គ្រូបង្វឹកក្រុមឆែលស៊ី (Chelsea) លោកជូសេ ម៉ូរីញ៉ូ (Jose Mourinho) បាននិយាយថា កីឡាករចន ថឺរី (John Terry) នឹង​នៅតែជាប្រធានក្រុម ឆែលស៊ីដដែល ខណៈដែលលោកមានគម្រោងប្រជែងយកពានព្រីមែលីក (Premier League) នៅ​រដូវកាលថ្មីខាងមុខនេះ។

កីឡាករចន ថឺរី ប្រធានកីឡាករក្រុមឆែលស៊ី។

ថឺរី វ័យ៣២ឆ្នាំ បានធ្វើជាប្រធានក្រុម ហើយបានធ្វើឲ្យក្រុមឆែលស៊ី ឈ្នះពានរង្វាន់ព្រីមែលីកចំនួន២លើក កាលពីលោក​ម៉ូរីញ៉ូ នៅដឹកនាំលើកដំបូងនាកីឡាដ្ឋានស្តេមហ្វដប្រិជ្ជ (Stamford Bridge)។

លោកម៉ូរីញ៉ូ បាននិយាយថា «ថឺរី ជាប្រធានក្រុម។ ខ្ញុំពិតជាសប្បាយចិត្តខ្លាំងណាស់ ហើយអ្នកគាំទ្រក៏មានអារម្មណ៏​ដូច​ខ្ញុំដែរ។»

ការវិលត្រឡប់មកដឹកនាំឆែលស៊ី ជាលើកទី២នេះ លោកម៉ូរីញ៉ូ នឹងពិភាក្សាជាមួយកីឡាករហ្វឺណាន់ដូ តូរែស (Fernando Torres) ឲ្យបានច្បាស់លាស់ពីអនាគតរបស់គាត់។

អតីតគ្រូបង្វឹកក្រុមរៀលម៉ាឌ្រីដ (Real Madrid) កំពុងតែស្វែងរកខ្សែប្រយុទ្ធថ្មី ប៉ុន្តែក្នុងនោះគាត់ក៏បានចាប់អារម្មណ៏​កីឡាករវ័យ២៧ឆ្នាំ វែន រ៉ូនី (Wayne Rooney) របស់ក្រុមម៉ែនឆេស្ទើ យូណៃធីត (Manchester United) ដែរ ខណៈ​ដែល​កីឡាកររូបនេះ ចង់ចាកចេញពីកីឡាដ្ឋានអូលត្រាហ្វដ (Old Trafford)។

លោកម៉ូរីញ៉ូ បានបន្តថា «ខ្ញុំមិនចង់និយាយពីកីឡាកររបស់ក្រុមគេផ្សេងទេ ប៉ុន្តែមិនមែនថាខ្ញុំមិនពេញចិត្តគាត់នោះទេ។ ខ្ញុំគិតថា អាយុរបស់គាត់ (រ៉ូនី) នៅក្មេងដែរ និងមានបទពិសោធន៏ច្រើនទៀតផង។ ខ្ញុំមិនដឹងថា ក្រុមណាមួយទេ ដែល​ធ្វើ​ឲ្យគាត់សប្បាយចិត្ត ។ ខ្ញុំចូលចិត្តគាត់ ហើយខ្ញុំសូមជូនពរគាត់ ឲ្យរកក្រុមដែលគាត់ពេញចិត្ត និងរីករាយបាន។»

លោកម៉ូរីញ៉ូ បានទាក់ទងនឹងខ្សែប្រយុទ្ធក្រុមណាប៉ូលី (Napoli) អេឌីសិន កាវ៉ានី (Edinson Cavani) និងកីឡាករហ៊ុក (Hulk) របស់ក្រុមស្ស៊ីនីត ផិតថឺស្បឺក (Zenit St Petersburg) ប៉ុន្តែគាត់ក៏មានគម្រោងពិភាក្សាពីអនាគត របស់ខ្សែប្រយុទ្ធ​ហ្វឺណាន់ដូ តូរែសដែរ។

គ្រូបង្វឹកវ័យ ៥០ឆ្នាំបានបន្តថា «តូរែស ជាកីឡាករម្នាក់ដែលខ្ញុំ មិនទាន់បាននិយាយជាមួយគាត់នៅឡើយទេ ហើយ​ខ្ញុំក៏មិនទាក់ទងគេដែរ នៅពេលដែលពួកគេកំពុងតែរវល់នោះ។ ខ្ញុំនឹងរងចាំរហូតដល់ការប្រកួតខនហ្វឺដឺរ៉េសិនខាប់ (Confederations Cup) ចប់សិន ហើយបន្ទាប់មក ខ្ញុំនឹងជជែកជាមួយគាត់។»

បុរសសញ្ជាតិព័រទុយហ្គាល់រូបនេះ បានបន្ថែមថា «គាត់ (តូរែស) ជាកីឡាករឆែលស៊ី ហើយនៅមានកិច្ចសន្យា​វែងឆ្ងាយ​ទៀត។ គាត់នឹងរីករាយនៅទីនេះ ដោយចង់ឲ្យខ្ញុំផ្តល់ឱកាស និងជឿជាក់លើគាត់។ ដូច្នេះយើងនឹងពិភាក្សាគ្នា រកជម្រើស​ដែលល្អបំផុតទាំងអស់គ្នា។ បើអ្វីៗយើងនៅល្អប្រសើរ តូរែសនឹងនៅបន្ត ហើយខ្ញុំនឹងជួយគាត់ឲ្យអស់លទ្ធភាព ដើម្បីឲ្យ​គាត់ស្វែងរកទម្រង់ដ៏ឥតខ្ចោះរបស់គាត់មកវិញ៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១១ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ