ក្រុមក្រសួងការពារជាតិ បានបំបាក់ចង្កូមក្រុមម្ចាស់ជើងឯកចម្ការកៅស៊ូបឹងកេត ដោយលទ្ធផល ៣-២ ក្នុងការប្រកួតជើង​ទី២ ពានរង្វាន់មិត្តហ្វូនខេមបូឌាលីក នាពហុកីឡាដ្ឋានអូឡាំពិក កាលពីរសៀលថ្ងៃទី០៣ ខែកក្កដាម្សិលមិញ។

កីឡាករការពារជាតិ (ក្រហម) និងកីឡាករបឹងកេត (បែតង) ក្នុងការប្រកួតថ្ងៃទី០៣ខែកក្កដា។

ការប្រកួតរវាងក្រុមទាំង២ ត្រូវរំខានដោយភ្លៀងធ្លាក់មួយមេយ៉ាងធំ ធ្វើឲ្យការប្រកួតមិនអាចបន្តបាន ហើយក៏បាន​ផ្អាក​ជាង​មួយម៉ោង ទើបអាចបន្តការប្រកួតទៀតបាន។

ដំណក់ទឹកភ្លៀងបានធ្លាក់មកលើទីលានចាប់តាំងពីចាប់ផ្តើមប្រកួតបាន ៨នាទីនៅក្នុងវគ្គទី១។ ប៉ុន្តែកំឡុងពេល​ដែល​ភ្លៀង​កំពុងតែធ្លាក់ខ្លាំង ខ្សែបម្រើឈិន ឈឿន អាចរកគ្រាប់បាល់បញ្ចូលទី នៅនាទីទី២១ ជួយឲ្យការពារជាតិនាំមុខមុន ដោយ​ការប្រើក្បាល។

នៅនាទីទី៣៧ លោកអាជ្ញាកណ្តាល នៅលើទីលានជី សាម៉ាឌី បានពិគ្រោះគ្នាជាមួយនឹងលោកអាជ្ញាកណ្តាលខ្សែបន្ទាត់ ហើយក៏សម្រេចចិត្តផ្អាកការប្រកួតបណ្តោះអាសន្ន ដោយសារតែមានទឹកដក់នៅលើទីលានច្រើនពេក ធ្វើឲ្យការបញ្ជូន​បាល់លែងទៅមុខ។

បន្ទាប់ពីផ្អាកអស់ពេលប្រមាណជាងមួយម៉ោងរួចមក ការប្រកួតក៏ដំណើរការជាបន្តទៀត ហើយភ្លាមៗនោះ កីឡាករ​សញ្ជាតិកាម៉េរូន ប្រៃវ៉េត អិមបាហ្គា (Privat Mbarga) ពាកអាវលេង១៤ រកគ្រាប់បាល់បញ្ចូលទី ឲ្យក្រុមបឹងកេត តាមបាន​ស្មើមកវិញ នៅនាទីទី៣៦។

កីឡាករពាក់អាវលេខ២៣ ហួង មករា បានជួយឲ្យក្រុមម្ចាស់ជើងឯកធ្វើការនាំមុខវិញ នៅនាទីទី ៥៧។ ប៉ុន្តែទោះជា​យ៉ាង​ណា ក្រុមរបស់ក្រសួងការពារជាតិ អាចវាយបកផ្ទួនៗ បាន២គ្រាប់ទៀត ដោយកីឡាករពាក់អាវលេខ២១ ភួង សុខសាន់​ណា នៅនាទីទី៧០ ខណៈដែលកីឡាករពាក់អាវលេខ៧ ពៅ ភារិទ្ធ បានបន្ថែម១គ្រាប់ទៀត នៅនាទីទី៧៤។

ទីបំផុតក្រុមការពារជាតិស្គាល់រសជាតិឈ្នះបឹងកេតហើយ ពោលគឺឈ្នះដោយលទ្ធផល ៣-២ ខណៈដែលកាលពីជើងទី១ ចាញ់បឹងកេត ៣-១ និងកាលពីរដូវកាលមុនចេញបឹងកេតទាំង២ជើងរួចមក។

ដូច្នេះ ១៧ប្រកួតរបស់បឹងកេត ឈ្នះ១២ ស្មើ១ និងចាញ់៤ មាន៣៧ពិន្ទុ ឈរនៅចំណាត់ថ្នាក់លេខ១ដដែល ខណៈដែល​១៧ប្រកួតរបស់ការពារជាតិ ឈ្នះ៥ ស្មើ៦ និងចាញ់៦ មាន២១ពិន្ទុ ឡើងទៅចំណាត់ថ្នាក់លេខ៧ រីឯក្រុមអគ្គស្នង​ការ​នគរបាលជាតិធ្លាក់ទៅចំណាត់ថ្នាក់លេខ៨វិញ។

ការប្រកួតបន្ទាប់របស់បឹងកេត នឹងត្រូវជួបជាមួយក្រុមណាហ្គាខប នៅថ្ងៃច័ន្ទទី០៨ ខែកក្កដា វេលាម៉ោង ០២រសៀល នាពហុកីឡាដ្ឋានជាតិអូឡាំពិក ខណៈដែលក្រុមក្រសួងការពារជាតិ នឹងត្រូវប៉ះក្រុមបៀលប្រាយ នៅម៉ោង ០៤រសៀល (ថ្ងៃដូចគ្នា, ទីតាំងដូចគ្នា)៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៤ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ