ប្រព័ន្ធផ្សព្វផ្សាយនៅកម្ពុជា ត្រូវបានគេវាយតម្លៃជាទូទៅថា មិនទាន់មានភាពឯករាជ្យគ្រប់គ្រាន់នៅឡើយទេ។ ​ប្រព័ន្ធផ្សព្វ​ផ្សាយទាំងនោះ ជារឿយៗ តែងទទួលបានការរិះគន់ពីជ្ឍដ្ឋានទូទៅថា មិនបានពាំនាំនូវព្រឹត្តិការណ៍ គ្រប់ជ្រុងជ្រោយ​នៃ​សង្គម ជូនដល់ប្រជាពលរដ្ឋ លើពីនេះមានការផ្សាយព័ត៌មានលំអៀងទៀតផង។

រូបភាពកាត់ត រវាងរូបភាព និងនិមិត្តសញ្ញារបស់ប្រព័ន្ធផ្សព្វផ្សាយក្នុងស្រុក។ (រូបថត Mekhea)

យោងតាមសេចក្តីប្រកាសព័ត៌មាន ដែលចេញដោយមជ្ឈមណ្ឌលកម្ពុជាដើម្បី ប្រព័ន្ធផ្សព្វផ្សាយ ហៅកាត់ថា (CCMI)ឱ្យដឹងថា រដ្ឋាភិបាលមិនត្រឹមតែត្រួតត្រា លើស្ថានីយទូរទស្សន៍ទាំងអស់នោះទេ តែក៏បានគ្រប់គ្រងស្ថានីយវិទ្យុ និងប្រព័ន្ធ​ផ្សព្វផ្សាយផ្នែកបោះពុម្ពស្ទើរតែទាំងអស់ ដូច្នេះប្រព័ន្ធផ្សព្វផ្សាយនៅប្រទេសកម្ពុជា គឺនៅតែមិនទាន់មានសេរីភាព ក្នុង​ការ​ចាក់ផ្សាយនោះទេ។

លោក ព្រាប កុល ប្រធានអង្គការតម្លាភាពកម្ពុជាបានពន្យល់ថា៖ «ប្រព័ន្ធផ្សព្វផ្សាយនៅកម្ពុជាបច្ចុប្បន្ន ភាគច្រើនទទួល​រងនូវសម្ពាធ និងមានការភ័យខ្លាច»។ លោកបន្តថា មានវិទ្យុ ទូរទស្សន៍ កាសែត និងប្រព័ន្ធផ្សព្វផ្សាយផ្សេងទៀតៗ មិន​ហ៊ានផ្សព្វផ្សាយ ឬជួលម៉ោងផ្សាយដល់ គណបក្សប្រឆាំង អង្គការសង្គមស៊ីវិល និងប្រជាពលរដ្ឋ ដែលហ៊ានរិះគន់ បរិហារ ឬការតស៊ូរមតិ នូវចំណុចអវិជ្ជមានរបស់រដ្ឋាភិបាល ស្របពេលដែលបក្សប្រឆាំង មិនទាន់ទទួលបានយុត្តិធម៌ក្នុង​ការ​ប្រើ​បាស់ប្រព័ន្ធផ្សព្វផ្សាយ។

លោកបន្ថែមថា ដើម្បីឲ្យប្រព័ន្ធព័ត៌មានឯករាជ្យ រដ្ឋាភិបាលចាំបាច់ត្រូវធានា អំពីសិទ្ធិសេរីភាពសារពត៌មាន ដោយមិនត្រូវ​មានការដាក់សម្ពាធនយោបាយ លើអង្គភាពព័ត៌មានដោយផ្ទាល់ឬប្រយោលនោះទេ។

នាប៉ុន្មានឆ្នាំកន្លងមកនេះ បញ្ហាជម្លោះដីធ្លី និងផ្ទះសម្បែង ក្នុងសហគមន៍តំបន់បឹងកក់ ដីក្រហម បូរីកីឡា ដែលត្រូវ​បាន​បណ្តេញចេញ ដោយហិង្សា និងការចាប់ខ្លួនសកម្មជនតវ៉ា ជាទូទៅពុំត្រូវបានរាយការណ៍ឡើយ ក្រៅពីប្រព័ន្ធពត៌មាន​ឯករាជ្យមួយចំនួនតូច។

លោក ឈុំ សុជាតិ នាយខុទ្ធការល័យក្រសួងព័ត៌មាន បានបដិសេធមិនធ្វើអត្ថាធិប្បាយ លើបញ្ហានេះទេ ដោយលោក​លើក​ហេតុផលថា កំពុងជាប់រវល់។

ខ្លឹមសារដែលមាននៅក្នុងសេចក្តីប្រកាសព័ត៌មានដដែលនេះក៏បានបង្ហាញថា ក្រសួងពត៌មានកម្ពុជា បានហាមសូម្បី តែ​ការផ្សាយបន្តរបស់វិទ្យុក្នុងស្រុកពីស្ថានីយវិទ្យុបរទេស ក្នុងអំឡុងពេលឃោសនាបោះឆ្នោត បើទោះជាក្រោយមក​ក្រសួង​ព័ត៌មាន បានលប់ចោលបំរាមនោះវិញ បន្ទាប់ពីមានប្រតិកម្មខ្លាំង ពីគ្រប់មជ្ឍដ្ឋានយ៉ាងណាក្តី។

លោកស្រី ជា វណ្ណាត ជាអ្នកវិភាគឯករាជ្យបានពន្យល់ថា៖ «ស្ថានភាពសេរីភាពសារពត៌មាន នៅកម្ពុជាបច្ចុប្បន្ន គឺមាន​ភាពប្រសើរឡើង ប៉ុន្តែបើប្រៀបធៀបជាមួយស្តង់ដារអន្តរជាតិ គឺនៅមានកម្រិតនៅឡើយទេ»។ លោកស្រី បញ្ជាក់ថា បណ្តាញទូរទស្សន៍ នៅកម្ពុជាបច្ចុប្បន្ន មិនទាន់មានភាពឯករាជ្យពេញលេញ នៅឡើយទេ។ លោកស្រីរំពឹងថាអនាគត នៅកម្ពុជានឹងអាចមានទូរទស្សន៍ ដែលផ្សាយពត៌មាន មានតុល្យភាពជាងនេះ។

សូមរម្លឹកថា កាលថ្ងៃទី៧ ខែកក្កដា ឆ្នាំ ២០១៣ យ៉ាងហោចណាស់ ក៏មានអង្គការសង្គមស៊ីវិលចំនួនសាមសិបមួយ បាន​ចេញនូវសេចក្តីថ្លែងការណ៍រួមមួយថា ពួកគេនឹងបោះឆ្នោត គាំទ្រគណបក្សណា ដែលផ្តល់សេរីភាពសារពត៌មាន​ដល់​ពួកគេ និងប្រជាពលរដ្ឋ។ តាមរយៈសេចក្តីថ្លែងការណ៍រួមនេះ ក្រុមអង្គការសង្គមស៊ីវិល ក៏បានស្មើរសុំឲ្យមានការប្រើប្រាស់ ប្រព័ន្ធផ្សព្វផ្សាយពត៌មាន ឲ្យបានស្មើរភាពសម្រាប់គណបក្សនយោបាយទាំងអស់ ខណៈដែលប្រជាពលរដ្ឋ​ត្រូវការ​ពត៌មានពិតមិនលំអៀង មិនបំភ្លើស និងប្រកបដោយវិជ្ជាជីវៈ។

------------------------------------
ដោយៈ អ៊ុំ បូរី-ភ្នំពេញថ្ងៃទី១២ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាង៖ដោយទស្សនាវដ្ដីមនោរម្យព័ងអាំងហ្វូ