សង្គ្រាមហ្វេសប៊ុក៖ សម រង្សីថាឈ្នះលើបណ្ដាញសង្គម តែហ៊ុន សែនថាអត់មានលេងទេ
កណ្តាល៖ បន្ទាប់ពីប្រធានបក្សសង្គ្រោះជាតិ រស់នៅនិរទេសក្រៅប្រទេសដើម្បីគេចពីការជាប់ពន្ធនាគារ បានប្រកាសពី ជ័យជម្នះនៃការបោះឆ្នោត លើលោកនាយករដ្ឋមន្ត្រី ក្នុងបណ្តាញសង្គម facebook ជាការឆ្លើយតបវិញ លោកនាយករដ្ឋមន្ត្រីបានប្រកាសជាសាធារណៈ ឲ្យអ្នកលេងបណ្តាញសង្គម ហ្វេសប៊ុក (Facebook) កុំបោះឆ្នោតឲ្យគណបក្សប្រឆាំង ជាពិសេសបុគ្គល លោក សម រង្ស៊ី។
ប្រធានគណបក្សប្រឆាំង លោក សម រង្សី (រូបខាងឆ្វេង) និងនាយករដ្ឋមន្ត្រី លោក ហ៊ុន សែន កាលពីខែកុម្ភះឆ្នាំ២០០៦ ក្នុងរាជធានីភ្នំពេញ។ (រូបថត AFP)
ថ្លែងចេញពីខេត្តកណ្តាល ស្រុកអង្គស្នួល ក្នុងពិធីសម្ពោធអគារសិក្សា លោកនាយករដ្ឋមន្ត្រីហ៊ុន សែនបាន មានប្រសាសន៍ថា ខុទ្ទកាល័យរបស់លោក ធ្លាប់បានប្រកាសបដិសេធពីឈ្មោះរបស់លោក នៅក្នុងហ្វេសប៊ុករួចហើយ ដូច្នេះលោក ផ្តាំផ្ញើរទៅយុវជនអ្នកលេងហ្វេសប៊ុក ឲ្យដឹងថា លោកមិនមាន Account ផ្ទាល់ខ្លួន ក្នុងហ្វេសប៊ុក ដូចការលើកឡើងរបស់គណបក្សប្រឆាំងទេ។ លោកបានថ្លែងឲ្យដឹងថា ៖ «ខ្ញុំសុំអំពាវនាវឲ្យប្រជាពលរដ្ឋ កុំឲ្យបោះឆ្នោតឲ្យគណបក្សប្រឆាំង ដោយសារគណបក្សប្រឆាំង បានប្រកាសថាខ្លួន មិនទទួលយកលទ្ធផលការបោះឆ្នោត។ បើមិនបោះឆ្នោតឲ្យគណបក្សប្រជាជនទេ បោះឆ្នោតឲ្យគណបក្សផ្សេងទៅ កុំបោះឲ្យបក្សប្រឆាំងនាំតែខាតសន្លឹកឆ្នោត។»
លោកបានថ្លែងឲ្យ ដឹងទៀតថា នៅពេលទំនេរលោកមើលសៀវភៅ ពិនិត្យឯកសារ និងលេងអុក មិនមែនសម្រាប់ហ្វេសប៊ុក ដូចលោក សម រង្ស៊ី ទេ ដូច្នេះការប្រកាសពីជ័យជម្នះរបស់បក្សប្រឆាំង លើលោក ក្នុងហ្វេសប៊ុក នោះគ្រាន់តែជ័យជម្នះតែម្នាក់ឯងប៉ុណ្ណោះ។ លោកបានថ្លែងឲ្យដឹងទៀតថា ៖ «បើសិនជាខ្ញុំមាន facebook មែននោះ គ្រាន់តែសមាជិកគណបក្សប្រជាជនកម្ពុជា ចុច Like ក៏ឈ្នះបក្សប្រឆាំង ដូចអ្វីដែល IRI បានប្រកាសពីលទ្ធផលនៃការស្ទង់មតិ ក្នុងពេលកន្លងមក អំពីប្រជាប្រិយភាពរបស់ខ្ញុំ»។
កាលពីថ្ងៃទី១៣ខែមិថុនា មេដឹកនាំគណបក្សប្រឆាំង លោក សម រង្ស៊ី ប្រកាសនៅខណៈជួបជាមួយនឹងក្រុមយុវជន តាមវិដេអូខនហ្វឺរេន ពីក្រៅប្រទេស ពីជ័យជម្នះរបស់លោក នៅក្នុងហ្វេសប៊ុក លើលោកហ៊ុនសែនថា លោកទទួលបានអ្នកគាំទ្រ នៅលើគេហទំព័រហ្វេសប៊ុករបស់លោកច្រើនជាង អ្នកគាំទ្រ លោក ហ៊ុន សែន សម្រាប់ជាបេក្ខភាពជានាយករដ្ឋមន្ត្រីដូចគ្នា។
រូបថត លោក ហ៊ុន សែន នៅលើបណ្ដាញសង្គមហ្វេសប៊ុកមួយដាក់ឈ្មោះលោក
ប៉ុន្តែលោកហ៊ុន សែនថាមិនមែនជារបស់លោកទេ។
រូបថត លោក សម រង្សី នៅលើបណ្ដាញសង្គមហ្វេសប៊ុករបស់លោក។
លោក សម រង្ស៊ី បង្ហាញថា លោកទទួលបានអ្នកគាំទ្រ ៦៧,៥៩៥នាក់ គឺច្រើនជាង ចំនួន៣៤នាក់ នៃអ្នកគាំទ្រលោកនាយករដ្ឋមន្ត្រី ហ៊ុន សែន ដែលមានអ្នកគាំទ្រ ៦៧,៥៦១នាក់នោះ។ ហើយការប្រកាសបែបនេះ ផ្អែកលើលទ្ធផលនៃការស្ទង់មតិ ដោយការចុច Like ឬចូលចិត្ត ទៅលើគេហទំព័រហ្វេសប៊ុក បេក្ខជននាយករដ្ឋមន្ត្រីទាំងពីរ ដោយគិតមកទល់ថ្ងៃទី១២ ខែមិថុនា ឆ្នាំ២០១៣ វេលាម៉ោង៧ និង ៩នាទី។
មួយថ្ងៃមុនការប្រកាសឈ្នះនេះ លោក សម រង្ស៊ី ក៏បានអំពាវនាវឲ្យមានអ្នកគាំទ្រជួយចុចចូលចិត្ត (like) លើហ្វេសប៊ុករបស់លោកឲ្យបាន១ពាន់នាក់ទៀត ដើម្បីឈ្នះ លោក ហ៊ុន សែន ខណៈលោកនៅថ្(ងៃទី១១ មិថុនា ២០១៣ នៅម៉ោង ១៥:៣៥ លោក ហ៊ុន សែន បានទទួល អ្នកគាំទ្រ ៦៧,៤៨៩ "LIKE" ហើយ សម រង្ស៊ី បានទទួល ៦៣,៩០៤ "LIKE" ។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិបានថ្លែងឲ្យដឹងថា ការគាំទ្រតាមរយៈហ្វេសប៊ុក នោះគឺជាឆន្ទៈរាស្ត្រពិតប្រាកដ គឺពុំមានអ្នកណាបង្ខំឲ្យធ្វើនោះទេ។ លោកបានបន្ថែមទៀតថា ៖ «ប្រសិនបើរាស្ត្រទូទៅទទួលបានព័ត៌មានបោះឆ្នោត ដូចយុវជនតាមហ្វេសប៊ុក នោះខ្ញុំជឿជាក់ថាគណបក្សសង្គ្រោះជាតិពិតជាឈ្នះឆ្នោត ដែលគ.ជ.ប មិនអាចបន្លំបាន»។
លោក កែម ឡី អ្នកវិភាគសង្គមឯករាជ្យបាននិយាយថា ប្រសិនលោកពុំមាន Account ហ្វេសប៊ុក វាគឺជារឿងត្រឹមត្រូវ ប្រសិនបើរក គណេយ្យរបស់គាត់នៅលើទំព័រ Face Book មិនឃើញ។ មកដល់ពេលនេះ ពុំមាននយោបាយអត់មាន Face Book នោះទេ។ លោកបានពន្យល់ទៀតថា ៖ «ចំពោះការបាត់បង់ហ្វេសប៊ុក គឺជាការបាត់បង់ឳកាស ក្នុងការទទួលព័ត៌មានពីយុវជន បើទោះបីជាព័ត៌មាននោះពិតកំរិតណាក៏ដោយ តែអាចទទួលបានព័ត៌មានគ្រប់ជ្រុងជ្រោយ»៕
----------------------------------------------------
ដោយ៖ គិន ង៉ុយ - ភ្នំពេញ ថ្ងៃទី១៨ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ