កម្ពុជា៖ សុរិយា ស៊ូប៊ែឌី ជម្រុញឲ្យមានការបោះឆ្នោតសេរី យុត្តិធម៌ និងដោយសន្តិវិធី
- ដោយ: មនោរម្យ.អាំងហ្វូ
- កែប្រែចុងក្រោយ: July 26, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
នៅមុនមួយថ្ងៃ នៃការបោះឆ្នោតជ្រើសរើសតំណាងរាស្ត្រ នៅប្រទេសកម្ពុជា ដែលនឹងប្រព្រឹត្តទៅនៅថ្ងៃអាទិត្យទី ២៨ ខែកក្កដាខាងមុខ អ្នករាយការណ៍ពិសេសអង្គការសហប្រជាជាតិ ស្តីពីសិទ្ធិមនុស្សនៅកម្ពុជា លោក សុរិយា ប្រាសាទ ស៊ូប៊ែឌី (Surya P. Subedi) បានរំលឹកឡើងវិញនូវសេចក្ដីអំពាវនាវរបស់លោក ដើម្បីការបោះឆ្នោតមួយសេរី យុត្តិធម៌ និងដោយសន្តិវិធី ទាំងនៅមុន ក្នុងពេល និងក្រោយការបោះឆ្នោត។
លោក ស៊ូរយ៉ា ភ. ស៊ូប៊ើឌី អ្នករាយការណ៍ពិសេស អង្គការសហប្រជាជាតិ។ (រូបថត MONOROOM.info/ O. Vary)
នៅក្នុងសេចក្ដីថ្លែងការណ៍មួយរបស់លោក ចុះថ្ងៃទី២៦ខែកក្កដា ហើយដែលមនោរម្យព័ងអាំងហ្វូ ទើបនឹងទទួលបាននៅយប់ថ្ងៃដដែលនេះ លោក សុរិយា ប្រាសាទ ស៊ូប៊ែឌី បានថ្លែងជាអាថ៌ទៅកាន់ពលរដ្ឋកម្ពុជា ជាម្ចាស់ឆ្នោតថា «ប្រទេសកម្ពុជាសម្រេចបាន នូវជំហានដ៏សំខាន់ នៅក្នុងការពង្រឹងលទ្ធិប្រជាធិបតេយ្យ សិទ្ធិមនុស្ស និងនីតិរដ្ឋ ហើយខ្ញុំសូមអំពាវនាវដល់រដ្ឋាភិបាល ឲ្យគោរពយ៉ាងពេញលេញនូវកាតព្វកិច្ចអន្ដរជាតិរបស់ខ្លួន ស្ដីពីសិទ្ធិមនុស្ស ដើម្បីឲ្យប្រទេសកម្ពុជាទាំងមូល នឹងធ្វើការបោះឆ្នោតនៅថ្ងៃអាទិត្យនេះ»។
នៅក្នុងរយៈពេលដែលនៅសេសសល់នេះ លោកបានជម្រុញពលរដ្ឋកម្ពុជា ឲ្យជៀសវាងអំពើហឹង្សា និងលើកកំពស់ឲ្យបានខ្ពស់បំផុត ស្ដីពីសិទ្ធិនៃពលរដ្ឋគ្រប់ៗរូប ដើម្បីអនុវត្តន៍ឲ្យបានល្អប្រសើរ និងស្មើៗគ្នា នូវបំណងរបស់ពួកគេ តាមរយៈសន្លឹកឆ្នោត ដោយគ្មានការគម្រាម ភ័យខ្លាច និងរងសម្ពាធ។ ការបំភិតបំភ័យទាំងឡាយ ត្រូវតែធ្វើការស៊ើបអង្កេតឲ្យបានដិតដល់បំផុត ដោយអាជ្ញាធរ។
ទាក់ទងនឹងគណកម្មាធិការជាតិរៀបចំការបោះឆ្នោត ហៅកាត់ថា គ.ជ.ប វិញ ស្ថាប័ននេះត្រូវសិក្សា រកដំណោះស្រាយឲ្យឆាប់រហ័ស នូវបណ្ដឹងទាំងឡាយ ដែលបានប្ដឹងមកខ្លួន។ លោក ស៊ូប៊ែឌី បានរំលឹកថា វានៅមិនទាន់យឺតពេលនៅឡើយទេ សម្រាប់ដោះស្រាយ នូវការព្រួយខ្វល់ខ្វាយមួយចំនួនធំ ដែលបានកើតឡើងកន្លងមក ទោះជាវាមិនមានរូបរាងធំដុំនោះក៏ដោយ។
«អ្វីដែលសំខាន់ សម្រាប់ដំណាក់កាលជាប្រវត្តិសាស្ត្រ ក្នុងពេលនេះ គឺការបោះឆ្នោតដែលអាចទទួលបាន និងអនាគតរដ្ឋាភិបាលនៃប្រទេសកម្ពុជា។»
មនោរម្យព័ងអាំងហ្វូ មិនអាចទំនាក់ទំនងសុំប្រតិកម្ម ពីមន្ត្រីដែលពាក់ព័ន្ធនានា នៅក្នុងប្រទេសកម្ពុជាបានទេ ដោយសារតែនៅវេលានេះ ជាពេលរាត្រីនៅឡើយ។
អ្នករាយការណ៍ពិសេសអង្គការសហប្រជាជាតិរូបនេះ បានបញ្ចប់នៅក្នុងសេចក្ដីថ្លែងការណ៍របស់ខ្លួនយ៉ាងដូច្នេះថា «ការបោះឆ្នោតនេះ អាចកំណត់ជំហានដ៏សំខាន់មួយ នៃដំណើរឆ្ពោះទៅមុខសម្រាប់ប្រទេសកម្ពុជា ដែលមនុស្សគ្រប់គ្នាចង់ឃើញ (...)។ ខ្ញុំសង្ឃឹមយ៉ាងមុតមាំ ថាជំហាននេះនឹងពិតជាមាន ហើយសូមប្រគល់ជូនទៅប្រជាជនកម្ពុជា នូវពរដ៏មហាប្រសើររបស់ខ្ញុំ សម្រាប់ថ្ងៃអាទិត្យខាងមុខនេះ៕»
---------------------------------------------------------
ដោយ៖ សេក មនោរកុមារ - ភ្នំពេញថ្ងៃទី២៦ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ