះរាជអន្តរាគមន៍ គណៈកម្មាធិការជាតិរៀបចំ​ការបោះឆ្នោត (គ.ជ.ប) នៅថ្ងៃទី០៩ ខែសីហា បានធ្វើសេចក្ដីអំពាវនាវមួយថ្មីទៀត ឱ្យគណបក្សនយោបាយធំៗទាំងពីរ ចូលរួមប្រជុំដើម្បីសម្រេចបង្កើតគណៈកម្មការពិសេស ក្នុងការត្រួតពិនិត្យផ្ទៀងផ្ទាត់របាយការណ៍ ពីភាពមិនប្រក្រតី​ក្នុងថ្ងៃ​បោះឆ្នោត ឱ្យបានឆាប់រហ័ស។ ដើម្បីដោះស្រាយភាពមិនប្រក្រតីទាំងនេះ លោកឡៅ ម៉ុងហៃ សង្ឃឹមថា ទាំងអស់គ្នា​នឹង​ជៀសវាងនូវអំពើហិង្សា។ លោកឲ្យយោបល់ថា អង្គការសហប្រជាជាតិ ដែលគណបក្សសង្គ្រោះជាតិ ទាមទារ​ឲ្យមាន​វត្តមាននោះ អាចជាអ្នកបច្ចេកទេស ក៏ដូចអង្គការក្រៅរដ្ឋាភិបាលជាតិ និងអន្តរជាតិដែរ។

ក្នុងថ្ងៃទី៩ ខែសីហា លោក ស ខេង រដ្ឋមន្ត្រីក្រសួងមហាផ្ទៃ បានប្រាប់អ្នកសារព័ត៌មានថា មានការជួបជជែកគ្នារវាងមន្ត្រី​គណបក្សប្រជាជនកម្ពុជា និងគណបក្សសង្គ្រោះជាតិ ដើម្បីពិភាក្សាពីការបង្កើតគណៈកម្មការចម្រុះ សម្រាប់ដោះស្រាយ​បញ្ហាបោះឆ្នោតនេះ។ នៅថ្ងៃដដែលនេះ សេចក្ដីប្រកាសព័ត៌មានមួយទៀតរបស់គណៈបក្សសង្រ្គោះជាតិ ក៏បានបង្ហាញ​សញ្ញាវិជ្ជមានប្រហាក់ប្រហែលគ្នាដែរ ថាគណបក្សទាំងពីរបានឯកភាពគ្នា ពិនិត្យមើល​លទ្ធភាពជ្រើសរើសអង្គការ​មិនមែន​រដ្ឋាភិបាលដែលមានជំនាញ និងបទពិសោធន៍លើការងារបោះឆ្នោត ដើម្បីបំពេញ​ការងារ​ក្នុង​ក្រុមបច្ចេកទេស ដែល​មាន​អង្គការសហប្រជាជាតិ អង្គការជាតិនិងអន្តរជាតិឯទៀត ជាអ្នកសង្កេតការណ៍។ សេចក្ដីប្រកាសនេះ បានចេញផ្សាយ បន្ទាប់ពីមានការជួបជជែកគ្នា នៅរដ្ឋសភាជាតិ រវាងតំណាងគណៈបក្ស​ប្រជាជនកម្ពុជា បីរូប លោក ជាម យៀប លោក ព្រំ សុខា និងលោក អ៊ុក គឹមហាន និងតំណាងគណបក្ស​សង្រ្គោះជាតិ​បីរូបដូចគ្នា លោក សុន ឆ័យ លោក កុយ ប៊ុនរឿន និងលោក ញ៉ែម បុញ្ញឬទ្ធិ។

លោក ឡៅ ម៉ុងហៃ បានសម្ដែងការគាំទ្រថា នេះជារូបមន្តដ៏សំខាន់ ក្នុងដំណោះស្រាយនោះ ជាការអង្គុយជុំគ្នាពិភាក្សា​គ្នា នឹងត្រូវកំណត់នូវមុខងារ និងតួនាទីអង្គការសហប្រជាជាតិជាអ្វី ហើយជាការផ្លាស់ប្តូរជំហរនិងឥរិយាបទ​មួយ ទាំង​គណបក្សសង្គ្រោះជាតិ និងគណបក្សប្រជាជនកម្ពុជា៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី០៩ សីហា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ