តាំងពីលោកនាយករដ្ឋមន្ត្រី ចូលមកកាន់មុខតំណែងរបស់លោកឡើងវិញ នៅខែធ្នូឆ្នាំ២០១២កន្លងមក លោកអាប៊េមិន​បានរើមករស់នៅ ក្នុងគ្រឹស្ថានដែលមានវ័យចំណាស់តាំងពី៨៤ឆ្នាំនេះទេ។ បើតាមប្រព័ន្ធផ្សព្វផ្សាយជាច្រើននៅជប៉ុន វាជាលើកទីមួយហើយ ដែលនាយករដ្ឋមន្ត្រីបដិសេធ មិនចូលទៅរស់នៅក្នុងទីកន្លែងនោះ ជាមួយការអូសបន្លាយ​ពេល​យូយ៉ាងដូច្នេះ។

ប៉ុន្តែរឿងដែលគិតថាមិនលេងសើចនោះ មានអ្នកតំណាងរាស្ត្រមួយរូប នៃគណបក្សប្រឆាំងរបស់ជប៉ុន បានបង្ហាញ​កង្វល់​របស់ខ្លួន ដោយបានសរសេរថា ជម្រើសរបស់នាយករដ្ឋមន្ត្រី ដែលមិនបានចូលទៅស្នាក់នៅ ក្នុងការិយាល័យផ្លូវការ​នៃ​នាយករដ្ឋមន្ត្រី អាចធ្វើឲ្យបារម្ភ ក្នុងការមានប្រតិកម្មការងារជាតិយឺតយ៉ាវ ប្រសិនមានរឿងហេតុបន្ទាន់ណាមួយ ត្រូវដោះ​ស្រាយជាប្រញាប់។

តំណាងរាស្ត្ររូបនោះ បានចោទជាសំនួរថា «វាធ្លាប់មានរួចហើយ ពាក្យចចាមអារាមដែលថា វិមានសំណាក់របស់នាយក​រដ្ឋមន្ត្រីនោះ មានខ្មោចលង។ តើវាពិតទេ?» និងបន្តសួរទៀតថា «តើលោកនាយករដ្ឋមន្ត្រីបដិសេធ មិនទៅរស់នៅទីនោះ ដោយសារពាក្យចចាមអារាមនេះឬ?»

ខុទ្ទល័យនាយករដ្ឋមន្ត្រី បានឆ្លើយតបមកវិញ ដោយសរសេរបញ្ជាក់យ៉ាងច្បាស់ថា «ទេ»។

គួរបញ្ជាក់ថា លោក ហ្សិនហ្សូ អាប៊េធ្លាប់ជានាយករដ្ឋមន្ត្រីក្នុងឆ្នាំ២០០៦-២០០៧ម្ដងរួចហើយ មុននឹងលោកបាន​ជាប់​ឆ្នោតឡើងវិញ ដើម្បីត្រឡប់មករស់នៅក្នុងវិមាននេះទៀតនោះ។ នៅជប៉ុន បើទោះជាភាពទំនើបជឿនលឿន មានកម្លាំង​ខ្លាំងយ៉ាងណាក៏ដោយ ដោយនៅក្នុងអារម្មណ៍របស់ប្រជាជនជប៉ុនម្នាក់ៗ ព្រលឹងខ្មោចព្រាយបីសាច តែងតែនៅសន្ឋិត​ជានិច្ចជាកាលជាមួយពួកគេ។

ពាក្យចចាមអារាម មិនមែនទើបនឹងមាននៅថ្ងៃនេះទេ ស្ដីពី«ខ្មោចលង»នៅក្នុងវិមាននាយករដ្ឋមន្ត្រីជប៉ុន។ ប្រមុខ​រដ្ឋាភិបាលជប៉ុនជាច្រើននាក់ហើយ ដែលបានហែលឆ្លងបទពិសោធន៍ យ៉ាងចម្លែកពិសេសនេះ តែមិនបានបញ្ជាក់​ពីអ្វី​ឲ្យពិតប្រាកដទេ។ ភរិយារបស់នាយករដ្ឋមន្ត្រីទាំងនោះ ភាគច្រើនបានបដិសេធមិនព្រមទៅរស់នៅ ក្នុងលំនៅដ្ឋានមាន​១១បន្ទប់នេះ ដែលធ្លាប់ឆ្លងកាត់ប្រវត្តិឈុតឆាក នៃការប៉ុនប៉ងធ្វើរដ្ឋប្រហារចំនួនពីរលើក នៅក្នុងទស្សវត្តន៍ឆ្នាំ៣០។

នៅខែឧសភាឆ្នាំ១៩៣២ នាយករដ្ឋមន្ត្រី ស៊ូយ៉ូស្សី អ៊ីនូកៃ​ (Tsuyoshi Inukai) ត្រូវបានធ្វើឃាតនៅក្នុងវិមាននេះ ដោយ​ក្រុមទាហ៊ានក្មេងៗ នៃកងទ័ពជើងទឹក។ មិនត្រឹមតែប៉ុណ្ណឺង នៅបួនឆ្នាំក្រោយមក ក្នុងខែកុម្ភះឆ្នាំ១៩៣៦ ទាហ៊ានបះបោរ​ប្រមាណជា១៤០០នាក់ បានកាន់កាប់ទីក្រុងតូក្យូចំនួនបួនថ្ងៃ ជាពិសេសសង្កាត់ដែលមានក្រសួងជាតិសំខាន់ៗ និងវិមាន​នាយករដ្ឋមន្ត្រី។

ពួកអ្នកបះបោរទាំងនោះ បានសម្លាប់មេដឹកនាំជប៉ុនក្នុងសម័យនោះ ជាច្រើននាក់ ប៉ុន្តែនាយករដ្ឋមន្ត្រីលោក កេស៊ូកេ អូកាដា (Keisuke Okada) បានគេចខ្លួនរួច ដោយសារតែពួកទាហ៊ានសម្លាប់ច្រឡំប្អូនថ្លៃរបស់លោកជំនួស៕