ខៀវ សុភ័ក​ថា​សុខ​ចិត្ត​កាត់​ក បើ​ហ៊ុន សែន​បញ្ជារ​​ឲ្យ​មន្ត្រី​ធ្វើ​អត្តសញ្ញាណប័ណ្ណ​ខ្មែរ​ឲ្យ​យូន

លោក ខៀវ សុភ័ក អ្នកនាំពាក្យក្រសួងមហាផ្ទៃកម្ពុជា បានថ្លែងបែបនេះ ក្រោយបន្ទាប់ពីបេក្ខជនតំណាងរាស្ត្រ​ក្រុងប៉ៃលិន របស់គណបក្សសង្គ្រោះជាតិ លោក សួង សុភ័ណ្ឌ បានដាក់ពាក្យបណ្តឹង​ទៅ​កាន់សាលាដំបូងរាជធានីភ្នំពេញ ប្តឹងប្រឆាំងទៅលើលោកនាយករដ្ឋមន្ត្រី ហ៊ុន សែន ពីបទក្លែងក្លាយឯកសារសាធារណៈ កាលពីព្រឹកថ្ងៃទី២០ ខែមិថុនា ឆ្នាំ២០១៣ និងថាបានផ្តល់អត្តសញ្ញាប័ណ្ណជនជាតិខ្មែរដោយខុសច្បាប់ ទៅឲ្យ«យួន»។
Loading...
  • ដោយ: លោក គិន
  • កែប្រែចុងក្រោយ: June 20, 2013
  • ប្រធានបទ:
  • អត្ថបទ: មានបញ្ហា?
  • មតិ-យោបល់

ភ្នំពេញ៖ លោក ខៀវ សុភ័ក អ្នកនាំពាក្យក្រសួងមហាផ្ទៃកម្ពុជា បានថ្លែងបែបនេះ ក្រោយបន្ទាប់ពីបេក្ខជនតំណាងរាស្ត្រ​ក្រុងប៉ៃលិន របស់គណបក្សសង្គ្រោះជាតិ លោក សួង សុភ័ណ្ឌ បានដាក់ពាក្យបណ្តឹង​ទៅ​កាន់សាលាដំបូងរាជធានីភ្នំពេញ ប្តឹងប្រឆាំងទៅលើលោកនាយករដ្ឋមន្ត្រី ហ៊ុន សែន ពីបទក្លែងក្លាយឯកសារសាធារណៈ កាលពីព្រឹកថ្ងៃទី២០ ខែមិថុនា ឆ្នាំ២០១៣ និងថាបានផ្តល់អត្តសញ្ញាប័ណ្ណជនជាតិខ្មែរដោយខុសច្បាប់ ទៅឲ្យ«យួន»។


លោកសួង សុភ័ណ្ឌ ប្រធានចលនាយុវជន គណបក្សសមរង្សី កាលពីខែមិនាឆ្នាំ២០១២កន្លងទៅ។ (រូបថត samrainsypartyyouth.blogspot.com)

នៅក្នុងពាក្យបណ្តឹងរបស់លោក សួង សុភ័ណ្ឌ បានប្តឹងលោកនាយករដ្ឋមន្ត្រីទៅសាលាដំបូងរាជធានីភ្នំពេញ ថាជាអ្នក​ផ្តើមគំនិត រួមដៃជាមួយបក្សពួករបស់ខ្លួន បណ្តោយអោយជនជាតិវៀតណាម ចូលមករស់នៅកម្ពុជា ដោយខុសច្បាប់ ហើយមានសិទ្ធិកាន់អត្តសញ្ញាណប័ណ្ណ ដើម្បីចូលរួមបោះឆ្នោតថែមទៀត។

លោក សួង សុភ័ណ្ឌ អាយុ២៦ ឆ្នាំ ជាបេក្ខជនតំណាងរាស្ត្ររបស់គណបក្សសង្គ្រោះជាតិ បានថ្លែងឲ្យដឹង នៅខាងមុខ​របង​សាលាដំបូងរាជធានីភ្នំពេញថា លោកប្តឹងប្រឆាំងលោកនាយករដ្ឋមន្ត្រី ហ៊ុន សែន ពីបទក្លែងឯកសារសាធារណៈ ដែល​លោកចង់ផ្តោត ទៅលើការផ្តល់អត្តសញ្ញាប័ណ្ណជនជាតិខ្មែរ ទៅឲ្យជនជាតិវៀតណាមដោយក្រសួងមហាផ្ទៃ ដែលធ្វើឲ្យ​ជនជាតិវៀតណាមទាំងនោះ មានសិទ្ធិបោះឆ្នោតស្របច្បាប់នៅកម្ពុជា។ លោកបានថ្លែងឲ្យដឹងទៀតថា ៖ «ខ្ញុំមានភស្តុតាង​គ្រប់គ្រាន់ដែលបញ្ជាក់ថាលោក ហ៊ុន សែន និងគូរកនរបស់គាត់ដែលជាមន្ត្រីជំនាញ គឺជាអ្នកអនុញ្ញាតិឲ្យផ្តល់​អត្តសញ្ញាណប័ណ្ណ ដល់ពួកយួនទាំងនោះ ដោយរៀបចំឯកសារក្លែងក្លាយ។ ពួកយួនទាំងនោះពុំមានសិទ្ធិរស់នៅ ក្នុង​ប្រទេសកម្ពុជាទេ តែធ្វើឯកសារឲ្យពួកគេរស់នៅស្របច្បាប់ក្នុងប្រទេសកម្ពុជា»។

លោកបានឲ្យដឹងទៀតថា យោងទៅតាមច្បាប់ ជនជាតិទាំងឡាយអាចទទួលបានសញ្ញាតិកម្ពុជា ហើយរស់នៅក្នុង​ប្រទេសកម្ពុជាស្របច្បាប់ ត្រូវតែរស់នៅក្នុងប្រទេសកម្ពុជាយ៉ាងហោចណាស់៣ឆ្នាំសិន ទើបអាចសុំសញ្ញាតិកម្ពុជាបាន ប៉ុន្តែជនជាតិវៀតណាមទាំងនោះ បានទទួលអត្តសញ្ញាណប័ណ្ណខ្មែរ ដោយពុំបានអនុវត្តន៍ទៅតាមច្បាប់នោះទេ។ លោក​បានថ្លែងឲ្យដឹងថា៖ «ខ្ញុំមានការឈឺចាប់បំផុត ដែលកូនខ្មែរកើតឡើងនៅលើដី ខ្មែរពុំមានអត្តសញ្ញាណប័ណ្ណប្រើទេ ប៉ុន្តែ​យូនមានអត្តសញ្ញាណប័ណ្ណខ្មែរប្រើទៅវិញ ដោយមានការជ្រុំជ្រែងពីមន្ត្រី គ្រប់ជាន់ថ្នាក់ រូមទាំងលោកនាយករដ្ឋមន្ត្រីហ៊ុន សែន»។

លោកបានថ្លែងឲ្យដឹងទៀតថា លោកពុំមានការភ័យខ្លាច ទៅនឹងការប្តឹងបករបស់លោកនាយករដ្ឋមន្ត្រីហ៊ុន សែននោះទេ ប៉ុន្តែលោកស្វាគមន៍ បើសិនជាមានការប្តឹងបក ពីសំណាក់លោកនាយករដ្ឋមន្ត្រីហ៊ុន សែន ដើម្បីឲ្យគាត់មកតុលាការ​និយាយតតាំងគ្នា ស្វែងរកការពិត។

កាលពីថ្ងៃទី១៩ ខែមិថុនា២០១៣ ក្នុងពិធីសម្ពោធអាគារសិក្សា នៅស្រុកអង្គស្នួល ខេត្តកណ្តាល លោកនាយករដ្ឋមន្ត្រីហ៊ុន សែន បានលើកឡើងថា គ្មានវត្តមានជនជាតិវៀតណាម រហូតដល់៤លាន៥សែននាក់នៅកម្ពុជានោះទេ គឺមានមិនដល់ ១០ម៉ឺននាក់ផង។

លោក ខៀវ សុភ័គ អ្នកនាំពាក្យក្រសួងមហាផ្ទៃបានថ្លែងឲ្យដឹងថា អ្វីដែលលោកសួង សុភ័ណ្ឌបានកំពុងធ្វើនោះ គឺពុំពិតទេ គាត់កំពុងតែធ្វើការចោទប្រកាន់ ទៅលើលោកនាយករដ្ឋមន្ត្រី ហ៊ុន សែន ក៏ដូចជាក្រសួងមហាផ្ទៃ ពីព្រោះក្រសួងពុំដែល​បញ្ជារឲ្យមន្ត្រីណា ធ្វើអត្តសញ្ញាណប័ណ្ណទៅឲ្យជនបរទេសនោះទេ អ្វីដែលគាតធ្វើនោះគឺ ដើម្បីឲ្យមានប្រជាប្រិយភាព​មុន​ពេលបោះឆ្នោតប៉ុណ្ណោះ។ លោកបានថ្លែងឲ្យដឹងទៀតថា៖ «ប្រសិនបើតុលាការរកឃើញថា សម្តេច ហ៊ុន សែន បានបញ្ជារ​ឲ្យមន្ត្រីធ្វើអត្តសញ្ញាណប័ណ្ណឲ្យយូនមែននោះ ខ្ញុំសុខចិត្តកាត់កខ្ញុំ»។

សូមរម្លឹកថា លោក សួង សុភ័ណ្ឌ ជាអតីតប្រធានចលនាយុវជនរបស់គណបក្សសមរង្ស៊ី ក៏ធ្លាប់បានដាក់ពាក្យបណ្តឹង ប្រឆាំងលោកនាយករដ្ឋមន្ត្រី ហ៊ុន សែន ពាក់ព័ន្ធនឹងព្រឹត្តិការណ៍អ្នកស្លាប់នៅកោះពេជ្រ តែត្រូវបានតុលាការ សម្រេច​មិន​ចាត់ការ កាលពីចុងឆ្នាំ២០១២៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...