ការប្រកួតខុនហ្វេដឺរ៉េសិនខាប់ (Confederations Cup) លើកទី២ ក្នុងពូលប៊ី (B ) កាលពីយប់មិញ ក្រុមគោជល់អេស្ប៉ាញ បានលត់ក្រុមសិស្សប្អូនតាហ៊ីទីដល់ទៅ ១០-០ ខណៈដែលក្រុមអ៊ុយរ៉ាហ្គាយ បានយកឈ្នះក្រុមនីហ្សេរីយ៉ា ទាំងបុកពោះ​ដោយលទ្ធផល ២-១ នៅប្រទេសប្រេស៊ីល។

ខ្សែប្រយុទ្ធអេស្ប៉ាញ តូរេស ចាប់ដៃសុំទោសអ្នកចាំទីតាហ៊ីទី រ៉ូស្ស៍ នៅពាក់កណ្ដាលម៉ោងដំបូង។

ខ្សែប្រយុទ្ធរបស់ក្រុមតោខៀវឆែលស៊ី (Chelsea) ហ្វឺណាន់ដូ តូរែស (Fernando Torres) ដែលធ្លាក់ទម្រង់លេងយូរ​ហើយ​នោះ មិនសំចៃទៀតទេ ពោលគឺគាត់ទាត់បញ្ចូលទីបាន ៤គ្រាប់តែម្នាក់ឯង ហើយស្ទើរតែមានឱកាសរកគ្រាប់ទី៥ទៅហើយ ប៉ុន្តែបែរជាទាត់ប៉េណាល់ទីមិនចូលទៅវិញ។

ខ្សែប្រយុទ្ធចាស់វស្សារបស់ក្រុមបាសេឡូណា (Barcelona) ដេវីដ វីឡា (David Villa) ក៏មិនឲ្យចាញ់តូរែសប៉ុន្មានដែរ ដោយ​គាត់អាចទាត់បំប៉ោងសំណាញ់ទីក្រុមតាហ៊ីទី បាន៣គ្រាប់តែម្នាក់ឯងដូចគ្នាដែរ។

មិនទាន់ឆ្អែតឆ្អន់ទេ សម្រាប់ក្រុមម្ចាស់ជើងឯកពិភពលោក និងម្ចាស់ជើងឯកអ៊ឺរ៉ុបមួយនេះ ដោយខ្សែបម្រើក្រុមមេឃខៀវ​ម៉ែនស៊ីធី (Man City) ដេវីដ ស៊ីលវ៉ា ក៏រកបាន២គ្រាប់ដែរ ខណៈដែលកីឡាករមាឌល្អិត ចន ម៉ាតា (Juan Mata) បន្ថែម​បាន​១គ្រាប់ទៀត ធ្វើឲ្យអេស្ប៉ាញ មានកំណត់ដ៏អស្ចារ្យមួយ ដែលអាចឈ្នះគូប្រកួតដល់ទៅ ១០-០។

ចំណែកឯក្រុមជម្រើសជាតិអ៊ុយរ៉ាហ្គាយវិញ បានឈ្នះក្រុមនីហ្សេរីយ៉ា ទាំងប្រផុតប្រផើយ បន្ទាប់ពីខ្សែប្រយុទ្ធ ឌីហ្គូ ហ្វឡែន (Diego Forlan) បានរកគ្រាប់បាល់ទី២ បានសម្រេចនៅនាទីទី៥១ ខណៈដែលការប្រកួតនោះ ជាការប្រកួតគម្រប់​លើកទី ១០០របស់គាត់ផងនោះ។

កីឡាករប្រធានក្រុម ឌីហ្គូ លូហ្គាណូ (Diego Lugano) បានជួយឲ្យអ៊ុយរ៉ាហ្គាយធ្វើការនាំមុខមុនតាំងតែពីនាទីទី១៩ ខណៈ​ដែលត្រូវក្រុមនីហ្សេរីយ៉ា តាមបានស្មើមកវិញនៅនាទីទី៣៧ ដោយកីឡាករ ចនអូប៊ី មីហ្គែល (John Obi Mikel)។

ដូច្នេះនៅក្នុងពូលប៊ីនេះ ក្រុមអេស្ប៉ាញបានកក់កៅអីឡើងទៅកាន់វគ្គពាក់កណ្តាលផ្តាច់ព្រ័ត្រហើយ បន្ទាប់ប្រកួតឈ្នះ​ទាំង​២លើក មាន៦ពិន្ទុឈរលេខ១លើកំពូលតារាង ខណៈដែលក្រុមកោះតាហ៊ីទី ត្រូវហាលអាវទៅផ្ទះវិញ បន្ទាប់ពី២ប្រកួត​ចាញ់គេ ១៥គ្រាប់រួចមក។

រីឯក្រុមនីហ្សេរីយ៉ា និងក្រុមអ៊ុយរ៉ាហ្គាយ នឹងរងចាំការប្រកួតលើកទី៣សិន ទើបដឹងថាក្រុមមួយណា នឹងអាចឡើង​ទៅ​កាន់វគ្គជាបន្ត បន្ទាប់ពី២ប្រកួតមកនេះ ក្រុមទាំង២ឈ្នះ១ចាញ់១ដូចគ្នា មានម្នាក់៣ពិន្ទុដូចគ្នា ខណៈដែលអ៊ុយរ៉ាហ្គាយ នឹងត្រូវជួបក្រុមតាហ៊ីទី ចំណែកឯនីហ្សេរីយ៉ា នឹងប៉ះក្រុមខ្លាំងអេស្ប៉ាញ នៅការប្រកួតលើកទី៣៕

សូមទស្សនាការសង្ខេប ការប្រកួតទាំងពីរនេះឡើងវិញ ក្នុងវីដេអូខាងក្រោម៖

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២១ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ