អ្នកទទួលខុសត្រូវម្នាក់របស់អង្គការសហប្រជាជាតិ បានប្រកាសនៅថ្ងៃព្រហស្បត្តិ៍ទី២៣ខែមេសា ថាប្រទេសចិនមាន​បំណងចង់បញ្ជូនទ័ពរបស់ខ្លួន ទៅបំពេញបេសកកម្មថ្មីមួយ ដើម្បីរក្សាសន្តិភាពក្នុងក្របខ័ណ្ឌអង្គការសហប្រជាជាតិ នៅក្នុងប្រទេសម៉ាលី។ ក្រុមនិយមអ៊ីស្លាមបានកាន់កាប់ផ្នែកខាងជើងនៃប្រទេសនេះ តែត្រូវបានរុញច្រានដោយ​កងទ័ព​នៃប្រទេសបារាំង ដែលបានធ្វើតាំងពីខែមករាកន្លងមក។

ទាហ៊ាននៃប្រទេសមួយនៅទ្វីបអាហ្វ្រិក ពាក់មួកខៀវរបស់អ.ស.ប។

អ្នកនាំពាក្យមួយរូប នៃយុទ្ធនាការថែរក្សាសន្តិភាព ប្រចាំឲ្យអង្គការសហប្រជាជាតិ លោកអង់ឌ្រេ មីឆែល អែស៊ួនហ្គូ បាន​ប្រកាសប្រាប់សារព័ត៌មានអេភីថា អង្គការពិភពលោកបានទទួលនូវកិច្ចសន្យា និងជំនួយពីសំណាក់ប្រទេស​មួយចំនួន​នៅក្នុងពិភពលោក ក្នុងនោះមានប្រទេសចិនដែរ។

អ្នកទទួលខុសត្រូវ និងអ្នកការទូតរបស់អង្គការពិភពលោក ដែលបានលាក់មិនបញ្ចេញឈ្មោះ បាននិយាយថា ចិនទំនង​ជាមានបំណងចង់បញ្ជូន កងកម្លាំងវិស្វកម្មស៊ីវិល ប្រមាណជា១៥០នាក់ ហើយថានឹងបញ្ជូននូវកងទ័ពមួកខៀវ បន្ថែម​ផ្សេងទៀត។

ក្រុមប្រឹក្សាសន្ដិសុខនៃអង្គការសហប្រជាជាតិ បានអនុញ្ញាតឲ្យមានការបង្កើតកងកម្លាំងសម្រាប់ថែរក្សាសន្តិភាព ប្រមាណជា១១២០០នាក់ នៅប្រទេសម៉ាលី ចាប់ពីថ្ងៃទី០១កក្កដាខាងមុខនេះតទៅ ដើម្បីជំនួសកងកម្លាំងនៃបណ្ដា​ប្រទេសនៅទ្វីបអាហ្វ្រិក ដែលបានដាក់ពង្រាយរួចមកហើយ៕

---------------------------------------------------
ដោយ សេក មនោរកុមារ - ប៉ារីស​ ថ្ងៃទី២៤ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ