រកឃើញក្នុងក្រេមលាបបបូរមាត់ មាន«ជាតិពុល»សម្រាប់សុខភាព
ការសិក្សាស្រាវជ្រាវមួយ នៅសហរដ្ឋអាមេរិក បានលើកមកបង្ហាញពីការរកឃើញជាតិលោហធាតុពុលមួយចំនួន នៅក្នុងក្រេមលាបបបូរមាត់ ដែលអាចឈានទៅរកការវិវត្តន៍នៃជម្ងឺមហារីក។ ជាដំណឹងមួយយ៉ាងអាក្រក់ សម្រាប់ពួកអ្នកនាងៗមួយចំនួន ដែលចូលចិត្តតុបតែងខ្លួន មិនដែលលោះពេលណាមួយសោះនោះ។
ក្រេមលាបបបូរមាត់ ជាមួយនឹងសារធាតុធ្វើឲ្យចែងចាំងរលោង។
អ្នកស្រាវជ្រាវពីសកលវិទ្យាល័យ ប៊ើរកឺឡី (Berkeley) ក្នុងរដ្ឋកាលីហ្វ័នី បានធ្វើការវិភាគសារជាតិ ដែលមាននៅក្នុងក្រេមលាបបបូរមាត់ ចំនួន៣២ផលិតផល ដែលមានដាក់លក់នៅតាមហាងលក់ទំនិញធំៗ ឬនៅតាមហាងលក់គ្រឿងសម្អាងនានា និងជាពិសេសទៅលើផលិតផល ដែលសុទ្ធសឹងតែមានឈ្មោះល្បីនោះថែមទៀតផង។
ជាលទ្ធផល ដែលបានចេញមកយ៉ាងច្បាស់ ពី៦០%នៃផលិតផលទាំងនោះ គឺគេរកឃើញមានសារធាតុលោហៈចំនួន៩ ដែលមានជាតិពុល ដូចយ៉ាងជាតិអាលុយមីញ៉ូម ជាតិសំណរ ឬជាតិក្រូមនោះជាដើម។
អ្នកទទួលខុសត្រូវនៃការស្រាវជ្រាវនេះមួយរូប លោកស្រីកាតារីន ហាមម៉ុង (Katharine Hammond) បាននិយាយថា ប្រសិនបើការប្រមូលផ្ដុំលោហធាតុទាំងនោះ មានកម្រិតខ្សោយនៅក្នុងផលិតផល ដែលយកមកសិក្សាវិភាគទាំងនោះក៏ពិតមែន តែលោហធាតុមួយចំនួន បានបង្ហាញនូវកម្រិតប្រតិកម្មរបស់ខ្លួន សម្រាប់អ្នកប្រើប្រាស់ «ទៅថ្ងៃមុខវែងឆ្ងាយតទៅទៀត»។
ការស្រាវជ្រាវនោះថែមទាំងបានរកឃើញទៀតថា ការប្រើប្រាស់ផលិតផលក្រេមលាមបបូរមាត់នេះខ្លាំងជ្រុល វានឹងកាន់តែមានគ្រោះថ្នាក់ ជាពិសេសទៅលើកុមារ៕
-------------------------------------------------
ដោយ ឈូករ័ត្ន - ប៉ារីស ថ្ងៃទី១០ ខែឧសភា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ