កៅអីរបស់ក្រុមបាល់ទាត់អាស៊ីទាំង៣ និងអូសេអានី មួយ ដែលត្រូវធ្វើដំណើរទៅប្រកួត បាល់ទាត់ពិភពលោកឆ្នាំ២០១៤ (2014 World Cup) នៅក្នុងប្រទេសប្រេស៊ីលនោះ បានរកឃើញម្ចាស់ជាផ្លូវការហើយ ពោលគឺមានក្រុមស៊ាំរៃខៀវជប៉ុន, អូស្ត្រាលី, អ៊ីរ៉ង់ និង​ក្រុមជម្រើសជាតិកូរ៉េខាងត្បូង។

ក្រុមកីឡាករបាល់ទាត់ជម្រើសជាតិអៀរ៉ង់ សប្បាយរីករាយ នៅពេលដឹងថាខ្លួនមានកៅអីឡើងទៅប្រេស៊ីល។

ក្រុមជម្រើសជាតិអូស្ត្រាលី បានទទួលកៅអីទៅលេងបាល់ទាត់ពិភពលោករបស់ខ្លួនជាលើកទី៣ បន្ទាប់យកឈ្នះ ១-០ លើ​ក្រុមអ៊ីរ៉ាក់ ក្នុងទីក្រុងស៊ីដនី (Sydney) កាលពីយប់មិញ ហើយបានបញ្ចប់ដោយឈរចំណាត់ថ្នាក់លេខ២ ក្នុងពូល​បន្ទាប់​ពីជប៉ុន។

រីឯក្រុមអ៊ៀរ៉ង់ បានយកឈ្នះក្រុមកូរ៉េខាងត្បូង ១-០ ហើយទទួលបានចំណាត់ថ្នាក់លេខ១ ក្នុងពូល។ ប៉ុន្តែទោះជាយ៉ាង​ណា កូរ៉េខាងត្បូងនៅមានឱកាសឡើងទៅកាន់វគ្គជាបន្តដែរ ព្រោះបានទទួលចំណាត់ថ្នាក់លេខ២ ក្នុងពូលដែរនោះ។

ចំណែកឯក្រុមអ៊ុយបេហ្គីស្ថាន បានលត់ក្រុមកាតា ៥-១ ប៉ុន្តែទោះជាយ៉ាងណា ក៏មិនអាចជួយឲ្យពួកគេទទួល​បានកៅអី​ប្រេស៊ីលដែរ ព្រោះបានត្រឹមតែចំណាត់ថ្នាក់លេខ៣ ក្នុងពូល។ អ៊ុយបេហ្គីស្ថាន មានពិន្ទុស្មើគ្នាជាមួយកូរ៉េខាងត្បូង ប៉ុន្តែ​ខុសគ្នាត្រង់គ្រាប់ទាត់បញ្ចូលទីគ្នា តែ១គ្រាប់គត់ ដែលធ្វើឲ្យមានការសោកស្តាយជាទីបំផុត។

ប៉ុន្តែពេលនេះ អ៊ុយបេហ្គីស្ថាននៅមានឱកាសមួយទៀត ពោលគឺពួកគេត្រូវប្រកួតចាញ់ធ្លាក់ (play-off) ជាមួយនឹងក្រុម​លេខ៣ក្នុងពូលផ្សេង សូដង់ នៅខែកញ្ញា ហើយអ្នកឈ្នះនឹងត្រូវទៅប្រកួតជាមួយនឹងក្រុមលេខ៥ នៅតំបន់អាមេរិក​ខាង​ត្បូង នៅខែវិច្ឆិកា ដើម្បីប្រជែងយកកៅអី១ទៀត ទៅប្រទេសប្រេស៊ីលដែរ។

កីឡាករបម្រុង ជូស ឃេណេឌី (Josh Kennedy) បានប្រើក្បាលតែតបញ្ចូលទីបានសម្រេចនៅនាទីទី៨៣ ហើយក៏ជាគ្រាប់​បាល់តែ១គ្រាប់គត់ ដែលជួយឲ្យក្រុមហ្គង់ហ្គូរូ អូស្ត្រាលីទទួលបានជ័យជំនះដែរ បន្ទាប់ពីកីឡាកររូបនេះ ដូរចូលជំនួស​អតីតកីឡាករក្រុមអេវើតុន (Everton) ធីម កាហីល (Tim Cahill) នៅនាទី៧៧។

ដូច្នេះយើងឃើញហើយថា បាល់ទាត់ពិភពលោកឆ្នាំ២០១៤ សម្រាប់វត្តមានក្រុមអាស៊ី មិនខុសគ្នាប៉ុន្មានទេ ពីបាល់ទាត់​ពិភពលោកឆ្នាំ២០១០កន្លងទៅ គ្រាន់តែកាលពីឆ្នាំ២០១០ មានកូរ៉េខាងជើង ប៉ុន្តែឆ្នាំ២០១៤ខាងមុខនេះ នឹងមានវត្តមាន​របស់ក្រុមខ្លាំងរបស់អាស៊ីថ្មី អ៊ៀរ៉ង់វិញ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៩ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ