បទយកការណ៍៖ យុវជន​គណបក្ស​ប្រជាជន​កម្ពុជា និង​ការ​ឃោសនា​បោះឆ្នោត

ក្នុងយុទ្ធនាការឃោសនាបោះឆ្នោតថ្ងៃទីពីរនេះ នៅតាមដងវិថីនានាក្នុងរាជធានីភ្នំពេញ ហាក់មានសភាពស្ងប់ស្ងាត់ ជាងថ្ងៃទីមួយ។ ពុំឃើញមានត្តមានប្រជាពលរដ្ឋឡើងមកច្រើន ដើម្បីចូលរួមក្នុងការឃោសនានោះច្រើនកុះករ ដូចអាណត្តិមុនឡើយ មិនថាតែគណបក្សប្រជាជន គណបក្សសង្គ្រោះជាតិ និងគណបក្សដ៏ទៃទៀតនោះទេ។
Loading...
  • ដោយ: អ៊ុម វ៉ារី
  • កែប្រែចុងក្រោយ: June 28, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ភ្នំពេញ៖ ក្នុងយុទ្ធនាការឃោសនាបោះឆ្នោតថ្ងៃទីពីរនេះ នៅតាមដងវិថីនានាក្នុងរាជធានីភ្នំពេញ ហាក់មានសភាព​ស្ងប់ស្ងាត់ជាងថ្ងៃទីមួយ។ ពុំឃើញមានត្តមានប្រជាពលរដ្ឋឡើងមកច្រើន ដើម្បីចូលរួមក្នុងការឃោសនានោះច្រើនកុះករ ដូចអាណត្តិមុនឡើយ មិនថាតែគណបក្សប្រជាជន គណបក្សសង្គ្រោះជាតិ និងគណបក្សដ៏ទៃទៀតនោះទេ។


សកម្មភាពឃោសនារកសម្លេងឆ្នោត របស់យុវជនគណបក្សប្រជាជនកម្ពុជា។ (រូបថត MONOROOM.info/ O. Vary)

តែទោះជាយ៉ាងនេះក្តី ក្នុងឆ្នាំនេះគេសង្កេតឃើញវត្តមាននៃក្រុមយុវជន បានចូលប្រឡូកក្នុងឆាកនយោបាយ ដែលមាន​ឈ្មោះថា«ក្រុមសកម្មជនយុវជន ក.៧៧»។ ចាប់ពីម៉ោងប្រាំបីព្រឹក នៅសួនមុខវត្តបុទុមវត្តី មានចលនាយុវជន​របស់​គណបក្សប្រជាជនកម្ពុជានេះ ជាងពីររយនាក់ បានរៀបចំបើកយុទ្ធនាការឃោសនា ពីគោលនយោបាយគណបក្ស។ ការឃោសនានេះ ក៏បានដាក់បង្ហាញពីស្នាដៃរីកចំរើននានា ក្រោមកិច្ចអភិវឌ្ឍន៍ និងដឹកនាំដោយសម្តេចទាំងបី (លោក​ហ៊ុន សែន លោកជា ស៊ីម និងលោកហេង សំរិន) និងបានរៀបរាប់ពី ការរស់រានមានជីវិតជាថ្មី ជាលើកទីពីររបស់​ពលរដ្ឋ​កម្ពុជា តាមរយៈការរំដោះ ឲ្យរួចផុតពីការសម្លាប់រង្គាលរបស់ប៉ុល ពត ដោយរណៈសិរ្សសាមគ្គីសង្គ្រោះជាតិកម្ពុជា ដែល​សព្វថ្ងៃប្តូរមកជា«គណបក្សប្រជាជនកម្ពុជា»។

ក្នុងវេទិការនេះមានការតុបតែងលំអដោយទង់ជាតិ និងទង់គណបក្សកាត់ខ្វាត់ខ្វែងរោង មានពាក្យស្លោក រូបសញ្ញាបក្ស រូបផ្ទាំងស្លាកសញ្ញា និងនិម្មិតសញ្ញាបក្ស«រូបទេវតាបាចផ្កា» ព្រមទាំងលំដាប់លេខរៀងទី៤ របស់គណបក្សដែលចេញ​ដោយគ.ជ.បជាដើម។ ក្រៅពីចាក់ចម្រៀងកន្ត្រាក់អារម្មណ៍ ក្រុមអ្នកគាំទ្របានស្រែកជ័យឃោសឆ្លើយឆ្លងដាក់គ្នា ខ្លះ​បន្ទរ​តាម ខ្លះឆ្លើយចម្លើយតបមកវិញជាដើម។

ជយោ! គណបក្សប្រជាជនដ៏រុងរឿង គណបក្សប្រជាជនធ្វើអ្វីៗគ្រប់យ៉ាងដើម្បីប្រជាពលរដ្ឋ «ហ៊ានថាហ៊ានធ្វើ»។ បើ​គណបក្សប្រជាជនកម្ពុជាឈ្នះឆ្នោត គណបក្សប្រជាជនបន្តដឹកនាំកសាង និងអភិវឌ្ឍន៍លើគ្រប់វិស័យ។ គណបក្ស​ប្រជាជន ធានាលទ្ធិប្រជាធិបតេយ្យ សិទ្ធិសេរីភាពពលរដ្ឋ ការពារ ពង្រឹង និងលើកស្ទួយនូវយុត្តិធម៌សង្គម។ ទាំងនេះ​ក៏ជាជ័យឃោស របស់គណបក្សប្រជាជនក្នុងយុទ្ធនាការនេះដែរ។

នៅសួនមុខវត្តបុទុមវត្តីក្នុងថ្ងៃទីពីរនេះ មានក្រុមយុវជនគណបក្សប្រជាជនកម្ពុជា ក្នុងសម្លៀកបំពាក់«ពីរពណ៌» អាវសរ មួកសរ និងអាវពណ៌ខៀវ មួយខៀវ។ យុវជន យុវនារីទាំងនោះបានឈរកាន់ទង់(ជាតិ)តំណាងឲ្យប្រទេសជាតិ និងទង់​គណបក្សប្រជាជនកម្ពុជា។ ឈរអមសងខាងមហាវិថីព្រះសុរាមរិត(២៦៨) គ្រវីចុះឡើង និងអ្នកខ្លះទៀតរាំគ្រលែងចង្កិះ និងស្រែកឃោសនាតាមចង្វាក់ភ្លេងដែលបានប្រគុំ។

ក្នុងសម្លៀកបំពាក់អាវសរ មួកសរ ដែលរំលេចដោយពាក្យថា «ខ្ញុំស្រលាញ់ ខ្ញុំអាណិត ខ្ញុំពេញចិត្ត ខ្ញុំជឿទិកចិត្ត សម្តេច​តេជោហ៊ុនសែន (មានរូបសញ្ញាគណបក្ស និងការគូលលើលេខ៤) ខ្ញុំបោះឆ្នោតជូនគណបក្សប្រជាជនកម្ពុជា»។ សម្រាប់​អាវពណ៌បៃតងវិញ ក៏បានចារនៅផ្នែកខាងខ្នងដែរថា «យុវជនគណបក្សប្រជាជនកម្ពុជា» និងនៅផ្នែកលើនៃចុងដៃអាវ ខាងឆ្វេងដាក់ថា «ក.៧៧»។

ដោយធ្វើជាសម្លេង«ម្ញែក» ពោលដោយយុវជន ចរិយា តំណាងឲ្យក្រុមយុវជន បាននិយាយថា បាឡុងលេខមួយគឺមាន​លេខប៉ុន្មាន? (យុវជន-យុវនារី ដែលចូលរួមបានស្រែកព្រមៗគ្នាថា «គឺលេខ៤»)។ យុវជននេះបន្តទៀតថា ចុះបាឡុង​លេខពីរគឺមានលេខប៉ុន្មាន? (ក្រុមយុវជន៖ «គឺលេខ៤»)។ ចុះបាឡុងលេខបីគឺមានលេខប៉ុន្មាន? (ក្រុមយុវជន៖ «គឺលេខ៤»)។ ចុះបាឡុងលេខបួន​ គឺមានលេខប៉ុន្មាន? (ក្រុមយុវជន៖ «គឺលេខ៤»)។

អង្គុយក្រោមម្លប់ឈើដោយស្ងៀមស្ងាត់ ទំនងជានឿយហត់ យុវជននារី សិលា ជាមួយនឹងក្រុមមានគ្នាបីនាក់ បាន​និយាយ​ថា ការដែលនាងមកចូលរួម ក្នុងយុទ្ធនាការឃោសនានេះ ព្រោះតែគណបក្សប្រជាជនកម្ពុជា បានបង្កើតនូវ​សមិទ្ធិផល​ថ្មីៗ​ជាច្រើន ដូចជាស្ពានថ្នល់ មន្ទីរពេទ្យ សាលារៀន ពិសេសក្នុងភូមិខ្ញុំដែលពីដើមឡើយមិនមានទេ ។ មួយទៀតបាន​ផ្តល់​អាហារូបករណ៍ថ្នាក់មហាវិទ្យាល័យបួនឆ្នាំដល់ខ្ញុំ។ «គ្រួសារខ្ញុំក្រីក្រ គ្នានលទ្ធភាពបញ្ជូនខ្ញុំមករៀននៅភ្នំពេញទេ តែដោយ​ខ្ញុំបានចូលរួមជាមួយ នឹងចលនាយុវជនគណបក្សប្រជាជនកម្ពុជា ទើបខ្ញុំមានឱកាស បានស្គាល់ការសិក្សានៅ​ភ្នំពេញ​នេះ»។

និយាយដោយទឹកមុខញញឹម យុវតី ចិន្តា បានបន្ថែមថា សម្រាប់រូបនាងវិញក៏មិនខុសពីសិលា ដែរ ហើយម្យ៉ាងទៀតឪពុក ម្តាយរបស់នាងជាអ្នកគាំទ្រគណបក្សប្រជាជន គាត់មានតួនាទីធំក្នុងរដ្ឋាភិបាលដែរ។ «ឪពុកម្តាយខ្ញុំគាត់ មិនបាន​ហាម​ឃាត់ ឬបិទបាំងសេរីភាព ក្នុងការចូលរួមយុទ្ធនាការឃោសនានេះទេ ហើយក៏មិនបង្ខំខ្ញុំក្នុងការគោរព ឬស្រលាញ់​បក្ស​ណាមួយដែរ តែខ្ញុំជ្រើសរើសយកគណបក្សប្រជាជនដូចគាត់ដែរ ថ្ងៃមុខងាយស្រួលធ្វលការក្នុងស្ថាប័នរដ្ឋ»។

ដោយឡែកយុវជន ម្នាក់ផ្សេងទៀតឈ្មោះ វិចិត្រ បានបង្ហាញថា ប្អូនមានមោទនភាពណាស់ ដែលបាន​ចូលរួមក្នុង​ចលនា​យុវជននេះ។ ប្អូនបន្តរថា ដើមឡើងប្អូនឯកកោរណាស់ គ្មានទីពុំនាក់ រស់អាស្រ័យវត្ត គ្មានភាពក្លាហាន មិនដែលបាន​ចូលរួមក្នុងកិច្ចការសង្គមទេ ទើបតែពេលនេះទេ បានចូលរួមយ៉ាងសកម្ម និងក៏បានបង្ហាញពីសម្ថភាពរបស់ខ្លួន ក្នុង​ការ​ជួយសង្គម។ «ខ្ញុំអតីតក៏ជាចលនានិស្សិតវាស់វែងដីធ្លីដែរ ហើយខ្ញុំក៏បានប្រលងជាប់ ធ្វើការនៅក្រសួងសុរិយោដីដែរ។ ទាំងនេះហើយដែលធ្វើឲ្យខ្ញុំមានការពេញចិត្ត និងចូលរួមនោះ។»

សរុបជារួម នេះជាស្ថានភាពមួយ ប្លែកពីការបោះឆ្នោតអាណត្តិមុន ហើយក៏ជាជំហានទីមួយដែរ ក្នុងយុទ្ធនាការឃោសនា​រកសំឡេងឆ្នោត របស់គណបក្សប្រជាជនកម្ពុជា ដោយមានក្រុមយុវជន និងក្រុមសិល្បករចូលរួមនេះ។ ក្នុងយុទ្ធនាការ​ឃោសនានេះ គណបក្សប្រជាជនបានផ្ញើរសារជាច្រើន ជូនដល់ប្រជាពលរដ្ឋឲ្យបានដឹង ដូចជាគោលការណ៍ទាំងដប់​មួយចំណុច និងសារសំខាន់ៗទ្រនានាជាច្រើនទៀត។

សូមរម្លឹកថា យុទ្ធនាការឃោសនាបោះឆ្នោតជ្រើសរើសតំណាងរាស្ត្រ អាណត្តិទីប្រាំមានរយៈពេលសាមសិបថ្ងៃ ចាប់ពីថ្ងៃ​ទី២៧ ខែមិថុនា ដល់ថ្ងៃទី២៦ ខែកក្កដា ឆ្នាំ២០១៣ ។ តាម លោក មាន សទិ សមាជិក គ.ជ.ប បានប្រកាសកាលពី​ថ្ងៃ​ទី២៧ ខែមិថុនានេះថា ការឃោសនារបស់គណបក្សនយោបាយទាំងអស់ ត្រូវបានឈប់សម្រាកនៅចន្លោះម៉ោងដប់យប់ ដល់ម៉ោងប្រាំមួយព្រឹក។ រាល់ការឃោសនា ដោយមានឧបករណ៍បំពងសំឡេង ត្រូវហាមឃាត់ចាប់ពីម៉ោងដប់ពីរថ្ងៃត្រង់​ដល់ម៉ោងពីររសៀល។ យុទ្ធនាការនៃការឃោសនាបោះឆ្នោតនេះ ត្រូវបញ្ចប់នៅម្ភៃបួនម៉ោងមុនថ្ងៃបោះឆ្នោត (ថ្ងៃ​បោះ​ឆ្នោតតំណាងរាស្រ្តអាណត្តិទីប្រាំ ឆ្នាំ២០១៣ នឹងត្រូវធ្វើនៅថ្ងៃអាទិត្យ ទី២៨ ខែកក្កដា ខាងនុខនេះ)។

រីឯក្រុមយុវជនគណបក្សប្រជាជនកម្ពុជា ប្រចាំគ្រឹស្ថានឧត្តមសិក្សាក្នុងរាជធានីភ្នំពេញ ហៅកាត់ថា ក.៧៧ បង្កើតឡើង ដើម្បីធ្វើសកម្មភាពឈរលើគោលការណ៍ ពង្រឹងគុណភាព និងសាមគ្គីផ្ទៃក្នុង ជាមួយអង្គការយុវជនដទៃទៀត របស់​គណបក្សប្រជាជនកម្ពុជា។ ព្រមទាំងទទួលការគាំទ្រ និងធានាការកសាងគណបក្សឲ្យបានគ្រប់ជ្រុងជ្រោយ និង បង្ក​លក្ខណៈងាយស្រួលដល់និស្សិត បញ្ញវ័ន្ត ចូលជាសមាជិកគណបក្សប្រជាជនកម្ពុជាឲ្យបានច្រើន៕

---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២៨ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...