ខ្សែប្រយុទ្ធក្រុមបីសាចក្រហមម៉ែនឆេស្ទើ យូណៃធីត (Manchester United) វ៉ែន រ៉ូនី (Wayne Rooney) នឹងឡើង​យន្តហោះ​ចាកចេញពីទីក្រុងបាងកក ត្រឡប់ទៅកាន់ប្រទេសអង់គ្លេសវិញ នៅថ្ងៃសុក្រនេះ ដោយសារតែគាត់មានរបួស។

កីឡាករខ្សែប្រយុទ្ធ វ៉ែន រ៉ូនី របស់ក្រុមបីសាចក្រហមម៉ែនឆេស្ទើ យូណៃធីត។ (រូបថត Scanpix )

រយះពេលមួយថ្ងៃ បន្ទាប់ពីមកដល់ទីក្រុងបាងកកប្រទេសថៃ ក្លិបម៉ែនញូបានប្រាប់ឲ្យដឹងថារ៉ូនី បានរងរបួស​សរសៃរពួរ​គន្លាក់ជើង នៅកំឡុងពេលហ្វឹកហាត់។

ក្លិបម្ចាស់ជើងឯកព្រីមែលីក (Premier League) បានប្រកាសនៅលើគេហទំព័ររបស់ក្លិបថា៖ «វាជារឿងគួរ​ឲ្យសោកស្តាយ​មួយ ព្រោះគាត់នឹងមិនអាចចូលលេងបាន រហូតដល់រយះពេល១ខែ។»

បញ្ហារបួសនេះ ធ្វើឲ្យរ៉ូនីកាន់តែមានភាពស្ងប់ស្ងាត់បន្ថែមទៀត ខណៈដែលបច្ចុប្បន្នកំពុងតែមានពាក្យចចាមអារ៉ាម ថា​គាត់​នឹងអាចចាកចេញពីក្លិប។ មុនពេលដែលលោកអាឡិច ហ្វឺកឺសិន (Alex Ferguson) បានចូលនិវត្តន៏ គាត់បាននិយាយថា រ៉ូនីបានទៅប្រាប់គាត់ថា គាត់ចង់ទៅចូលរួមជាមួយក្លិបថ្មី។

គ្រូបង្វឹកថ្មី លោកដេវីដ ម៉យ (David Moyes) ក៏មិនធ្វើការផ្តល់ពត៌មានលំអិតចំពោះអនាគត របស់ខ្សែប្រយុទ្ធអន្តរជាតិ​អង់គ្លេសរូបនេះដែរ។

កំឡុងពេលក្រុមមកដល់ទីក្រុងបាងកក រ៉ូនីហាក់ដូចមិនបញ្ចេញកាយវិការថាគាត់ចង់ចេញពីក្រុម ឬក៏នៅបន្តជាមួយ​ក្រុម​នោះទេ ដោយគាត់ធ្វើដូចសភាពធម្មតា។ ការធ្វើដំណើររបស់គាត់បន្ទាប់ពីចុះពីលើយន្តហោះ រ៉ូនីដើរឱនក្បាលចុះក្រោម​រហូត ហើយមិនព្រមឆ្លើយទៅនឹងអ្នកការសែតអ្វីទាំងអស់។

គ្រូបង្វឹកម៉ែនញូ លោកម៉យ បាននិយាយកាលពីពេលកន្លងទៅថា៖ «ខ្ញុំបានជួបរ៉ូនី ពីរ បី ឬបួនលើក។ យើងបាន​ជជែកគ្នា​ជាច្រើន អំពីការងាររយះពេលជាច្រើនឆ្នាំកន្លងទៅ ដែលគាត់បែកពីខ្ញុំ។ ហើយពេលនោះ ទំនាក់ទំនងរបស់យើងមានភាព​ប្រសើរខ្លាំងណាស់។»

បុរសវ័យ៥០ឆ្នាំ សញ្ជាតិស្កុតឡែន បានបន្ថែមថា៖ «គាត់ហ្វឹកហាត់បានល្អណាស់។ មានមនុស្សជាច្រើនប្រាប់ខ្ញុំថា ពួក​គេបានឃើញរ៉ូនី ជាខ្សែប្រយុទ្ធដ៏មុតស្រួច ក្នុងរយះពេលជាច្រើនឆ្នាំកន្លងមក។ ខ្ញុំនឹងព្យាយាមជួយឲ្យរ៉ូនី កាន់តែល្អ​បន្ថែម​ទៀត តាមដែលខ្ញុំអាចធ្វើបាន៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១២ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ