ភ្នំពេញ៖ មេដឹកនាំគណបក្សប្រឆាំងដែលនិរទេសខ្លួនឯង និងជាទណ្ឌិត លោក សម រង្ស៊ី កាលពីថ្ងៃសៅរ៍បានប្រកាសថា លោកនឹងវិលត្រឡប់មកប្រទេសកម្ពុជាវិញ នៅក្នុងការបោះឆ្នោតជាតិខែនេះ បើទោះជាត្រូវប្រឈម នឹងទោសជាប់​ពន្ធនាគារជាង១០ឆ្នាំក៏ដោយ។

ប្រធានគណបក្សប្រឆាំង លោក សម រង្សី (រូបខាងឆ្វេង) និងនាយករដ្ឋមន្ត្រី លោក ហ៊ុន សែន កាលពីខែកុម្ភះឆ្នាំ២០០៦ ក្នុងរាជធានីភ្នំពេញ។ (រូបថត AFP)

នៅក្នុងវីដេអូ ដែលបង្ហោះនៅលើទំព័រហ្វេសបុករបស់លោក និងនៅក្នុងការផ្តល់ដំណឹងខ្លីៗ ដែលផ្សព្វផ្សាយដោយ​គណបក្សនេះ ប្រធានគណបក្សសង្គ្រោះជាតិ បានពន្យល់ថា ការប៉ុនប៉ងរបស់លោក ដើម្បីចរចាឲ្យមានការ​លើកលែង​ទោស ពីព្រះមហាក្សត្រព្រះបាទ នរោត្តម សីហមុនី ជាមួយនឹងការឯកភាពរបស់លោកនាយករដ្ឋមន្រ្តី ហ៊ុន សែន បាន​បរាជ័យ។ លោកបានបញ្ជាក់ថា៖ «ទោះយ៉ាងណាក៏ដោយក៏លោកនឹងត្រឡប់មកវិញ ហើយខ្ញុំដឹងយ៉ាងច្បាស់ អំពីការ​ប្រថុយប្រថានត្រឡប់មកវិញមុនថ្ងៃបោះឆ្នោតនេះ»។

លោកបានថ្លែងឲ្យដឹងទៀតថា លោកបានសម្រេចត្រឡប់មកវិញ ដោយសារវត្តមានរបស់លោកជា​មេដឹកនាំគណបក្ស​ប្រឆាំង និងជាការធ្វើតេស្តមើលការពិត នៃការបោះឆ្នោតសេរីនិងយុត្តិធម៌ ដែលសន្យាដោយកិច្ចព្រមព្រៀងទីក្រុងប៉ារីស។ លោកបានបន្តបានបន្តទៀតថា ៖ «ខ្ញុំយល់ព្រមធ្វើពលីកម្មជីវិតរបស់ខ្ញុំ សម្រាប់ប្រទេសជាតិកំណើតរបស់ខ្ញុំ ដោយហ៊ាន​លះបង់ជីវិតខ្លួនឯង ដើម្បីសង្គ្រោះជាតិពីគ្រោះមហន្តរាយ»។

លោក សម រង្ស៊ី ក៏បានលើកឡើងពីរបាយការណ៍ របស់អ្នករាយការណ៍ពិសេសអង្គការសហប្រជាជាតិ លោក សុរិយា ស៊ូប៊ែឌី ការព្រួយបារម្ភពីសហភាពអឺរ៉ុប និងសហរដ្ឋអាមេរិក បើសិនគ្មានវត្តមានរបស់លោកក្នុងការបោះឆ្នោត ដោយសេរី និងយុត្តិធម៌នៅថ្ងៃទី២៨ ខែកក្កដា ឆ្នាំ២០១៣ខាងមុខ។

លោក យឹម សុវណ្ណ អ្នកនាំពាក្យគណបក្សសង្គ្រោះជាតិ បានថ្លែងថា កាលបរិច្ឆេទជាក់លាក់នៅមិនទាន់មាន​ការឯកភាព​គ្នានៅឡើយ ដោយកំពុងពិភាក្សាអំពីបញ្ហានោះ។ លោកបានថ្លែងឲ្យដឹងទៀតថា ៖«យើងមិនទាន់ ពិភាក្សាបញ្ចប់នៅ​ឡើយ​ទេ ប៉ុន្តែប្រាកដណាស់ លោកនឹងត្រឡប់មកវិញមុនការបោះឆ្នោត»។

អ្នកនាំពាក្យទីស្តីការគណៈរដ្ឋមន្រ្តី លោក ផៃ ស៊ីផាន បានថ្លែងកាលពីម្សិលមិញថា លោក សម រង្ស៊ី គឺត្រូវបានស្វាគមន៍​ចំពោះការវិលត្រឡប់មកវិញនេះ ប្រសិនបើនោះជាការសម្រេចចិត្តរបស់លោក។ លោកបានពន្យល់ថា៖ «វាជាបញ្ហាផ្ទាល់​ខ្លួនរបស់ឯកឧត្តម សម រង្ស៊ី វាសនារបស់គាត់គឺស្ថិតនៅក្រោមនីតិរដ្ឋ»។

ការស្វាគមន៍របស់លោក ផៃ ស៊ីផាន នេះ នៅធ្វើឲ្យមានមន្ទិលថា តើការ«ស្វាគមន៍» នឹងមានរូបភាពរបៀបយ៉ាងដូចម្ដេច?

លោក កែម ឡី ដែលជាអ្នកវិភាគនយោបាយឯករាជ្យ បានថ្លែងថា សេណារីយោបែបនេះ នឹងមានការវិលត្រឡប់​ឬមិន​មាន​ការវិលត្រឡប់មកវិញរបស់លោក សម រង្ស៊ី នឹងជួយឬរារាំងគណបក្សរបស់លោក គឺអាស្រ័យលើ​លក្ខខណ្ឌ​ដែល​គាត់មក។ លោកបានថ្លែងបន្តថា៖ «ចំពោះខ្ញុំ ខ្ញុំផ្តល់អនុសាសន៍ទៅគាត់ជាច្រើនលើកហើយថា គាត់ត្រូវមកដោយមិនចាំបាច់មាន​លិខិតលើកលែងទោសទេ។ គាត់អាចប្រឈមនឹងការកាត់ទោស ប្រសិនបើពួកគេចោទប្រកាន់ (...) គណបក្សរបស់គាត់ ទទួលបានប្រជាប្រិយភាពកាន់តែខ្លាំង។»

លោកបានថ្លែងថា លោក សម រង្ស៊ី ត្រូវបានតម្រូវឲ្យសរសេរលិខិតសុំទោស ទៅលោកនាយករដ្ឋមន្រ្តី ហ៊ុន សែន ដែល​ទង្វើនេះជាទង្វើមួយ ដែលនឹងធ្វើឲ្យរដ្ឋាភិបាលទទួលបានអត្ថប្រយោជន៍ ប្រសិនបើមានការសរសេរ​លិខិតបែបនេះ​ទៀត​នៅពេលនេះ។ លោកបានបកស្រាយទៀតថា ប្រសិនបើគាត់មកវិញដោយមិនមានលិខិតសុំទោស គាត់អាចទៅតុលាការ គាត់អាចទៅពន្ធនាគារ ហើយមិនមែនតែសហគមន៍អន្តរជាតិទេ ដែលនឹងដាក់សម្ពាធលើរដ្ឋាភិបាល តែប្រជាជនក្នុង​ស្រុក​ក៏ដាក់សម្ពាធដែរ។

កាលពីឆ្នាំ២០១២ ប្រធាននាធិបតីអាមេរិក លោក បារ៉ាក់ អូបាម៉ា (Barack Obama) នាយករដ្ឋមន្រ្តីបារាំង ហ្សង់ ម៉ាក អៃរ៉ូល៍ (Jean-Marc Ayrault) និងអ្នករាយការណ៍ពិសេសរបស់អង្គការសហប្រជាជាតិ លោក សុរិយា ស៊ូប៊ែរឌី ក៏បានលើកឡើង ផ្សេងៗគ្នាអំពីករណីរបស់លោក សម រង្ស៊ី ផងដែរ។

លោកសម រង្ស៊ី ត្រូវបានតុលាការកាត់ទោសឲ្យជាប់ពន្ធនាគារចំនួន ១២ឆ្នាំ ពីបទបំផ្លាញតម្រុយបង្គោល​ព្រំដែន​កម្ពុជា-​វៀតណាម និងបទក្លែងបន្លំឯកសារពាក់ព័ន្ធ នឹងផែនទីព្រំដែនកម្ពុជា-វៀតណាម។ ការកាត់ទោសនេះ ត្រូវបានគណបក្ស​ប្រឆាំងច្រានចោល និងអះអាងថា តុលាការមិនឯករាជ្យ តុលាការស្ថិតនៅក្រោមឥទ្ធិពលអ្នកនយោបាយ៕

----------------------------------------------------
ដោយ៖ គិន ង៉ុយ - ភ្នំពេញ ថ្ងៃទី០៨ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ