ប្រទះឃើញចង្រិតក្នុងហេមប៊ើហ្គើរ តែអាជ្ញាធរជួយលាក់
បើនិយាយទៅ សត្វល្អិតនេះ វាហោះមកពីចំការនៅក្បែរនេះ។
រូបភាពជំនួស បង្ហាញពីហេមប៊ើហ្គើរ។
«មានសត្វល្អិត? ហើយយ៉ាងម៉េចចុះ? មានបញ្ហាអ្វីឬ? ...» នេះជាចម្លើយខ្លីៗ ឆ្លើយដោយអាជ្ញាធរគ្រប់គ្រងអនាម័យរបស់ចក្រភពអង់គ្លេស ទៅនឹងការតវារបស់យុវជនមួយរូប ដែលបានប្រទះឃើញ«ចង្រិត»មួយក្បាល នៅក្នុងហេមប៊ើហ្គើរ ទិញពីហាងម៉ាកដូណាល់ (MacDonald’s) កាលពីសប្ដាហ៍មុន។
ហេមប៊ើហ្គើរហួសចិត្ត
ម៉ាចូវ ភីកហ្វដ (Matthew Pickford) អាយុ១៩ឆ្នាំ បានជូនដំណឹងថ្ងៃទី៨ខែកក្កដា បន្ទាប់ពីបានឃើញសត្វល្អិតមួយនេះ នៅក្រោមប៉េងប៉ោះនៃហេមប៊ើហ្គើរដែលមានឈ្មោះថា ប៊ិច ថាធ្ទី (Big Tasty) ទិញពីហាងមួយនៅភាគឦសាននៃប្រទេសអង់គ្លេស។
យុវជនបានពន្យល់ថា «ខ្ញុំបានទាក់ទងទៅភ្នាក់ងារអនាម័យ និងបរិស្ថានប្រចាំតំបន់។ តែពួកគេបាននិយាយថា មានចំការមួយនៅជិតម៉ាកដូណាល់ ហើយសត្វល្អិតប្រហែលជាហោះមកពីទីនោះ។»
ដោយមានការទាមទារតវ៉ាបែបនេះ ទើបអធិការមួយរូបបានចុះមកផ្ទាល់នឹងកន្លែង ប៉ុន្តែមិនបានរកឃើញអ្វីដែលខុសប្លែកពីធម្មតានោះឡើយ។ អធិការរូបនោះបានប្រកាសថា «ការរៀបចំគ្រប់យ៉ាងដោយសហគ្រាសភោជនីយដ្ឋាន ពិតជាមានភាពសមរម្យណាស់ ប្រសិនប្រើនិយាយទាក់ទងនឹងអនាម័យ និងមេរោគដែលបានត្រួតពិនិត្យនៅនឹងកន្លែង។»
ទោះបីជាយ៉ាងណាក៏ដោយ អ្នកនាំពាក្យរបស់ម៉ាកដូណាល់ បានធ្វើការសុំទោស និងយល់ព្រមសងប្រាក់ទៅយុវជនវិញ ព្រមទាំងស្នើសុំហេមប៊ើហ្គើរមានចង្រិតនោះ មកត្រួតពិនិត្យ ប៉ុន្តែយុវជនបានបដិសេធ៕
------------------------------------------------
ដោយ ឈូករ័ត្ន - ប៉ារីស ថ្ងៃទី១៧ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ