បាល់ទាត់អង់គ្លេស៖ ម៉ែនស៊ីធី ទិញខ្សែបម្រើអន្តរជាតិអេស្ប៉ាញបានហើយ
- ដោយ: វិន ជីវ័ន្ត
- កែប្រែចុងក្រោយ: June 04, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
ក្រុមបាល់ទាត់ក្របខ័ណ្ឌឡាលីកា (La Liga) អេស្ប៉ាញសេវីឡា (Sevilla) បានប្រកាសថា ព្រមលក់ខ្សែបម្រើស្លាបដ៏មុតស្រួចរបស់ខ្លួនជេសឺស ណាវ៉ាស់ (Jesus Navas) ទៅឲ្យក្រុមមេឃខៀវម៉ែនឆេស្ទើ ស៊ីធី (Manchester City) ឬហៅកាត់ថា «ម៉ែនស៊ីធី» ជាផ្លូវការហើយ។
ជេសឺស ណាវ៉ាស់ កីឡាករខ្សែបម្រើស្លាបដ៏មុតស្រួច។
ខ្សែបម្រើស្លាបវ័យ២៧ឆ្នាំ បានប្រកបអាជីពរបស់គាត់នៅជាមួយក្រុមនាកីឡាដ្ឋានរ៉ាម៉ុន សាន់ឆេសផីជូន (Ramón Sánchez Pizjuán) តាំងពីវ័យកុម៉ាភាព ហើយគាត់បានចូលលេងឲ្យសេវីឡាបាន៣៨៨លើកហើយ មកដល់ពេលបច្ចុប្បន្ន។
កាសែតអង់គ្លេសហ្គាដៀន (Guardian) បានបង្ហាញឲ្យដឹងថា ការផ្ទេរនេះមានតម្លៃប្រមាណ ៣៦.៨លានដុល្លា (២៨.១៣លានអ៊ឺរ៉ូ)។ ប៉ុន្តែក្រុមនាកីឡាដ្ឋានអេទីហេដ (Etihad) បានឲ្យមុនប្រមាណជាង ២៦លានដុល្លាហើយ។
ណាវ៉ាស់ នឹងទទួលបានចំណូលរបស់គាត់មួយទ្វេរជាពីរ ខណៈដែលក្រុមម៉ែនស៊ីធី នឹងផ្តល់ឲ្យកីឡាករលំដាប់អន្តរជាតិអេស្ប៉ាញរូបនេះ ប្រមាណ៦.១៣លានដុល្លា ក្នុងមួយឆ្នាំ។
ជេសឺស ណាវ៉ាស់ ត្រូវបានគេដឹងថាជាកីឡាករមួយរូប ដែលមានបទពិសោធន៏ច្រើន និងមានជំនាញខាងបម្រើបាល់បានយ៉ាងល្អ។ ប៉ុន្តែគាត់ចាំបាច់ត្រូវតែចាកចេញពីសេវីឡា ទៅកាន់ក្រុមជើងឯករងព្រីមែលីក (Premier League) ដែលជាក្រុមលំដាប់កំពូលរបស់ពិភពលោក។
ណាវ៉ាស់ នឹងជួយឲ្យម៉ែនស៊ីធី មានភាពរឹងមាំនៅស្លាបស្តាំបន្ថែមទៀត។ គាត់ជាកីឡាករប្តូរតួនាទីបានយ៉ាងឆាប់រហ័ស ដូចជាអាចជួយការពារ និងបញ្ជូនបាល់ឲ្យមិត្តរួមក្រុមលេង។ នៅក្នុងក្របខ័ណ្ឌឡាលីការដូវកាលនេះ គាត់បង្កើតឱកាសរកគ្រាប់បាល់បញ្ចូលទីបានចំនួន៧៩លើក ហើយក៏ជាកីឡាករល្អជាប់ចំណាត់ថ្នាក់លេខ៥ដែរ។
គ្រូបង្វឹកក្រុមសេវីឡា លោកយូណៃ អេមឺរី (Unai Emery) បាននិយាយថា «ប្រាកដណាស់ថា ណាវ៉ាស់នឹងចាកចេញ។ ហើយនេះជារឿងដ៏ល្អសម្រាប់គាត់ ក៏ជារឿងដ៏ល្អសម្រាប់ក្លឹបដែរ។»
រីឯណាវ៉ាស់ ក៏បាននិយាយដែរថា «ខ្ញុំពេញចិត្តក្នុងការផ្ទេរចេញ ហើយខ្ញុំពិតជាចង់ឈ្នះពានរង្វាន់។ ម៉ែនស៊ីធី ជាក្រុមដែលខ្ញុំចូលចិត្តណាស់។ ពេលនេះយើងនៅចាំតែថ្ងៃចុះហត្ថលេខាតែប៉ុណ្ណោះ។»
កីឡាករដែលធ្លាប់ឈ្នះពានរង្វាន់បាល់ទាត់ពិភពលោកឆ្នាំ២០១០ និងពានរង្វាន់អ៊ឺរ៉ូ (European) ឆ្នាំ២០០៨ និងឆ្នាំ២០១២ (ណាវ៉ាស់) ពុំសូវជាប់ជាជម្រើសដំបូងទេ នៅក្នុងក្រុមជម្រើសជាតិអេស្ប៉ាញ ពោលគឺគាត់បានត្រឹមតែកីឡាករបម្រុងប៉ុណ្ណោះ។ ប៉ុន្តែការផ្ទេរមកលេងឲ្យក្រុមម៉ែនស៊ីធីនេះ គេជឿថា គាត់នឹងអាចបង្ហាញខ្លួនឲ្យក្រុមអេស្ប៉ាញបានទៀតទាត់មិនខាន៕
----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី០៣ ខែមិថុនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ